កីឡា

អេ យ៉ានុត ឆ្លងកាត់ការលំបាកច្រើនណាស់រយៈពេលជាង ១០ឆ្នាំក្នុងនាមជាកីឡាការិនីគុនខ្មែរ

បានផុស

៦ ខែ មុន

នៅ

ថ្ងៃពុធ ១៩ វិច្ឆិកា ២០២៥

ដោយ

កូនស្រីលោក អេ ភូថង គឺ អេ យ៉ានុត ថាក្នុងរយៈពេលជាង ១០ឆ្នាំមកនេះហែលឆ្លងកាត់ការលំបាកច្រើនណាស់ក្នុងនាមជាកីឡាការិនីគុនខ្មែរមួយរូបមានទាំងលះបង់ភាពអៀនខ្មាស់ ការនឿយហត់ និងការលះបង់ពេលវេលា ព្រោះតែស្រឡាញ់អាជីពប្រដាល់មួយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាការិនី អេ យ៉ានុត

កីឡាការិនី អេ យ៉ានុត បានឲ្យដឹងថា គិតមកដល់ឆ្នាំ២០២៥ រូបគេប្រឡូកក្នុងវិស័យប្រដាល់គុនខ្មែរនេះមានរយៈពេលប្រហែលជាង ១០ឆ្នាំមកហើយ។ ដោយចិត្តស្រឡាញ់តាំងតែពីវ័យក្មេងទើបធ្វើឲ្យរូបគេជម្នះចិត្តម្ដាយឪពុក និងយាយ រហូតអាចចាប់អាជីពប្រដាល់នេះបានមកដល់សព្វថ្ងៃ។ ដោយសារតែខ្លួនជាកូនស្រីមានតែម្នាក់ក្នុងគ្រួសារផង និងដឹងពីការលំបាកលើវិថីប្រដាល់មួយនេះហើយនោះទើបក្រុមគ្រួសាររបស់ខ្លួនមិនចង់ឲ្យចាប់អាជីពមួយនេះទាល់តែសោះអំឡុងកាលនៅក្មេងៗនោះ។

កីឡាការិនី អេ យ៉ានុត

កូនស្រីលោក អេភូថង រូបនេះបន្តថា បើនិយាយពីការលំបាកក្រៅពីសុំក្រុមគ្រួសារហើយនោះគឺមានរឿងច្រើនទៀតដូចជាត្រូវហ្វឹកហាត់យ៉ាងលំបាកដូចកីឡាករដទៃដែរដោយមិនគិតថាជាមនុស្សស្រី ឬមនុស្សប្រុសនោះឡើយ។ កីឡាមួយនេះត្រូវការហ្វឹកហាត់ធ្ងន់ និងចំណាយពេលច្រើនទម្រាំអាចចេះតាមក្បួន ឬមានសមត្ថភាពឡើងប្រកួត។

កីឡាការិនី អេ យ៉ានុត

អេ យ៉ានុត បានបន្តទៀតថា ការហ្វឹកហាត់ត្រូវការលះបង់ច្រើនទៀតដូចជាលះបង់ការអៀនខ្មាស់ទាំងអស់ដោយត្រូវហាត់ជាមួយមនុស្សប្រុស និងត្រូវចាប់អោបឡាំជង្គង់គ្នាជាដើម។ លះបង់រាងកាយជានារីដោយត្រូវលត់ដំខ្លាំងទាំងការហាត់ទាត់ ហាត់វាយដៃ ហាត់ជង្គង់ ឬកែង ដើម្បីឲ្យរឹងមាំ ដូច្នេះហើយធ្វើឲ្យខ្លួនប្រាណឡើងសាច់ដុំ មានស្នាមជាំ មានបែកបាក់ជាដើម ខណៈដែរនារីៗទូទៅខំប្រឹងថែរក្សាចំណុចទាំងអស់នេះខ្លាំងបំផុត។

កីឡាការិនី អេ យ៉ានុត(ស្ដាំ)

កីឡាប្រដាល់មួយនេះត្រូវការការលះបង់ពេលវេលាហ្វឹកហាត់យូរឆ្នាំ និងត្រូវការចំណាយពេលច្រើនក្នុងមួយថ្ងៃៗប្រសិនបើចង់ឲ្យមានសមត្ថភាពល្អ និងអាចប្រកួតជាមួយអ្នកផ្សេងៗបានដោយមិនសូវជួបការលំបាក។ ការលំបាកមួយទៀតនោះគឺបញ្ហាប្រចាំខែរបស់ស្ត្រីទូទៅដែលត្រូវមានគ្រប់គ្នា ដូច្នេះហើយគឺមានការលំបាកខ្លាំងទាំងពេលហ្វឹកហាត់ ឬពេលប្រកួតនៅពេលនោះ។

កីឡាការិនី អេ យ៉ានុត

អតីតកីឡាការិនីជម្រើសជាតិកម្ពុជានេះបញ្ជាក់ទៀតថា ដូច្នេះហើយទម្រាំអាចតស៊ូជាមួយវិស័យកីឡាប្រដាល់គុនខ្មែររហូតរយៈពេលជាង ១០ឆ្នាំមកនេះគឺមិនងាយស្រួលនោះឡើយពិសេសសម្រាប់នារីៗ។

យ៉ានុត សុំចិត្តមហាជនឲ្យយល់ដល់ការលំបាកទាំងនេះ និងគួរលើកទឹកចិត្តកីឡាករ កីឡាការិនីវិញ និងរិះគន់ដោយស្ថាបនាជាជាងស្ដីបន្ទោស ឬនិយាយបំបាក់ទឹកចិត្តដែលធ្វើឲ្យប៉ះពាល់ផ្លូវចិត្តរហូតដល់ការបោះបង់អាជីពកីឡាចោលដែលនាំឲ្យវិស័យកីឡាមិនសូវមានការរីកចម្រើន។

កីឡាការិនី អេ យ៉ានុត និងប្អូន

បញ្ជាក់ដែរថា កីឡាការិនី អេ យ៉ានុត ជាកូនស្រីច្បងរបស់លោក អេ ភូថង។ រូបគេចាប់អាជីពប្រដាល់គុនខ្មែរបន្តពីឪពុករយៈពេលជាង ១០ឆ្នាំមកហើយគិតដល់ឆ្នាំ២០២៥ នេះ។ បន្ទាប់ពីធ្វើមិនសូវបានល្អអំឡុងប៉ុន្មានប្រកួតចុងក្រោយនេះរូបគេរង់ការរិះគន់ពីអ្នកគាំទ្រមួយចំនួនជាខ្លាំងរហូតប្រកួតចុងក្រោយកាលពីថ្ងៃទី៥ ខែវិច្ឆិកា ឆ្នាំ២០២៥ មានរបួសស្រាំដៃស្ដាំ និងរង់ការរិះគន់មិនបានក៏សម្រេចចិត្តឈប់ពីវិស័យប្រដាល់គុនខ្មែរចាប់ពីពេលនេះហើយ៕