សហគមន៍កសិកម្មទំនើបស្រូវនាងអំ ចាប់ផ្តើមប្រមូល​ផលតាមកិច្ចសន្យាក្នុងតម្លៃ ៨៥០ រៀល ក្នុងមួយគីឡូក្រាម

កសិករសមាជិកនៃ «សហគមន៍កសិកម្មទំនើបស្រូវនាងអំ» នៅថ្ងៃទី ១៨ ខែវិច្ឆិកា ឆ្នាំ ២០២៥ បានចាប់ផ្តើមប្រមូលផលស្រូវនាងអំរបស់ខ្លួនតាមរយៈផលិតកម្មកសិកម្មតាមកិច្ចសន្យា ក្នុងតម្លៃ ៨៥០ រៀល ក្នុងមួយគីឡូក្រាម។

ទោះបីជាតម្លៃដែលបានចុះកិច្ចសន្យាសម្រាប់ឆ្នាំនេះទាបជាងតម្លៃដែលទទួលបានកាលពីឆ្នាំ២០២៤ ក៏ដោយ ក៏តម្លៃនេះនៅ​តែខ្ពស់ជាងតម្លៃទីផ្សារស្រូវនាងអំក្រៅសហគមន៍នាពេលបច្ចុប្បន្នដល់ទៅ ២៥០ រៀល ដដែល។

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា ផលិតកម្មតាមកិច្ចសន្យាការពារកសិករជាសមាជិកសហគមន៍ពីហានិភ័យនៃការប្រែប្រួលថ្លៃទីផ្សារបានប្រកបដោយប្រសិទ្ធភាព។

លោក ឃឹម ហ្វីណង់ បន្ថែមថា៖ «ដោយសារតែមានកិច្ចសន្យាទុកជាមុន សហគមន៍ស្រូវនាងអំ មានដៃគូ ដែលមានការឯកភាពក្នុងការប្រមូលទិញស្រូវនាងអំ ធ្វើឱ្យកសិករជាសមាជិកទទួលបានតម្លៃស្រូវ ៨៥០ រៀល ក្នុងមួយគីឡូក្រាម»៕