តម្លៃទុរេនវៀតណាមនៅក្រុងហូជីមិញ ធ្លាក់ចុះគំហុកមកត្រឹម ១,៥ ដុល្លារ/គីឡូក្រាម

ផ្លែទុរេនលក់រាយតាមចិញ្ចើមផ្លូវ និងផ្សារទំនើបនៅទីក្រុងហូជីមិញ នៃប្រទេសវៀតណាម បាន​ធ្លាក់ចុះគំហុក​មកត្រឹម ​៤០​ ០០០-៦០​ ០០០ ដុង (១,៥២-២,២៨ ដុល្លារ​)/គីឡូក្រាម ឬទាបជាងតម្លៃកាលពីឆ្នាំមុនដល់ទៅពាក់កណ្ដាល​។ នេះបើតាមការចុះផ្សាយរបស់កាសែត VnExpress កាលពីថ្ងៃព្រហស្បតិ៍។

បច្ចុប្បន្ន តូបលក់ដូរទុរេនជាច្រើនបាន​តាំងទីនៅតាមដងផ្លូវនានាទូទាំងទីក្រុងហូជីមិញ ​ដោយ​ទាក់​ទាញ​អ្នកបើកបរ​ឆ្លងកាត់​តាមរយៈតម្លៃ​ថោក​។ អ្នកលក់នៅតាមតូបមួយចំនួនបាននិយាយថា ​ទុរេន Ri6 ធ្លាប់មានតម្លៃលក់រាយចន្លោះពី ៨០ ០០០ ទៅ ១២០ ០០០ ដុង/គីឡូក្រាម កាលពីមួយឆ្នាំមុន

VnExpress បានផ្សាយផងដែរ សូម្បីតែផ្សារទំនើប ក៏លក់ទុរេន Ri6 និង Monthong ក្នុងតម្លៃស្រដៀងគ្នានឹង​តាមចិញ្ចើមផ្លូវ។ អាជីវករម្នាក់បាននិយាយថា ពីមុនមក មានតែទុរេនគុណភាពអន់ទេ ដែលលក់ក្នុងតម្លៃថោក ខណៈទុរេនពូជល្អៗត្រូវបានកំណត់សម្រាប់ការនាំចេញ ហើយ «​វាកម្រណាស់ដែលផ្លែទុរេនថ្នាក់ A (គុណភាពខ្ពស់បំផុត) និង B ត្រូវបានលក់យ៉ាងទូលំទូលាយ ក្នុងតម្លៃសមរម្យដូចពេលនេះ»។​

សមាគមផ្លែឈើ និងបន្លែវៀតណាម បាននិយាយថា តម្លៃផ្លែទុរេនបានធ្លាក់ចុះយ៉ាងខ្លាំងក្នុងរយៈពេលប៉ុន្មានខែថ្មីៗនេះ ដោយសារតែការនាំចេញទៅ​ចិន ដែលជាទីផ្សារធំបំផុតសម្រាប់​ទុរេន បានថយចុះ ខណៈ​តំបន់ដីសណ្តទន្លេមេគង្គបានចូលដល់រដូវប្រមូលផល​ធំ។ សមាគម​បន្ថែម​ថា ការធ្វើតេស្តគុណភាពសម្រាប់ការនាំចេញបានចំណាយពេលយូរពេក ដែលបណ្តាលឱ្យ​ក្រុមហ៊ុននាំចេញ​បញ្ឈប់ការទិញ​។

​យ៉ាងណាមិញ ប្រធានសមាគមផ្លែទុរេននៅខេត្ត ដុងថាប លោក Vo Tan Loi ​បាននិយាយថា ការកកស្ទះនៃការធ្វើតេស្ត ត្រូវបានបន្ធូរបន្ថយ ហើយការនាំចេញកំពុងបង្ហាញសញ្ញានៃការស្ទុះ​ងើបឡើងវិញ។

ចំណែកលោក Dang Phuc Nguyen អគ្គលេខាធិការនៃសមាគមផ្លែឈើ និងបន្លែវៀតណាម បាននិយាយថា បច្ចុប្បន្នវាជារដូវប្រមូលផលទុរេនសំខាន់នៅ​ថៃ ​ដែលបង្កើតបានជាបញ្ហាប្រកួតប្រជែងជាមួយវៀតណាមនៅចិន។ ​​ប៉ុន្តែការប្រមូលផលថៃជិតដល់ទីបញ្ចប់ហើយ ខណៈ​តំបន់ភាគអាគ្នេយ៍របស់​វៀតណាម​រំពឹងថានឹងចាប់ផ្តើមប្រមូល​ឆាប់ៗនេះ ​ហើយនោះ «នឹងក្លាយ​ជាឱកាសធ្វើ​ឱ្យ​ការនាំចេញ​ទុរេនទៅ​ចិន​ស្ទុះងើបឡើងវិញ​»៕