ប៉ះប៉ូឡូញយប់មិញ កីឡាករបារាំង Kounde ពាក់ខ្សែ ក ចូលលេង តើ FIFA ពិន័យដែរឬទេ?

ការប្រកួតរវាងក្រុមបាល់ទាត់ជម្រើសជាតិមាន់គកបារាំងជាមួយនឹងប៉ូឡូញវគ្គ ១៦ ក្រុមចុងក្រោយក្នុងព្រឹត្តិការណ៍បាល់ទាត់ពិភពលោក FIFA World Cup កាលពីយប់ថ្ងៃអាទិត្យ មានរឿងដ៏ហួសចិត្តមួយបានកើតឡើងសម្រាប់ខ្សែការពារបារាំង Jules Kounde ។

ខ្សែការពារពាក់លេខ ៥ របស់បារាំងរូបនេះបានពាក់ខ្សែ ក ចំនួន ២ ខ្សែចូលប្រកួតក្នុងទីលាន Al Thumama ក្នុងជ័យជម្នះ ៣-១ លើប៉ូឡូញ ខណៈរហូតទាល់តែនាទីទី៤១ ទើបលោកអាជ្ញាកណ្ដាល Jesus Valenzuela មើលឃើញ ហើយឲ្យដោះវាចេញ ។

ក្រោយមកក្រុមការងាររបស់បារាំងមួយរូបបានទៅជួយដោះខ្សែ ក ឲ្យ Kounde ដោយសារតែ​ការ​ពាក់​គ្រឿងអលង្ការ អំឡុងពេលប្រកួត ​គឺ​ខុស​នឹង​ច្បាប់​សម្រាប់​ហេតុផល​សុវត្ថិភាព ។

ច្បាប់របស់ក្រុមប្រឹក្សាសមាគមបាល់ទាត់អន្តរជាតិ (IFAB) បាននិយាយថា “វត្ថុ ឬគ្រឿងអលង្ការដូចជា ខ្សែ ក, ចិញ្ចៀន, កងដៃ, ក្រវិល, ខ្សែដៃស្បែក ឬជ័រ ត្រូវបានហាមឃាត់ និងតម្រូវឲ្យដោះចេញផងដែរ ហើយមន្ត្រីអាជ្ញាកណ្ដាល ក៏ដូចជាអ្នករៀបចំការប្រកួតត្រូវតែត្រួតពិនិត្យទាំងកីឡាករចូលប្រកួត និងកីឡាករបម្រុង មុនពេលពួកគេចូលទីលានប្រកួត” ។

ទន្ទឹមនោះ Kounde នឹង​មិន​ប្រឈម​ការពិន័យណាមួយពី FIFA នោះទេ ពាក់ព័ន្ធនឹងការពាក់ខ្សែ ក នេះ ដោយសារតែខ្សែការពារបារាំងរូបនេះធ្វើតាមសំណើររបស់​អាជ្ញាកណ្តាល​ក្នុងការដោះវាចេញ ។ ទោះយ៉ាងណា ប្រសិនបើ Kounde បន្តពាក់ខ្សែ ក នៅក្នុងការប្រកួតក្រោយទៀតនៅ World Cup, ខ្សែការពាររូបនេះអាចប្រឈមនឹងការពិន័យកាតលឿង ៕

ប្រែសម្រួលដោយ ៖ ជីវ័ន្ត

ប្រភព ៖ Goal