សេដ្ឋកិច្ច

កម្ពុជាតភ្ជាប់ជើងហោះហើរត្រង់ ពីក្រុងព្រះសីហនុ-សៀមិន

បានផុស

៤ ខែ មុន

នៅ

ថ្ងៃអង្គារ ១០ កុម្ភៈ ២០២៦

ដោយ

ក្រុមហ៊ុនអាកាសចរណ៍ Sky Angkor Airlines (ZA) នៅថ្ងៃទី ០៨ ខែកុម្ភៈ ឆ្នាំ ២០២៦ បានបើកជើងហោះហើរត្រង់ពីក្រុងព្រះសីហនុ-សៀមិន ប្រទេសចិន ឆ្លុះបញ្ចាំងពីការបង្កើនភ្ញៀវទេសចរ និងទាក់ទាញវិនិយោគិនកាន់តែច្រើនមកកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ម៉ាង ស៊ីណេត អភិបាលខេត្តព្រះសីហនុ មានប្រសាសន៍ថា ខេត្តព្រះសីហនុជាគោលដៅវិនិយោគដ៏ទាក់ទាញស្របតាមយុទ្ធសាស្ត្ររបស់រាជរដ្ឋាភិបាលក្នុងការអភិវឌ្ឍខេត្តនេះ ទៅជាតំបន់សេដ្ឋកិច្ចពិសេសគំរូពហុបំណង។

លោក ម៉ាង ស៊ីណេត យល់ឃើញថា៖ «ការបើកជើងហោះហើរត្រង់ថ្មីបន្ថែមទៀតនេះ គឺជាយុទ្ធសាស្ត្ររបស់រាជរដ្ឋាភិបាល កាលណាមានការហោះហើរកាន់តែច្រើន គឺបានពង្រីកនូវចំនួនភ្ញៀវទេសចរ និងអ្នកវិនិយោគ ប្រសិនបើការតភ្ជាប់ជើងហោះហើរនេះ មានអតិថិជនកាន់តែច្រើន ក៏ឆ្លុះបញ្ចាំងពីសន្តិសុខ សុវត្ថិភាព នៅក្នុងខេត្តព្រះសីហនុ»។

លោក ម៉ាង ស៊ីណេត បញ្ជាក់ថា ការបើកការហោះហើរនេះ បញ្ជាក់ថា សន្តិសុខ សុវត្ថិភាព ក្នុងខេត្តព្រះសីហនុមានលក្ខណៈល្អប្រសើរ ហើយខេត្តព្រះសីហនុក៏ជាគោលដៅ ដែលភ្ញៀវទេសចរមិនគួរមើលរំលង ខណៈគោលដៅទេសចរណ៍មួយនេះមានកោះ និងឆ្នេរដ៏ស្រស់ស្អាត។

លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATA) មានប្រសាសន៍ថា ការតភ្ជាប់ជើងហោះហើរពីកម្ពុជាទៅទីក្រុងសៀមិន ប្រទេសចិន មានគុណតម្លៃមហាសាលសម្រាប់វិស័យទេសចរណ៍ និងសេដ្ឋកិច្ចកម្ពុជា ប្រសិនបើការតភ្ជាប់ជាអចិន្ត្រៃយ៍ ខណៈរាជរដ្ឋាភិបាលកំពុងបង្ក្រាបទៅលើក្រុមល្បែងឧក្រិដ្ឋកម្មអនឡាញខុសច្បាប់ ដោយសារមានបុគ្គលិកមកពីចិនច្រើនដែលកំពុងសម្រុកទៅចិនវិញ។

យោងតាមអាកាសចរណ៍ស៊ីវិល នៅក្នុងឆ្នាំ ២០២៥ កម្ពុជាទទួលបានជើងហោះហើរចេញ-ចូល (ទ្វេទិស) ចំនួន ៦៤ ៨២១ ជើង កើនឡើង ១១% ធៀបនឹងឆ្នាំ ២០២៤, អ្នកដំណើរចេញ-ចូល (ទ្វេទិស) ចំនួន ៦ ៩៨៨ ២៥៩ នាក់ កើន ១២% និងទំនិញតាមផ្លូវអាកាសមានចំនួន ៩៣ ៨៨៩ តោន កើន ២១%៕

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា