សម្ដេចតេជោ ៖ ការងារអាទិភាពដែលកម្ពុជា-វៀតណាមគួរធ្វើនោះ គឺជំរុញកិច្ចសហប្រតិបត្តិការរវាងខេត្ត និងខេត្តតាមព្រំដែនឲ្យបានល្អ

សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រី បានលើកឡើងថា ការងារជាអាទិភាព ដែលប្រទេសកម្ពុជា និងវៀតណាម គួរធ្វើនោះគឺជំរុញកិច្ចសហប្រតិបត្តិការរវាងខេត្ត និងខេត្តតាមព្រំដែនឲ្យបានល្អ ជាពិសេសបញ្ហាសន្តិសុខ សម្រួលដោះស្រាយលំហូរទំនិញ និងសម្រួលការធ្វើពាណិជ្ជកម្ម ជាដើម។

ការលើកឡើងខាងលើនេះ គ្រាដែលសម្ដេចតេជោ ហ៊ុន សែន បានអនុញ្ញាតឲ្យលោក វ៉ូ វ៉ាន់ធឿង សមាជិកការិយាល័យនយោបាយ និងជាលេខាធិការអចិន្ត្រៃយ៍នៃគណលេខាមជ្ឈិមបក្សកុម្មុយនិស្តវៀតណាម ចូលជួបសម្ដែងការគួរសម និងពិភាក្សាការងារ នៅព្រឹកថ្ងៃទី ១៨ ខែតុលា ឆ្នាំ ២០២២នេះ នៅវិមាន ៧មករា នាទីស្នាក់ការកណ្ដាលគណបក្សប្រជាជន​កម្ពុជា។

នៅក្នុងជំនួបនេះលោក វ៉ូ វ៉ាន់ធឿង បាននាំយកនូវការផ្ដាំផ្ញើសួរសុខទុក្ខ ពីសំណាក់ថ្នាក់ដឹកនាំវៀតណាម ជូនចំពោះសម្ដេចតេជោ និងបានវាយតម្លៃខ្ពស់ចំពោះការរីកចម្រើន ការអភិវឌ្ឍរបស់ប្រទេសកម្ពុជា។

លោកបានជម្រាបជូនសម្ដេចតេជោថា លោក និងគណៈប្រតិភូ អញ្ជើញមកកាន់ប្រទេសកម្ពុជានាពេលនេះ គឺស្របពេលខួបលើកទី ៥៥ឆ្នាំ នៃទំនាក់ទំនងការទូតរវាងកម្ពុជា និងវៀតណាមផង និងខួបលើកទី ៤៥ឆ្នាំ នៃដំណើរឆ្ពោះទៅរកការផ្ដួលរំលំ របបប្រល័យពូជសាសន៍ ប៉ុល ពត ផង។ ទិសដៅសំខាន់របស់លោក វ៉ូ វ៉ាន់ធឿង និងគណៈប្រតិភូទាំងមូល គឺធ្វើយ៉ាងណាជំរុញ ពង្រឹង និងពង្រីក ទំនាក់ទំនងរវាងបក្ស និងបក្ស និងរវាងប្រទេសទាំងពីរ ឲ្យបានកាន់តែខ្លាំងក្លាថែមទៀត។

ក្នុងន័យនេះ លោកបានគោរពស្នើសុំគោលការណ៍ពីសម្ដេចតេជោ ហ៊ុន សែន ដែលទីមួយ ជំរុញទំនាក់ទំនងរវាងបក្ស និងបក្ស ឲ្យកាន់តែស៊ីជម្រៅ និងមានភាពជាក់ស្ដែង។ ទីពីរ ជំរុញការផ្លាស់ប្ដូរទស្សនកិច្ចរវាងថ្នាក់ដឹកនាំរបស់បក្សទាំងពីរ។ ទីបីរ ជំរុញទំនាក់ទំនងរវាងខេត្ត និងរាជធានី របស់ប្រទេសទាំងពីរ។ ទីបួន ជំរុញកិច្ចសហប្រតិបត្តិការលើវិស័យការពារជាតិ និងសន្តិសុខ។ ទីប្រាំ ជំរុញកិច្ចសហប្រតិបត្តិការវិនិយោគ និងពាណិជ្ជកម្ម។ និងទីប្រាំមួយ ជំរុញកិច្ចសហប្រតិបត្តិការ លើក្របខ័ណ្ឌតំបន់​ និងពិភពលោក។

ជាការឆ្លើយតប សម្ដេចតេជោ ហ៊ុន សែន បានថ្លែងអំណរគុណជូនចំពោះលោក វ៉ូ វ៉ាន់ធឿង ដែលបាននាំយកនូវការផ្ដាំផ្ញើសួរសុខទុក្ខ ពីសំណាក់ថ្នាក់ដឹកនាំវៀតណាម ជូនចំពោះសម្ដេច ហើយបានគាំទ្រចំពោះសំណើទាំង ៦ចំណុចរបស់លោក។

សម្ដេចតេជោ ហ៊ុន សែន មានប្រសាសន៍ថា ការងារជាអាទិភាពរវាងប្រទេសទាំងពីរ គឺជំរុញកិច្ចសហប្រតិបត្តិការរវាងខេត្ត និងខេត្តតាមព្រំដែនឲ្យបានល្អបំផុត ជាពិសេសបញ្ហាសន្តិសុខ សម្រួលដោះស្រាយលំហូរទំនិញ សម្រួ​លការធ្វើពាណិជ្ជកម្ម និងទប់ស្កាត់អំពើខុសច្បាប់ ដូចជាការជួញដូររត់ពន្ធគ្រឿងញៀន និងរត់ពន្ធមនុស្សជាដើម៕

អត្ថបទ៖ ឃួន សុភ័ក្រ