ព័ត៌មានអន្ដរជាតិ

ការនាំចេញវាយនភណ្ឌវៀតណាមកើនឡើង ប៉ុន្តែការបញ្ជាទិញធ្លាក់ចុះ

បានផុស

១ ខែ មុន

នៅ

ថ្ងៃពុធ ២៧ ឧសភា ២០២៦

ដោយ

ការនាំចេញវាយនភណ្ឌ និងសម្លៀកបំពាក់វៀតណាមបានកើនឡើង ប៉ុន្តែឧស្សាហកម្មនេះកំពុងប្រឈមមុខនឹងហានិភ័យផ្សេងៗ ដោយការបញ្ជាទិញនៅត្រីមាសទី២ រំពឹងថានឹងធ្លាក់ចុះយ៉ាងខ្លាំងចន្លោះ ២០-២៥%។ នេះបើតាមការចុះផ្សាយរបស់ទីភ្នាក់ងារសារព័ត៌មាន VNS។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យពីសមាគមវាយនភណ្ឌ និងសម្លៀកបំពាក់វៀតណាម (Vitas) បានបង្ហាញថា ការនាំចេញវាយនភណ្ឌ និងសម្លៀកបំពាក់របស់វៀតណាម បានកើនដល់ ១៤,៥៣ ប៊ីលានដុល្លារ នៅរយៈពេល ៤ ខែដើមឆ្នាំ ដោយកើនឡើង ៤,៣% ធៀបនឹងរយៈពេលដូចគ្នាឆ្នាំមុន។ សហរដ្ឋអាមេរិក នៅតែជាទីផ្សារនាំចេញធំជាងគេសម្រាប់វៀតណាម។

តួលេខនេះបង្ហាញថា ឧស្សាហកម្មវាយនភណ្ឌ និងសម្លៀកបំពាក់បានរក្សាសន្ទុះកំណើន ទោះបីជាមានការប្រែប្រួលជាបន្តបន្ទាប់នៅក្នុងសេដ្ឋកិច្ចពិភពលោកក៏ដោយ។ ប៉ុន្តែ តាមពិតទៅ វិស័យនេះក៏កំពុងប្រឈមមុខនឹងបញ្ហាប្រឈមជាច្រើនផងដែរ។

លោក Nguyễn Hùng Quý អគ្គនាយកក្រុមហ៊ុនវាយនភណ្ឌ Vinatex Textile and Garment Southern Corporation Limited Liability Company បានប្រាប់សារព័ត៌មានក្នុងស្រុកមួយថា ការធ្លាក់ចុះនៃតម្រូវការសកលបានបណ្តាលឱ្យការបញ្ជាទិញថ្មីៗមានតិច ខណៈអ្នកទិញមួយចំនួនថែមទាំងបានកាត់បន្ថយ ឬលុបចោលការបញ្ជាទិញទៀតផង។

លោកបានបន្តថា បរិមាណការបញ្ជាទិញក្នុងត្រីមាសទី២ រំពឹងថានឹងធ្លាក់ចុះយ៉ាងខ្លាំងពី ២០ ទៅ ២៥% បើធៀបនឹងរយៈពេលដូចគ្នាកាលពីឆ្នាំមុន។

លើសពីនេះ ខ្សែច្រវ៉ាក់ផ្គត់ផ្គង់វត្ថុធាតុដើមដែលនាំចូលពីចិន បានប្រឈមនឹងការពន្យារពេលម្តងហើយម្តងទៀត។ ជាលទ្ធផល រោងចក្រផលិតត្រូវបង្កើនការប្តូរវេនថែមម៉ោង ដើម្បីបំពេញតាមកាលវិភាគដឹកជញ្ជូនដែលកាន់តែតឹងតែង។

ប្រធាន Vitas លោក Vũ Đức Giang បានថ្លែងថា ឧស្សាហកម្មវាយនភណ្ឌ និងសម្លៀកបំពាក់វៀតណាម ត្រូវតែប្រឹងប្រែងរក្សាការបញ្ជាទិញដែលមានស្រាប់ ដើម្បីសម្រេចបានគោលដៅនាំចេញចំនួន ៥០ ប៊ីលានដុល្លារនៅឆ្នាំនេះ។

ក្នុងរយៈពេលប៉ុន្មានខែខាងមុខនេះ ឧស្សាហកម្មនេះត្រូវធ្វើការផ្លាស់ប្តូរដ៏សំខាន់នៅក្នុងទីផ្សារ ផលិតផល និងបច្ចេកវិទ្យារបស់ខ្លួន។ លោកក៏បាននិយាយផងដែរថា ការពង្រីកទីផ្សារនាំចេញ និងការស្វែងរកអតិថិជនបន្ថែមទៀត គួរតែជាយុទ្ធសាស្ត្ររយៈពេលវែងដ៏សំខាន់៕