លួចមើលគេងូតទឹកក្នុងបន្ទប់ ឆ្លងចរន្ដភ្លើងឆក់ស្លាប់ពេលបញ្ជូនដល់មន្ទីរពេទ្យ

សមត្ថកិច្ចបានឲ្យដឹងថា កម្មករលាងរថយន្តម្នាក់បានឡើងលើបន្ទប់ទឹកលួចមើលគេងូតទឹកបណ្តាលឲ្យឆក់ខ្សែភ្លើងស្លាប់ ពេលបញ្ជូនជូនដល់មន្ទីរពេទ្យ។

ហេតុការណ៍នេះបានកើតឡើងកាលពីវេលាម៉ោង១៨និង០០នាទីថ្ងៃទី០២ ខែមេសា ឆ្នាំ២០២២ នៅចំណុចក្រោយសណ្ឋាគារអង្គរអេរ៉ា ទីកន្លែងលាងរថយន្ដយីហោ P.S CAR WASH(ភី.អេស មជ្ឍមណ្ឌលថែទំា និងសំអាតរថយន្ត) ភូមិខ្នារ សង្កាត់ជ្រាវ ក្រុងសៀមរាប។

សមត្ថកិច្ចបន្តឲ្យដឹងថា សពជនរងគ្រោះឈ្មោះ ទុយ តាន ភេទប្រុស អាយុ១៧ឆ្នាំ​ មុខរបរកម្មករលាងរថយន្ដ​នៅចំណុចកើត​​ហេតុខាង​លើ។​​​

សមត្ថកិច្ចបន្ថែមថា យោងតាមការបំភ្លឺមិត្តរួមការងាររបស់សាកសពបានរៀបរាប់ប្រាប់សមត្ថកិច្ចថា នៅថ្ងៃកើតហេតុ មេឃភ្លៀងពេញ០១ថ្ងៃ គ្មានភ្ញៀវចូលមកលាងឡានទេ លុះល្ងាចឡើងម៉ោងប្រហែល១៧និង០០នាទី ឈ្មោះ ទុយ តាន(សាកសព)​បានប្រលែងគ្នាលេងជា​មួយ​ឈ្មោះ ផល ភា បានមួយសន្ទុះឈ្មោះ ផល ភា ក៏ចូលងូតទឹកក្នុងបន្ទប់ទឹក ដោយឡែកឈ្មោះ ទុយ តាន ដែលជាមនុស្សចូលចិត្តលេង​ច្រើនចេះតែបន្តលេងដោយយកកាទឹកដងទឹកពីចានដែកនៅខាងក្រៅជះដាក់ឈ្មោះ ផល ភា​ ដែលកំពុងងូតទឹកនៅខាងក្នុងបន្ទប់​ជាច្រើន​សារ ​លេងជះទឹកមិនអស់ចិត្ត ឈ្មោះ ទុយ តាន បានឡើងតាមជញ្ជំាងបន្ទប់ទឹក(ទ្វារមុខ) លូនក្បាលនិងដងខ្លួនចូលទៅក្នុងបន្ទប់ទឹក​ក្នុងគោលបំណងមើលឈ្មោះ ផល ភា ងូតទឹក ក៏ប៉ះនឹងអំពូលភ្លើងនៅក្នុងបន្ទប់ទឹកធ្លាក់មកក្រោម​សល់តែជើងអំពូលទើប​បណ្ដាល​ឲ្យ​ឆក់ភ្លាមៗ។ សាកសពមិនបានស្លាប់នៅកន្លែងកើតហេតុទេ គឺស្លាប់ពេល​យកទៅដល់មន្ទីរពេទ្យបង្អែកខេត្តសៀមរាប។​

សមត្ថកិច្ចបញ្ជាក់ទៀតថា តាមការសន្និដ្ឋានយោងតាមការបំភ្លឺពីមិត្តរួមការងារ និងការពិនិត្យកន្លែងកើតហេតុ ការពិនិត្យសាកសព និង​ផ្អែកតាមការបញ្ជាក់ពីលោកគ្រូពេទ្យកោសល្យវិច័យ សាកសពស្លាប់ដោយសារឆក់ខ្សែភ្លើង។ បន្ទាប់ពីសមត្ថកិច្ចពិនិត្យសាកសពរួច​ក៏បានប្រគល់​ជូនក្រុមគ្រួសារ​យកទៅធ្វើបុណ្យតាមប្រពៃណី៕

អត្ថបទ៖ កុសល