ព័ត៌មានជាតិ

ឆ្លងកាត់បទពិសោធន៍រៀបចំផ្ទះត្រចៀកកាំ ៨ ឆ្នាំ លោក ហ៊ាង រ៉ាស៊ី ឈានទៅបង្កើតសិប្បកម្មផលិតទឹកត្រចៀកកាំ ផ្គត់ផ្គង់ទីផ្សារក្នុងស្រុក

បានផុស

២ ខែ មុន

នៅ

ថ្ងៃអាទិត្យ ៥ មេសា ២០២៦

ដោយ

ទឹកត្រចៀកកាំ ដុកទ័រ រ៉ាស៊ី ត្រូវបានផលិតនិងវេចខ្ចប់ដោយគ្រួសារលោកវេជ្ជបណ្ឌិត ហ៊ាង រ៉ាស៊ី ដែលមានទីតាំងនៅក្នុងស្រុកឆ្លូង ខេត្តក្រចេះ។

ក្រោយឆ្លងកាត់បទពិសោធន៍ដើររៀបចំបច្ចេកទេសផ្ទះត្រចៀកកាំរយៈពេល ៨ ឆ្នាំ លោកវេជ្ជបណ្ឌិត ហ៊ាង រ៉ាស៊ី បានឈានទៅបង្កើតសិប្បកម្មផលិតទឹកត្រចៀកកាំ ដើម្បីផ្គត់ផ្គង់ទីផ្សារក្នុងស្រុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហ៊ាង រ៉ាស៊ី បានប្រាប់ថា ទឹកត្រចៀកកាំ ដុកទ័រ រ៉ាស៊ី ត្រូវបានផលិតនិងវេចខ្ចប់នៅក្នុងប្រទេសកម្ពុជាពិតប្រាកដ ដែលមានទីតាំងនៅក្នុងស្រុកឆ្លូង ខេត្តក្រចេះ។ ម្ចាស់អាជីវកម្មរូបនេះអះអាងថា ដោយសារលោកមានផ្ទះត្រចៀកកាំខ្លួនឯងផ្ទាល់ និងមានបទពិសោធន៍ដើររៀបចំបច្ចេកទេសផ្ទះត្រចៀកកាំជាច្រើនឆ្នាំ ធ្វើឲ្យលោកងាយស្រួលក្នុងការប្រមូលទិញវត្ថុធាតុដើមក្នុងការផលិត។

សិប្បកម្មរបស់លោកហ៊ាង រ៉ាស៊ី ទើបតែចាប់ផ្តើមដំណើរការបានប្រហែល ២ ខែ។ លោក ហ៊ាង រ៉ាស៊ី បានរៀបរាប់ពីដំណើរការសិប្បកម្មរបស់លោក ប្រើប្រាស់ម៉ាស៊ីនបច្ចេកវិទ្យាទំនើបនាំចូលពីក្រៅប្រទេសដែលប្រើសីតុណ្ហភាពរហូតដល់ ១២១ អង្សាសេដើម្បីសម្លាប់មេរោគ ដែលអនុញ្ញាតឱ្យទឹកត្រចៀកកាំអាចរក្សាទុកបានរហូតដល់រយៈពេល ១ ឆ្នាំដោយសុវត្ថិភាពមិនចាំបាច់ក្លាសេ។

ទឹកត្រចៀកកាំដុកទ័ររ៉ាស៊ីមានសាច់ត្រចៀកកាំខាប់ល្អ មានរសជាតិឈ្ងុយ និងមានក្លិនស្ករត្នោតតិចៗ។ ចំណុចពិសេសគឺការប្រើប្រាស់ស្ករក្រាមសុទ្ធជំនួសឲ្យស្ករស ដែលទទួលទានទៅមិនធ្វើឲ្យក្ដៅក និងមិនសូវឡើងជាតិស្ករឡើយ។

លោក ហ៊ាង រ៉ាស៊ី បានលើកឡើងពីគុណប្រយោជន៍នៃការទទួលទានទឹកត្រចៀកកាំល្អសម្រាប់មនុស្សគ្រប់វ័យ រួមមានកុមារ ស្ត្រីមានផ្ទៃពោះ មនុស្សចាស់ និងអ្នកដែលមានសារពាង្គកាយចុះខ្សោយ ខណៈផលិតផលទឹកត្រចៀកកាំរបស់លោកសូម្បីតែអ្នកមានជំងឺទឹកនោមផ្អែម ក៏អាចទទួលទានបានផងដែរ។

សមត្ថភាពផលិតទឹកត្រចៀកកាំសិប្បកម្មលោក ហ៊ាង រ៉ាស៊ី មួយថ្ងៃអាចផលិតបានប្រមាណ ១ ០០០ ដប។ ម្ចាស់សិប្បកម្ម លោក ហ៊ាង រ៉ាស៊ី បញ្ជាក់ថា បច្ចុប្បន្នផលិតផលទឹកត្រចៀកកាំរបស់លោក ភាគច្រើនផ្គត់ផ្គង់តែទីផ្សារក្នុងខេត្តក្រចេះ និងតាមម៉ាតមួយចំនួន។

លោក ហ៊ាង រ៉ាស៊ី បន្តថា ផលិតផលទឹកត្រចៀកកាំរបស់លោកបានចុះបញ្ជីការត្រឹមត្រូវ មានចុះឡូហ្គោ និងប្រើប្រាស់លេខកូដទំនិញរបស់កម្ពុជា (884)។

ផលិតផលទឹកត្រចៀកកាំដុកទ័ររ៉ាស៊ី មានដបធំចំណុះ ១៨៥ មីលីលីត្រ ដែលលក់ក្នុងតម្លៃ ១០ ០០០ រៀល ខណៈដបតូចចំណុះ ៧៥ មីលីលីត្រ លក់ក្នុងតម្លៃ ៦ ០០០ រៀល។

ខណៈទីផ្សារមិនទាន់ពង្រីកបានទូលំទូលាយ ម្ចាស់អាជីវកម្មលោក ហ៊ាង រ៉ាស៊ី មានគោលបំណងធំក្នុងការផ្ដាច់ការនាំចូលផលិតផលពីបរទេសដោយជំរុញផលិតផលក្នុងស្រុក ខណៈលោកមានគម្រោងនាំចូលម៉ាស៊ីនបន្ថែមដើម្បីពង្រីកការផលិតផ្គត់ផ្គង់ទីផ្សារទូទាំងប្រទេស។

លោក ហ៊ាង រ៉ាស៊ី បានបញ្ជាក់ថា ផលិតផលទឹកត្រចៀកកាំដុកទ័ររ៉ាស៊ី របស់លោកក៏គ្រោងនឹងនាំយកទៅតាំងបង្ហាញនៅក្នុងពិព័រណ៍ផលិតផលខ្មែរនៅកោះពេជ្រនៅប៉ុន្មានថ្ងៃទៀតនេះ ខណៈលោកមើលឃើញថាក៏ជាឱកាសក្នុងការផ្សព្វផ្សាយផលិតផលសិប្បកម្មរបស់លោកក្នុងការកសាងកេរ្តិ៍ឈ្មោះ អាចឈានទៅពង្រីកទីផ្សារបន្ថែមទៀតនៅពេលអនាគត៕