លោក អ៊ុក រី ជូនដំណឹងចុងក្រោយឱ្យប្រធានគ្រប់ផ្នែកក្រុមហ៊ុនអ៊ិនធើណេត Opennet ចូលរួមប្រជុំបន្ទាន់

(ភ្នំពេញ)៖ លោក អ៊ុក រី អភិបាលបណ្តោះអាសន្ន នៃកូនបំណុលក្រុមហ៊ុន King Technologies Co.,Ltd (Opennet) ដែលតែងតាំងឡើងដោយតុលាការ បានធ្វើការប្រកាសជាលើកចុងក្រោយឱ្យនាយកប្រតិបត្តិ ប្រធានសាខា និងប្រធានគ្រប់ផ្នែកទាំងអស់របស់ក្រុមហ៊ុន King Technologies Co., Ltd (Opennet) ចូលរួមកិច្ចប្រជុំនៅថ្ងៃទី០៦ ខែមេសា ឆ្នាំ២០២២ វេលាម៉ោង០២រសៀល ជាកំហិត នៅទីស្នាក់ការកណ្តាលរបស់ក្រុមហ៊ុនមានអាស័យដ្ឋានស្ថិតនៅផ្ទះលេខ៤៩ ផ្លូវ៣០៦ សង្កាត់បឹងកេងកង១ ខណ្ឌចំការមន រាជធានីភ្នំពេញ ជាកំហិត។ នេះបើយោងតាមសេចក្តីជូនដំណឹងចុងក្រោយចុះថ្ងៃអង្គារ ទី៥ ខែមេសានេះ។

ការប្រកាសជាថ្មី និងជាលើកចុងក្រោយឱ្យចូលរួមកិច្ចប្រជុំបន្ទាន់ខាងលើនេះ គឺធ្វើឡើងបន្ទាប់ពីនាយកប្រតិបត្តិ ប្រធានសាខា និងប្រធានគ្រប់ផ្នែកទាំងអស់របស់ក្រុមហ៊ុន King Technologies Co., Ltd (Opennet) មិនបានចូលរួមកិច្ចប្រជុំដែលគ្រោងធ្វើនៅថ្ងៃទី០៤ ខែមេសា ឆ្នាំ២០២២ តាមការអញ្ជើញរបស់អភិបាលបណ្តោះអាសន្ននោះទេ។ លោក អ៊ុក រី បានបញ្ជាក់នៅក្នុងលិខិតនេះថា «លោក លោកស្រី មិនបានចូលរួមតាមការកោះប្រជុំនោះទេ និងនៅតែបន្តគេចវេស»។

ត្រង់ចំណុចនេះ លោក បានគូសបញ្ជាក់ថា «ជាការកត់សម្គាល់ សកម្មភាពរបស់លោក លោកស្រី ដែលមិនព្រមសហការ និងចូលរួមកិច្ចប្រជុំជាមួយអភិបាលបណ្តោះអាសន្ន បានធ្វើឱ្យប៉ះពាល់យ៉ាងខ្លាំងដល់ផលប្រយោជន៍ម្ចាស់បំណុល និងដំណើរការនីតិវិធីរបស់តុលាការ»។

បើតាមលោក អ៊ុក រី «ក្នុងករណី លោក លោកស្រី នៅតែមិនផ្តល់កិច្ចសហការមិនចូលរួមកិច្ចប្រជុំតាមកោះអញ្ជើញ របស់អភិបាលបណ្តោះអាសន្ននោះទេ លោក លោកស្រី ត្រូវទទួលខុសត្រូវចំពោះការខូចខាត ដែលកើតឡើងដោយសារការមិនព្រមសហការជាមួយអភិបាលបណ្តោះអាសន្ន (មន្រ្តីតុលាការ) អនុលោមតាមច្បាប់ជាធរមាន»៕