វៀតណាមពន្លឿនការសាងសង់អាកាសយានដ្ឋានដ៏ធំបំផុតរបស់ប្រទេសខ្នាត 4F

រដ្ឋាភិបាល​វៀតណាមកំពុងពន្លឿនការសាងសង់ដំណាក់់កាលទី២នៃអាកាសយានដ្ឋាន Long Thanh International Airport ដែលនឹងក្លាយជាអាកាសយានដ្ឋានដ៏ធំំបំផុតរបស់ប្រទេស ខ្នាតអន្តរជាតិ 4F។ នេះបើតាមការចុះផ្សាយរបស់កាសែត VnExpress។

ការពន្លឿនការសាងសង់ ធ្វើឡើងចំពេលដែលវៀតណាមមើលឃើញពីកំណើននៃតម្រូវការធ្វើដំណើរតាមអាកាស ខណៈប្រទេសនេះកំណត់គោលដៅឱ្យមានអាកាសយានដ្ឋានក្នុងស្រុកសរុប ៣៣ កន្លែង ទូទាំងប្រទេសគិតត្រឹមឆ្នាំ ២០៣០។

រដ្ឋាភិបាលវៀតណាម បានដាក់សំណើទៅគណៈកម្មាធិការអចិន្ត្រៃយ៍រដ្ឋសភា ដើម្បីកែសម្រួលសេចក្តីសម្រេចគោលនយោបាយវិនិយោគសម្រាប់គម្រោងអាកាសយានដ្ឋានយក្ស Long Thanh ដែលនឹងវ៉ាដាច់អាកាសយានដ្ឋាន Tan Son Nhat ​នៅ​ក្រុងហូជីមិញ ក្លាយជាមជ្ឈមណ្ឌលអន្តរជាតិសំខាន់បំផុតរបស់វៀតណាម។ ​

ការសាងសង់ដំណាក់កាលទី ២ រួមមានផ្លូវរត់ទី៣របស់អាកាសយានដ្ឋាន Long Thanh ស្ថានីយអ្នកដំណើរទី២ ដែល​មានសមត្ថភាពទទួលអ្នកដំណើរ ២៥ លាននាក់/ឆ្នាំ និង​កន្លែងស្តុកគ្រឿងបរិក្ខារ​។ សាជីវកម្មអាកាសយានដ្ឋានវៀតណាម (ACV) ត្រូវបានគេរំពឹងថានឹងនៅតែ​បន្តជា​អ្នកវិនិយោគឈានមុខគេសម្រាប់ការងារសំខាន់ៗ។

បើតាម VnExpress ខណៈផែនការដើម​បានកំណត់ការសាងសង់ដំណាក់កាលទី ២ ​នៅឆ្នាំ ២០២៨-២០៣២ សេណារីយ៉ូកំណើនសេដ្ឋកិច្ច និងអាកាសចរណ៍ស៊ីវិលនាពេលបច្ចុប្បន្ន បានជំរុញឱ្យ​មាន​ការកែសម្រួលឆ្នាំគោលដៅនេះ។​ ផលិតផលក្នុងស្រុកសរុប (GDP) របស់់វៀតណាម អាច​សម្រេចបាន​កំណើន ២ ខ្ទង់ចាប់ពីឆ្នាំ ២០២៦ ​ខណៈចំនួន​អ្នកដំណើរកើនឡើងលឿនជាងការព្យាករ។​

គួរគូសបញ្ជាក់់ថា អាកាសយានដ្ឋាន Long Thanh ស្ថិតនៅក្នុងខេត្ត ដុងណៃ ដែលមានចម្ងាយប្រហែល ៤០ គីឡូម៉ែត្រពីទីក្រុងហូជីមិញ លាតសន្ធឹងលើផ្ទៃដី ៥ ០០០ ហិកតា និងមានទុនវិនិយោគសរុបជិត ៣៣៧ ទ្រីលានដុង (១២,៧៨ ​ប៊ីលានដុល្លារ)។

ឥឡូវនេះ ផ្លូវរត់យន្តហោះ និងបណ្តាញផ្លូវ​សម្រាប់តាក់ស៊ីដំបូង ត្រូវបានបញ្ចប់ការសាងសង់រួចរាល់ហើយ ខណៈស្ថានីយអ្នកដំណើរត្រូវបានដំឡើងដំបូល និងកំពុងបន្ថែមបន្ទះកញ្ចក់ ហើយប៉មត្រួតពិនិត្យ និងកន្លែងប្រតិបត្តិការឯណោះវិញ កំពុងស្ថិតក្នុងដំណាក់កាលបញ្ចប់ចុងក្រោយ៕ ​