ផ្លូវថ្មីភ្ជាប់ពីភ្នំបូកគោ ឆ្ពោះទៅផ្លូវជាតិលេខ៤ ស្ថាបនាសម្រេចបាន ៣០ភាគរយហើយ

គិតមកដល់ថ្ងៃទី ១៤ ខែ ធ្នូនេះ ការស្ថាបនាបើកផ្លូវពីកំពូលភ្នំបូកគោ ឆ្ពោះទៅផ្លូវជាតិលេខ៤ សម្រេចបានប្រមាណ ៣០ភាគរយហើយ ពោលគឺស្មើនឹងជាង ២០គីឡូម៉ែត្រ។ នេះបើតាមការបញ្ជាក់របស់របស់លោក កែវ សិទ្ធិ នាយកផ្នែកលក់ និងទីផ្សារសុខាគ្រុប។

​លោក កែវ សិទ្ធិ បានបន្តថា ក្រុមការងារការដ្ឋាន កំពុងសម្រុកធ្វើខ្លាំងក្នុងការឈូសឆាយបើកផ្លូវនេះ។ លោកបន្ថែមថា នៅក្នុងកិច្ចការងារនេះ មានផលលំបាកច្រើន ដោយសារស្ថានភាពផ្លូវលើភ្នំសម្បូរព្រៃ និងជ្រលង កន្លែងខ្លះត្រូវចាក់​បំពេញដី និងថ្ម ហើយកន្លែងខ្លះទៀត ត្រូវបំផ្ទុះដើម្បីកាយថ្មបើកផ្លូវ។ ទោះយ៉ាងណា លោកថា ក្រុមការងារនឹង​ពន្លឿនការស្ថាបនាផ្លូវនេះ។

ការអភិវឌ្ឍគម្រោងនេះ តបតាមប្រសាសន៍របស់សម្តេចនាយករដ្ឋមន្រ្តី កាលពីថ្ងៃទី ១៨ ខែធ្នូ ឆ្នាំ២០២១ ដោយឱ្យលោក ជា សុផារ៉ា រដ្ឋមន្រ្តីក្រសួងរៀបចំដែនដី សម្របសម្រួលជាមួយអ្នកឧកញ៉ា សុខ គង់ និងអ្នកឧកញ៉ា ម៉ុង ឬទ្ធី ធ្វើផ្លូវថ្មីមួយខ្សែប្រវែង២៧ គីឡូម៉ែត្រ តភ្ជាប់ពីផ្លូវជាតិលេខ៤ ត្រង់គីឡូម៉ែត្រលេខ១៥៨+២០០ ឆ្ពោះទៅភ្នំបូកគោ ឆ្លងកាត់​តាមដីសម្បទានសេដ្ឋកិច្ចចំការដូងប្រេង។

ក្នុងនោះ អ្នកឧកញ៉ា សុខ គង់ ទទួលរ៉ាប់រងការចំណាយស្ថាបនាផ្លូវ ហើយអ្នកឧកញ៉ា ម៉ុង ឬទ្ធី ជួយឈូសឆាយ​ដើមដូងប្រេង ដើម្បីបើកផ្លូវ។

អ្នកឧញ៉ា សុខ គង់ បានលើកឡើងកន្លងមកថា ការតភ្ជាប់ផ្លូវនេះ អាចរួមចំណែកទាក់ទាញភ្ញៀវទេសចរឱ្យទៅលេង​កម្សាន្តនៅ​ឧទ្យានជាតិព្រះមុនីវង្ស «ភ្នំបូកគោ» កាន់តែច្រើនថែមទៀត និងជួយកំណើនសេដ្ឋកិច្ច តាមរយៈការ​អភិវឌ្ឍគម្រោងសាងសង់នានានៅលើភ្នំផងដែរ៕