ព័ត៌មានជាតិ

វឌ្ឍនភាពការរៀបចំបង្គោលភ្លើងបំភ្លឺតាមផ្លូវជាតិលេខ ៦ ភូមិសាស្ត្រខេត្តកំពង់ធំ សម្រេចបានប្រមាណ ៨០%

បានផុស

៦ ខែ មុន

នៅ

ថ្ងៃពុធ ៣ ធ្នូ ២០២៥

ដោយ

ការរៀបចំបង្គោលភ្លើងបំភ្លឺសាធារណៈតាមដងផ្លូវជាតិលេខ ៦ ក្នុងភូមិសាស្ត្រខេត្តកំពង់ធំ សម្រេចបានវឌ្ឍនភាពតាមផែនការ ខណៈអាជ្ញាធរកំពុងបន្តជំរុញបញ្ចប់ក្នុងពេលឆាប់ៗខាងមុខ។

ឆ្លើយតបការសាកសួររបស់កម្ពុជាថ្មី លោក អ៊ុន បុត្ត អភិបាលរងខេត្តកំពង់ធំ បានថ្លែងថា «វឌ្ឍនភាពបច្ចុប្បន្នដំណើរការកំពុងតែធ្វើរហូត គឺអត់ទាន់ចប់នៅឡើយទេ។ ការប៉ាន់ស្មាននៃការងារសម្រេចបានប្រហែលជា ៨០% ទៅ ៩០%»។

លោក អ៊ុន បុត្ត បន្តថា ការងារនៅបន្តិចបន្តួចទៀតដូចជានៅស្រុកស្ទោង និងស្រុកប្រាសាទបល្ល័ង្កដែលត្រូវអនុវត្តបន្ត។

គម្រោងរៀបចំបង្គោលភ្លើងបំភ្លឺនៅតាមដងផ្លូវជាតិក្នុងភូមិសាស្ត្រខេត្តកំពង់ធំ ទទួលបានការចាប់អារម្មណ៍យ៉ាងខ្លាំងពីមហាជន។

បើតាមលោក អ៊ុន បុត្ត គោលដៅរបស់អាជ្ញាធរខេត្តមិនមែនគ្រាន់តែពង្រីកការដំឡើងតាមបណ្ដោយផ្លូវជាតិប៉ុណ្ណោះទេ តែថែមទាំងគ្រោងរៀបចំនៅតាមទាំងទីប្រជុំជន តាមដងផ្លូវបេតុង និងនៅតាមបណ្តាសង្កាត់នានានៅក្នុងក្រុងស្ទឹងសែនទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរខេត្តកំពង់ធំបានប្រមូលកៀរគរកម្លាំងអនុវត្តការរៀបចំដំឡើងបង្គោលភ្លើងបំភ្លឺសាធារណៈតាមដងផ្លូវជាតិលេខ ៦ នៅក្នុងភូមិសាស្ត្រខេត្តកំពង់ធំចាប់ពីពីព្រំប្រទល់ខេត្តកំពង់ចាម រហូតដល់ព្រំប្រទល់ខេត្តសៀមរាបដែលមានប្រវែងសរុប ១៤៤ គីឡូម៉ែត្រ។

អភិបាលខេត្តកំពង់ធំលោក នួន ផារ័ត្ន បានហៅយុទ្ធនាការនេះពិតជាមានសារៈសំខាន់ណាស់ ក្រៅពីជួយសម្រួលការធ្វើដំណើររបស់ប្រជាពលរដ្ឋក្នុងពេលយប់ព្រលប់ ក៏ដើម្បីពង្រឹងការងារសន្តិសុខដល់មូលដ្ឋានផងដែរ។

បើតាមរដ្ឋបាលខេត្តកំពង់ធំ ក្រោម «យុទ្ធនាការបំពាក់ បង្គោលភ្លើងសូឡា នៅតាមដងផ្លូវជាតិលេខ៦» នឹងជំរុញឲ្យការអនុវត្តកិច្ចការនេះឲ្យបានចប់រួចរាល់នៅត្រឹមដំណាច់ឆ្នាំ ២០២៦ ខាងមុខ៕