ព័ត៌មានអន្ដរជាតិ

ធ្លាក់យន្តហោះឯកជនមួយនៅអាមេរិក បណ្តាលឱ្យមនុស្សក្នុងយន្តហោះ ស្លាប់ទាំងអស់

បានផុស

១៧ នាទី មុន

នៅ

ថ្ងៃចន្ទ ១៥ មិថុនា ២០២៦

ដោយ

អាជ្ញាធរក្នុងស្រុក បានលើកឡើងថា យន្តហោះមួយគ្រឿងមានអ្នកបើកបរម្នាក់ និងអ្នកដំណើរចំនួន ១១នាក់ កំពុងលោតឆ័ត្រយោង នៅរដ្ឋ Missouri សហរដ្ឋអាមេរិក បានធ្លាក់ចូលទៅក្នុងវាលស្រែមួយ ហើយឆាបឆេះសន្ធោសន្ធៅនៅថ្ងៃអាទិត្យ បណ្តាលឱ្យមនុស្សទាំងអស់នៅលើយន្តហោះស្លាប់។

យោងតាមភ្នាក់ងារសារព័ត៌មាន AP ផ្សាយថ្ងៃទី១៥ ខែមិថុនា ឆ្នាំ២០២៦ ការធ្លាក់យន្តហោះនេះបានកើតឡើងភ្លាមៗ បន្ទាប់ពីយន្តហោះនោះ ហោះពីអាកាសយានដ្ឋានក្នុងស្រុកមួយ នៅម៉ោងប្រហែល ១១:៣០ព្រឹក។ នេះបើតាមសម្តីរបស់ លោក Chad Anderson អធិការស្រុក Bates ។

ធ្លាក់យន្តហោះនៅរដ្ឋ Missouri ។ រូបភាព៖ BE

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Anderson និយាយថា ក្រុមការងារ និងអ្នកស្ម័គ្រចិត្តបានទៅកន្លែងកើតហេតុ ជួយសាច់ញាតិ ហើយមន្ត្រីកំពុងធ្វើការនៅរសៀលថ្ងៃអាទិត្យ ដើម្បីកំណត់អត្តសញ្ញាណជនរងគ្រោះទាំងអស់ និងជូនដំណឹងដល់សាច់ញាតិជិតស្និទ្ធរបស់ពួកគេ។

ដោយឡែក លោក Dennis Jacobs អ្នកគ្រប់គ្រងអាកាសយានដ្ឋានស្តីទី និងជានាយកទីភ្នាក់ងារគ្រប់គ្រងគ្រោះមហន្តរាយនៅស្រុក Bates និយាយថា យន្តហោះឯកជននេះត្រូវបានដំណើរការដោយក្រុមហ៊ុន Skydive Kansas City ។ វាត្រូវបានកំណត់ថាជាយន្តហោះម៉ាស៊ីនតែមួយ។

លោក Jacobs និយាយថា៖ « វាទើបតែហោះឡើង ហើយបត់ឆ្វេងមុនពេលធ្លាក់។ តាមគំនិតរបស់ខ្ញុំ ខ្ញុំគិតថាវាកំពុងបាត់បង់ថាមពល កំពុងព្យាយាមហោះឡើងទៅកាន់ផ្លូវហាយវេ បន្ទាប់មកក៏ចុះចត ហើយជាប់គាំង បន្ទាប់មកទៀតវាធ្លាក់ ហើយឆេះ»។

លោក Jacobs និយាយថា៖ « ក្រុមអ្នកឆ្លើយតបបន្ទាន់បានពន្លត់ភ្លើង នៅក្នុងគំនរបាក់បែកភ្លាមៗ បន្ទាប់ពីការធ្លាក់យន្តហោះដ៏ឃោរឃៅ។ ក្រុមអ្នកឆ្លើយតបដំបូងក៏បានពិនិត្យមើលតំបន់ក្រោមផ្លូវហោះហើរ ហើយមិនបានរកឃើញនរណាម្នាក់បានព្យាយាមលោតចេញមុនពេលយន្តហោះធ្លាក់ចុះនោះទេ»។

គួរបញ្ជាក់ថា យន្តហោះ Pacific Aerospace 750XL ដែលបានធ្លាក់គឺជាម៉ូដែលមួយ មានប្រជាប្រិយភាពសម្រាប់ការលោតឆ័ត្រយោង ហើយក៏មានប្រយោជន៍សម្រាប់ដឹកជញ្ជូនទំនិញ និងការហោះហើរជម្លៀសអ្នកជំងឺផងដែរ។

យោងតាមក្រុមហ៊ុនផលិត យន្តហោះនេះអាចផ្ទុកទម្ងន់បានជាង ១ ៨០០គីឡូក្រាម មានសមត្ថភាពហោះឡើង និងចុះចតនៅលើផ្លូវរត់ខ្លីៗ៕

សម្រួល៖ ណឺ មិនា