ព័ត៌មានជាតិ

ឯកឧត្តម ហ៊ុន ម៉ានី៖ កម្ពុជាពីប្រទេសនាំចូលរថយន្ត ក្លាយជាមូលដ្ឋានម៉ាករថយន្តធំៗបោះទីតាំងបង្កើតរោងចក្រដំឡើងក្នុងស្រុក

បានផុស

៣ ខែ មុន

នៅ

ថ្ងៃសុក្រ ៦ មីនា ២០២៦

ដោយ

កម្ពុជាបានផ្លាស់ប្តូរពីប្រទេសនាំចូលរថយន្ត ក្លាយជាទីតាំងមូលដ្ឋានទាក់ទាញម៉ាករថយន្តធំៗបើករោងចក្រដំឡើងរថយន្តផ្គត់ផ្គង់ទីផ្សារក្នុងស្រុក។

ក្នុងរយៈពេលប៉ុន្មានឆ្នាំចុងក្រោយនេះ វិស័យយានយន្តនៅប្រទេសកម្ពុជាមានការរីកចម្រើនគួរឱ្យកត់សម្គាល់។ កម្ពុជាបានវិវត្តន៍ពីប្រទេសដែលមានក្រុមហ៊ុននាំចូលតិចតួច និងគ្មានរោងចក្រដំឡើងសោះ មកជាប្រទេសដែលមានរោងចក្រដំឡើងរថយន្តម៉ាកល្បីៗ ដូចជា Toyota, Ford និង BYD ជាដើម។ នេះបើតាមឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈលើកឡើងនៅក្នុងពិធីបើកពិព័រណ៍រថយន្តនៅ ដឹ ព្រេមៀរ សេនធរ សែនសុខ នាព្រឹកថ្ងៃទី០៦ ខែមីនា ឆ្នាំ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្តម ហ៊ុន ម៉ានី បានថ្លែងថា ការវិវត្តន៍ចុងក្រោយនេះជាលទ្ធផលនៃកិច្ចខិតខំប្រឹងប្រែងរបស់រាជរដ្ឋាភិបាល ក្នុងការបើកចំហសេដ្ឋកិច្ចទីផ្សារសេរី និងការវិនិយោគ ដើម្បីជំរុញកំណើនសេដ្ឋកិច្ច និងបង្កើតឱកាសការងារ។

ពាក់ព័ន្ធការរៀបចំពិព័រណ៍រថយន្ត ឯកឧត្តម ហ៊ុន ម៉ានី មើលឃើញថាមានកំណើនក្រុមហ៊ុនចូលរួមពីមួយឆ្នាំទៅមួយឆ្នាំ។

ការរៀបចំពិព័រណ៍យានយន្តបានក្លាយជាវេទិកាដ៏សំខាន់ សម្រាប់វិស័យឯកជនក្នុងការបង្ហាញសមិទ្ធផល និងផ្សព្វផ្សាយម៉ាកយីហោរបស់ខ្លួន។ ឯកឧត្តមបានលើកពីលទ្ធផលការរៀបចំពិព័រណ៍យានយន្តកាលពីឆ្នាំ២០២៥ ដែលត្រឹមតែរយៈពេលពីរថ្ងៃ រថយន្តចំនួន ៤០០ គ្រឿងត្រូវបានលក់ដាច់ ដែលនេះបង្ហាញពីតម្រូវការខ្ពស់ក្នុងទីផ្សារ។

ឯកឧត្តមក៏ចាប់អារម្មណ៍សម្រាប់ការរៀបចំពិព័រណ៍រថយន្តនៅឆ្នាំ ២០២៦ ស្របពិធីបុណ្យធំៗដូចជាទិវា ៨ មីនា និងពិធីបុណ្យចូលឆ្នាំខ្មែរ ក៏ជាជាយុទ្ធសាស្ត្រទីផ្សារដ៏ឆ្លាតវៃ។

ឯកឧត្តមឧបនាយករដ្ឋមន្រ្តីសង្កត់ធ្ងន់ថា បើទោះបីជាផលិតផលល្អយ៉ាងណាក៏ដោយ បើគ្មានយុទ្ធសាស្ត្រទីផ្សារ និងការគិតគូរពីកាលៈទេសៈត្រឹមត្រូវទេ នោះផលិតផលនឹងខ្វះភាពទាក់ទាញ។

ជាមួយគ្នានេះ ឯកឧត្តមឧបនាយករដ្ឋមន្រ្តីក៏កត់សម្គាល់ពីនិន្នាការនៃការប្រើប្រាស់យានយន្តអគ្គិសនី នៅក្នុងប្រទេសកម្ពុជាដែលកំពុងមានសន្ទុះគាំទ្រយ៉ាងខ្លាំង។ គិតត្រឹមដំណាច់ឆ្នាំ ២០២៥ កម្ពុជាមានយានយន្តអគ្គិសនីចុះបញ្ជីសរុបប្រមាណ ១០ ៩៦៨ គ្រឿង៕