តម្លៃប្រេងអន្តរជាតិបិទការជួញដូរប្រចាំសប្ដាហ៍ ក្នុងកម្រិតខ្ពស់បំផុតក្នុងរយៈពេលកន្លះឆ្នាំ

តម្លៃប្រេងអន្តរជាតិ​បាន​ធ្លាក់ចុះតិចតួចពេលបិទការជួញដូរកាលពីថ្ងៃសុក្រ ដែលជាថ្ងៃបិទការជួញដូរប្រចាំសប្ដាហ៍ ដែលធ្វើឱ្យ​​វាឈរនៅកម្រិតខ្ពស់បំផុតក្នុងរយៈពេលប្រហែល ៦ ខែ ក្រោយហក់ឡើងកាលពីថ្ងៃព្រហស្បតិ៍ជុំវិញភាពតានតឹងមជ្ឈិមបូព៌ា។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃប្រេងឆៅនាពេលអនាគត ម៉ាក Brent បាន​ធ្លាក់ចុះ ២ សេន ឬ ០,០៣% មកត្រឹម ៧០,៦៩ ដុល្លារ/បារ៉ែល ដែលនេះជារង្វង់តម្លៃខ្ពស់បំផុតរាប់តាំងពីចុងខែកក្កដា ឆ្នាំ ២០២៥។ ដោយ​ឡែកតម្លៃប្រេងអាមេរិក ​West Texas Intermediate (WTI) បានធ្លាក់ចុះ ២១ សេន ឬ០,៣២% មកត្រឹម ៦៥,២១ ដុល្លារ/បារ៉ែល ពោលគឺខ្ពស់បំផុតរាប់តាំងពីខែកញ្ញាឆ្នាំមុន។ ​

ពេលបិទការជួញដូរកាលពីថ្ងៃព្រហស្បតិ៍ តម្លៃប្រេងទាំង ២ បាន​ហក់ឡើងជាង ៣% ក្រោយ​មាន​សេចក្ដីរាយការណ៍ថា ប្រធានាធិបតីអាមេរិក លោក ដូណាល់ ត្រាំ កំពុងពិចារណាលើសកម្មភាពប្រឆាំងនឹងអ៊ីរ៉ង់ រួមទាំងការវាយប្រហារ «មានដែន​កំណត់» លើកងកម្លាំងសន្តិសុខ និងថ្នាក់ដឹកនាំអ៊ីរ៉ង់។ អ្នកវិភាគទីផ្សារបាន​លើកឡើងថា បញ្ហាភូមិសាស្រ្តនយោបាយអាមេរិក-អ៊ីរ៉ង់ បាន​បង្កើនកង្វល់អំពីការរំខានផ្នែកផ្គត់ផ្គង់ ជាពិសេសពាក់ព័ន្ធនឹង​ការដឹកជញ្ជូនប្រេងកាត់តាមច្រក Hormuz ដែលផ្លូវទឹកសំខាន់រួមចំណែកចរាចរណ៍ប្រេង ២០ លាន​បារ៉ែល/ថ្ងៃ។

តម្លៃប្រេងក៏ត្រូវបានជំរុញផងដែរ ដោយ​ព្យុះព្រិលនៅអាមេរិកខាងជើង និងអឺរ៉ុប ដែលរំខានដល់ការផ្គត់ផ្គង់ និងការផ្អាកការនាំចេញប្រេងពីវាលទាញយកសំខាន់ៗ២កន្លែងរបស់ប្រទេសកាហ្សាក់ស្ថាន។

យ៉ាងណាមិញ កំណើននៅតែមាន​កំណត់ ដោយវិនិយោគិនបន្តឃ្លាំមើលស្ថានការណ៍ ចំពេលតម្រូវការសកលខ្សោយ ហើយការផ្គត់ផ្គង់មាន​និន្នាការកើនឡើង។ កាលពីថ្ងៃព្រហស្បតិ៍​ មាន​សេចក្ដីរាយការណ៍ថា រុស្ស៊ីបញ្ជាក់ជាថ្មីនូវការអញ្ជើញមេដឹកនាំអ៊ុយក្រែនឱ្យចរចាអំពីដំណោះស្រាយសន្តិភាព។ ដំណោះស្រាយសន្តិភាពមានន័យថា រុស្ស៊ីអាចនាំចេញប្រេងរបស់ខ្លួនទៅលើទីផ្សារសកលជាថ្មី ដែលនឹង​ធ្វើឱ្យ​លំហូរនៃការផ្គត់ផ្គង់កើនឡើង៕