តើវីរុសបំប្លែងខ្លួន​ Mu ជាអ្វី ហើយគួរឲ្យព្រួយបារម្ភប៉ុនណាទៅ?

អង្គការសុខភាពពិភពលោកបាននិយាយថា ខ្លួនកំពុងឃ្លាំមើលវីរុសកូវីដ១៩បំប្លែងថ្មី ត្រូវបានគេស្គាល់ឈ្មោះថា Mu ដែលរកឃើញដំបូងនៅក្នុងប្រទេសកូឡុំប៊ី កាលពីខែមករា។

តើវីរុសកូវីដ-១៩បំប្លែងខ្លួនប្រភេទ Mu គឺជាអ្វី?

វីរុសបំប្លែងខ្លួន Mu ឬ B.1.621 ត្រូវបានអង្គការសុខភាពពិភពលោក ដាក់បញ្ចូលទៅក្នុងបញ្ជីវីរុសគួរឲ្យចាប់អារម្មណ៍ កាលពីប៉ុន្មានថ្ងៃថ្មីៗនេះ។ វាមានដើមកំណើតនៅប្រទេសកូឡុំប៊ី ហើយបច្ចុប្បន្ន វីរុសនេះបានពង្រីកការឆ្លង៣៩ភាគរយនៅទីនោះ។ WHO កំពុងឃ្លាំមើលវីរុសនេះ ដោយសារតែភស្តុតាងថ្មីៗបានបង្ហាញថា វាអាចគេចផុតពីប្រព័ន្ធភាពស៊ាំដែលផ្តល់ដោយវ៉ាក់សាំងនិងអង់ទីគ័រ។

ការធ្វើបច្ចុប្បន្នភាពប្រចាំសប្តាហ៍របស់ WHO បាននិយាយថា ទិន្នន័យដំបូងបង្ហាញពីការថយចុះសមត្ថភាពវ៉ាក់សាំង ស្រដៀងនឹងអ្វីដែលគេបានឃើញលើវីរុសបំប្លែងខ្លួន Beta ដែរ។ ទោះបីជាយ៉ាងណាក៏ដោយ WHO និយាយថា ការសិក្សាបន្ថែមគឺត្រូវការជាចាំបាច់ដើម្បីបញ្ជាក់ពីភាពស្រដៀងគ្នា ជាមួយវីរុសបំប្លែងខ្លួនអាហ្វ្រិកខាងត្បូង។

តើយើងគួរព្រួយបារម្ភប៉ុនណា?

លោកវេជ្ជបណ្ឌិត Cillian de Gascun ប្រធានមន្ទីរពិសោធន៍មេរោគជាតិ បាននិយាយកាលពីចុងសប្តាហ៍ថា “គ្មានការលើកឡើងពិតប្រាកដថា វីរុសនេះនឹងមានសមត្ថភាពអាចប្រកួតប្រជែងជាមួយវីរុសបំប្លែងខ្លួន Delta បានទេនៅដំណាក់កាលនេះ”។

លោកបានចង្អុលទៅការសិក្សាកម្អិតដែលធ្វើឡើងដោយសេវាសុខភាពសាធារណៈអង់គ្លេស ​ដែលបានរកឃើញថា វាហាក់ដូចជាមិនទំនងថា​ វីរុសនេះអាចឆ្លងសាហាវជាង Delta ទេ។

ការសិក្សានេះ បានកត់សម្គាល់ភាពស្រដៀងគ្នារវាងវីរុសនេះនិងវីរុស Beta ប៉ុន្តែនិយាយថា កម្រិតនៃការគំរាមកំហែងនឹងអាស្រ័យលើការលូតលាស់និងការពង្រីករបស់វា៕

ប្រែសម្រួល៖ Vann Vann

ប្រភព៖ Irish Examiner

ចុចអាន៖ WHO កំពុងតាមដានវីរុសបំប្លែងខ្លួនថ្មីឈ្មោះ Mu ដែលធន់វ៉ាក់សាំង និងអាចគេចប្រព័ន្ធភាពស៊ាំ