ព័ត៌មានជាតិ

ក្រសួងហាមមិនឲ្យរោងចក្រភ្ជាប់លក្ខខណ្ឌការចាក់វ៉ាក់សាំងពេលបើកដំណើរការឡើងវិញ

បានផុស

៤ years មុន

នៅ

ថ្ងៃសៅរ៍ ៨ ឧសភា ២០២១

ដោយ

ក្រសួងការងារនិងបណ្តុះបណ្តាលវិជ្ជាជីវៈបានហាមមិនឲ្យរោងចក្រសហគ្រាស ដែលនឹងបើកដំណើរការសកម្មភាពអាជីវកម្ម និងផលិតកម្មឡើងវិញភ្ជាប់លក្ខខណ្ឌការចាក់វ៉ាក់សាំងចំពោះកម្មករនិយោជិតឡើយ។

យោងតាមសេចក្តីជូនដំណឹងរបស់ក្រសួងការងារចុះថ្ងៃទី០៨ ខែឧសភា បានណែនាំដល់ម្ចាស់ ឬនាយករោងចក្រសហគ្រាស និងបងប្អូនកម្មករនិយោជិតដែលស្ថិតនៅក្នុងតំបន់លឿង នៃភូមិសាស្ត្ររាជធានីភ្នំពេញ និងក្រុងតាខ្មៅខេត្តកណ្ដាល ហើយបើកដំណើរការអាជីវកម្មប្រតិកម្មឡើងវិញឲ្យបានជ្រាបថា នៅក្នុងការបើកដំណើរការសកម្មភាពអាជីវកម្មផលិតកម្មឡើងវិញនេះ គឺមិនត្រូវមានភ្ជាប់លក្ខខណ្ឌទៅនឹងការចាក់វ៉ាក់សាំងនៅឡើយ។

ក្រសួងបានបន្តថា មន្ត្រីអធិការកិច្ចការងារនៃក្រសួងការងារនិងបណ្ដុះបណ្ដាលវិជ្ជាជីវៈ នឹងចុះធ្វើអធិការកិច្ចលើករណីនេះភ្លាម ប្រសិនជាទទួលបានព័ត៌មាន ហើយសូមបងប្អូនកម្មករនិយោជិតជូនដំណឹងមកក្រសួង ឬមន្ទីរការងារនិងបណ្ដុះបណ្ដាលវិជ្ជាជីវៈជាបន្ទាន់ប្រសិនជាមានការភ្ជាប់លក្ខខណ្ឌចាក់វ៉ាក់សាំងនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងបានបន្តទៀតថា ចំពោះការបើកប្រាក់ឈ្នួលសម្រាប់ខែមេសា ជាមុន៥០ភាគរយ និងប្រាក់ឧបត្ថម្ភនានាដែលបានពន្យារពេលនៅក្នុងអំឡុងពេលនៃការបិទខ្ទប់កន្លងទៅគឺត្រូវចាប់ផ្ដើមបើកជូនបងប្អូនកម្មករនិយោជិតមិនឲ្យហួសពីថ្ងៃទី១៤ខែឧសភាឆ្នាំ២០២១ឡើយ។ រីឯបងប្អូនកម្មករនិយោជិតដែលកំពុងឋិតនៅក្នុងតំបន់ក្រហមតំបន់រឿងទុំគឺសូមឲ្យម្ចាស់ឬនាយករោងចក្រសហគ្រាសពិចារណារកវិធីបើកប្រាក់ឈ្នួលនិងប្រាក់ឧបត្ថម្ភតាមប្រព័ន្ធធនាគារជូនបងប្អូនកម្មករនិយោជិតផងដែរ។

ក្រសួងបានអំពាវនាវដល់ម្ចាស់ផ្ទះជួលទាំងអស់មេត្តាយល់លើកលែងថ្លៃបន្ទប់ជួលបន្ទប់ ឬបន្ធូរបន្ថយថ្លៃបន្ទប់ជួលឬពន្យារពេលការបង់ថ្លៃបន្ទប់ជួលជូនអ្នកជួលដែលជាកម្មករនិយោជិតឲ្យអស់លទ្ធភាពនៅក្នុងស្មារតីមនុស្សធម៌និងសាមគ្គីភាពនៅក្នុងដំណាក់ការនេះ។

ក្រសួងមានសេចក្តីជឿជាក់ថាម្ចាស់ឬនាយករោងចក្រសហគ្រាសកម្មករនិយោជិត និងម្ចាស់ផ្ទះជួលនិងអនុវត្តតាមសេចក្តីជូនដំណឹងនេះប្រកបដោយប្រសិទ្ធភាពខ្ពស់៕

អត្ថបទ ៖ សំអឿន

Related Topics: