​អាជ្ញាធរ​ដាំ​ដើមធ្នង់ នាងនួន ជើងគោ ក្ងោកបង្កើត​ពណ៌បៃតង តាមផ្លូវក្រវ៉ាត់ក្រុងក្រចេះថ្មី

អាជ្ញាធរខេត្តក្រចេះបាន​ដាំកូនឈើអមសងខាងផ្លូវក្រវ៉ាត់ក្រុងក្រចេះថ្មីចាប់ពីរង្វង់មូលខ្លាស្ទុះក្នុងសង្កាត់អូរឫស្សី ក្រុងក្រចេះ រហូតដល់​ចំណុច​ក្បាលស្ពានឆ្លងកាត់​ទន្លេ​មេគង្គក្រចេះ ក្នុងឃុំបុសលាវ ស្រុក​ចិត្របុរី ដើម្បីបង្កើន​សោភ័ណភាព​បន្ថែមទៀត។

ការដាំកូនឈើចម្រុះ​នេះធ្វើឡើងបន្ទាប់ពីលោក វ៉ា ថន អភិបាលខេត្តក្រចេះបានដឹកនាំក្រុមការងារចុះពិនិត្យរៀបចំទីតាំងដាំដើម​ឈើខាងលើរួចមក។

កូនឈើចម្រុះដែលអាជ្ញាធរយកទៅដាំ​​រួមមាន​ប្រភេទ​ ដើមធ្នង់ នាងនួន ដើមជើងគោ និងដើមក្ងោក ដែលកូនឈើប្រភេទនេះ​​ភាគ​ច្រើនឆាប់ធំលឿនមានមែកសាខា និងមានស្លឹកច្រើនផ្ដល់ជាម្លប់ដូចជា ដើមក្ងោកជាដើមឈើមានមែនសាខា ជាពិសេសមានផ្កាពណ៌​ស្រស់ស្អាតគូរជាទីចាប់អារម្មណ៍និងទាក់ទាញ។

ផ្លូវក្រវ៉ាត់ក្រុងក្រចេះ​ កំពុងត្រូវបានរៀបចំដាក់បង្គោលសញ្ញាអមនៅតាមសងខាងផ្លូវបណ្តើៗ ដើម្បីការពារសុវត្ថិភាពអ្នកធ្វើដំណើរតាម កង់ ម៉ូតូ រថយន្ត ការពារកុំឲ្យរអិលជ្រុលធ្លាក់ទៅខាងក្រោម ពីព្រោះស្ថានភាពផ្លូវនេះមានកម្ពស់ខ្ពស់ផុតពីកម្ពស់​ទឹកជំនន់នារដូវវស្សា៕

អត្ថបទ៖ ប្រុញ វិធិន