WHO កំពុងតាមដានវីរុសបំប្លែងខ្លួនថ្មីឈ្មោះ Mu ដែលធន់វ៉ាក់សាំង និងអាចគេចប្រព័ន្ធភាពស៊ាំ

អង្គការសុខភាពពិភពលោកបាននិយាយថា ខ្លួនកំពុងឃ្លាំមើលវីរុសកូវីដ១៩បំប្លែងថ្មី ត្រូវបានគេស្គាល់ឈ្មោះថា Mu ដែលរកឃើញដំបូងនៅក្នុងប្រទេសកូឡុំប៊ី កាលពីខែមករា។

នៅក្នុងព្រឹត្តិបត្ររោគរាតត្បាតប្រចាំសប្តាហ៍របស់ខ្លួន ស្ថាប័នសុខភាពជាសកលមួយនេះ បានលើកឡើងកាលពីថ្ងៃអង្គារទី៣១ខែសីហាថា Mu ឬមានឈ្មោះវិទ្យាសាស្រ្តថា B.1.621 ត្រូវបានចាត់ថ្នាក់ជា “វីរុសបំប្លែងខ្លួនគួរឲ្យចាប់អារម្មណ៍”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

WHO និយាយថា វីរុសនេះមានធាតុបំប្លែងដែលបង្ហាញពីហានិភ័យ នៃភាពធន់នឹងវ៉ាក់សាំង និងគេចប្រព័ន្ធភាពស៊ាំ ហើយបានសង្កត់ធ្ងន់ថា ការសិក្សាបន្ថែមទៀត គឺត្រូវការជាចាំបាច់ដើម្បីស្វែងយល់ឲ្យកាន់តែច្បាស់អំពីវីរុសនេះ។

មានក្តីព្រួយបារម្ភយ៉ាងខ្លាំង ចំពោះការលេចឡើងនៃវីរុសបំប្លែងខ្លួនថ្មីៗ ខណៈអត្រាឆ្លងបានកើនឡើងនៅទូទាំងពិភពលោកជាថ្មីម្តងទៀត ស្របពេលវីរុស Delta កំពុងវាយប្រហារ ជាពិសេសក្នុងចំណោមអ្នកមិនចាក់វ៉ាក់សាំង និងនៅក្នុងតំបន់ដែលដកវិធានការប្រឆាំងវីរុស។

បច្ចុប្បន្ន WHO បានកំណត់អត្តសញ្ញាណវីរុសបំប្លែងខ្លួនគួរឲ្យព្រួយបារម្ភ ចំនួន៤រួមមានទាំង Alpha ដែលមានវត្តមាននៅក្នុងប្រទេសចំនួន ១៩៣ និង Delta ដែលមានវត្តមាននៅក្នុងប្រទេសចំនួន ១៧០ ផងដែរ។

បន្ទាប់ពីត្រូវបានគេរកឃើញនៅក្នុងប្រទេសកូឡុំប៊ី វីរុសបំប្លែង Mu ត្រូវបានគេរាយការណ៍នៅក្នុងបណ្តាប្រទេសអាមេរិកខាងត្បូងផ្សេងទៀតនិងនៅអឺរ៉ុប៕

ប្រែសម្រួល៖ Vann Vann

ប្រភព៖ CNA

ចុចអាន៖ ឥណ្ឌាផ្ទុះជំងឺ គ្រុនអាថ៌កំបាំង សម្លាប់ភាគច្រើនជាកុមារ