សមត្ថកិច្ច ចុះបង្ក្រាបទប់ស្កាត់​បទល្មើសពិសេសមេខ្យល់នាំពលករចំណាកស្រុកតាមព្រំដែនកម្ពុជា-ថៃ

កងកម្លាំងនគរបាលដឹកនាំដោយលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ នៅរសៀល​ថ្ងៃទី ១៩ ខែមេសា បានចុះបង្ក្រាបទប់ស្កាត់រាល់បទល្មើសផ្សេងៗពិសេសមេខ្យល់នាំពលករចំណាកស្រុកចេញទៅរកការងារធ្វើនៅប្រទេសថៃដោយខុសច្បាប់នៅតាមបន្ទាត់ព្រំដែនក្នុងភូមិសាស្ត្រក្រុងប៉ោយប៉ែត និងស្រុកម៉ាឡៃ ខេត្តបន្ទាយមានជ័យ។

ចំណាត់ការនេះធ្វើឡើង ដើម្បីការពារសន្តិសុខ សុវត្ថិភាព សាធារណៈ ជូនបងប្អូនប្រជាពលរដ្ឋរស់នៅតាមបន្ទាត់ព្រំដែន។

លោកឧត្តមសេនីយ៍ទោ សិទ្ធិ ឡោះបានប្រាប់អ្នកយកព៍ត័មានឲ្យដឹងថា ការចុះបង្ក្រាបទប់ស្កាត់បទល្មើសផ្សេងៗពិសេសមេខ្យល់នាំពលករចំណាកស្រុកតាមបន្ទាត់ព្រំដែនកម្ពុជា-ថៃនេះ គឺជាការលើកទឹកចិត្តដល់ កងកម្លាំងវរសេនាតូចនគរបាលការពារព្រំដែនគោក ដែលកំពុងឈរជើងការពារតាមគោលដៅ និងបានជំរុញឲ្យកម្លាំងទាំងអស់ត្រូវទប់ស្កាត់បទល្មើសគ្រប់ប្រភេទពិសេសត្រូវ ពង្រឹងវិធានការឲ្យបានតឹងរ៉ឹង ចំពោះបងប្អូនប្រជាពលរដ្ឋ ចំណាកស្រុក ដើម្បីចូលរួមទប់ស្កាត់ ការចម្លងរីករាលដាល នៃជំងឺកូវីដ១៩៕

អត្ថបទ៖វ៉ាន់ ណា