ផ្លូវមួយខ្សែ​ក្នុងក្រុង​ក្រចេះ ខូចខាតក្លាយជាសំបុកមាន់​​ ខណៈ​​រថយន្ត​ដឹកធ្ងន់បររត់​កាត់​រាល់ថ្ងៃ

ផ្លូវមួយខ្សែ ក្នុងក្រុងក្រចេះចាប់ពីអូរឫស្សី-ថ្មកាំង ប្រវែង ៨.៣៣ គីឡូម៉ែត្រ (KR1) ដែល​ជាគម្រោងគ្រប់គ្រងគ្រោះមហន្តរាយនៅកម្ពុជា និងអាស៊ីអាគ្នេយ៍ ​ស្ថាបនា​ដោយក្រសួងអភិវឌ្ឍន៍ជនបទ កាលពីអំឡុង​ឆ្នាំ ២០២២ កំពុងរងការខូចខាតក្លាយជាផ្លូវសំបុកមាន់រីករាលដាល់កាន់តែខ្លាំង ដោយរថយន្ត​ដឹកធ្ងន់រត់កាន់តែច្រើន។

ពលរដ្ឋរស់នៅក្នុងមូលដ្ឋានបានកើតក្តីព្រួយបារម្ភចំពោះបញ្ហាសុវត្ថិភាពសិស្សសាលា និងប្រជាពលរដ្ឋនៅពេលធ្វើដំណើរ ជាពិសេសនៅពេលមេឃភ្លៀងពិបាកមើលផ្លូវ ជិះម៉ូតូធ្លាក់ជង្ហុកបណ្តាលដួលជាញឹកញាប់ ហើយបានលើកជាសំណើរស្នើសុំឲ្យស្ថាប័នពាក់ព័ន្ធចុះពិនិត្យ និងជួសជុលកែលម្អ​ផ្លូវនេះឡើងវិញ ដើម្បីកាត់បន្ថយគ្រោះថ្នាក់ចរាចរណ៍ និងការធ្វើដំណើរកាន់តែមានភាពងាយស្រួល។

ឆ្លើយតបការលើកឡើងរបស់ពលរដ្ឋ លោក លឹម ជាវហាវ ប្រធានមន្ទីរអភិវឌ្ឍន៍ជនបទខេត្តក្រចេះ បានឲ្យដឹងនៅរសៀលថ្ងៃទី ៤ ខែមិថុនា ឆ្នាំ២០២៦ នេះថា បញ្ហាផ្លូវខូចខាត​នេះ ដោយសារតែអាយុកាលប្រើប្រាស់យូរឆ្នាំ និងការដឹកជញ្ជូនធ្ងន់ៗដូចជា ខ្សាច់ ដី គ្រួស និងស្រូវ ខណៈ​មន្ទីរ​​មិនទាន់មានថវិកាសម្រាប់ថែទាំខួបនៅឡើយ។

លោកថា ផ្លូវនេះសាងសង់តាំងពីមុនការបោះឆ្នោតឆ្នាំ ២០២២ ហើយបច្ចុប្បន្នបានដល់ដំណាក់កាលចាំបាច់ត្រូវថែទាំខួប ដែលតម្រូវឲ្យកាយផ្ទៃផ្លូវ និង​បង្ហាប់​ដីឡើងវិញ។ ប៉ុន្តែដោយសារកង្វះថវិកា អាជ្ញាធរ​អាចធ្វើបានត្រឹមតែការថែទាំប្រចាំដោយជួសជុលលក្ខណៈតូចតាចប៉ុណ្ណោះ។

លោកបានបន្តថា៖ «អាហ្នឹងបើតាមចិត្តខ្ញុំ ដើម្បីអាចស៊ូទ្រាំជាមួយការដឹកខ្សាច់ ប្រសិនបើមានថវិកាគ្រប់គ្រាន់ ត្រូវ​កសាងជា​ផ្លូវបេតុង ឬយ៉ាងហោចណាស់ត្រូវស្រោចស្រទាប់ DBST បន្ថែម ព្រោះបច្ចុប្បន្នផ្លូវនេះជាផ្លូវ DBST ថ្នាក់ជនបទ ដែលមិនអាចទប់ទល់នឹងរថយន្តធុនធ្ងន់បានយូរអង្វែង​ឡើយ»។

លោកបន្ត​ថទៀត​ថា «ឥឡូវរថន្ត​ដឹកធ្ងន់​អត់​ដឹកតាមផ្លូវភ្លោះ នាំគ្នាទៅតាមផ្លូវហ្នឹងទាំងអស់ ទើប​ធ្វើ​ឲ្យ​ស្ថានភាព​ផ្លូវ​កាន់តែទ្រុឌទ្រោមពីមួយថ្ងៃទៅមួយថ្ងៃ»។

លោក លឹម ជាវហាវ ប្រធានមន្ទីរអភិវឌ្ឍន៍ជនបទខេត្តក្រចេះបានបញ្ជាក់ថា ផ្លូវខាងលើស្ថិតក្នុងការទទួលខុសត្រូវរបស់មន្ទីរអភិវឌ្ឍន៍ជនបទ ដោយ​​រង់ចាំថវិកាសម្រាប់ថែទាំខួបបន្ថែមទៀត ខណៈ​បច្ចុប្បន្នក្រុមការងារកំពុងព្យាយាមជួសជុលតាមដែលអាចធ្វើទៅបាន ​ឧបសគ្គគឺការខ្វះជាងជំនាញ​ជួសជុលគ្រឿងចក្រធំៗ ដែល​​ត្រូវរកជាងជំនាញ​មកពីរាជធានីភ្នំពេញ ​៕

អត្ថបទ:ប្រុញ វិធិន