កសិករដាំត្រឡាចនៅបន្ទាយមានជ័យ​បានទិន្នផលច្រើន តែតម្លៃធ្លាក់ចុះពាក់កណ្ដាលប្រៀបធៀបឆ្នាំមុន

កសិការដាំដំណាំត្រឡាច​បានឱ្យដឹងថា ទិន្នផលដំណាំត្រឡាចឆ្នាំនេះមានការកើនឡើងច្រើន ប៉ុន្តែ​តម្លៃធ្លាក់ចុះជាងពាក់កណ្ដាលមកនៅត្រឹមតែ ៨០០ រៀល ខណៈតម្លៃលក់ធម្មតាថ្លៃ ២ ០០០ រៀល ក្នុងមួយគីឡូ។

លោក ឡៅ តុលា អាយុ ២៧ឆ្នាំ ជាកសិករដាំត្រឡាចរស់នៅភូមិពង្រ សង្កាត់កំពង់ស្វាយ ​ក្រុងសិរីសោភ័ណ ​ខេត្តបន្ទាយមានជ័យបានឱ្យដឹងថា គ្រួសាររបស់លោកបានប្រកបរបរ​ដាំបន្លែតាំងពីជីតា​លើផ្ទៃដីជាង​មួយហិកតាដោយធ្វើការដាំផ្លាស់ប្តូរដំណាំមួយរដូវទៅមួយរដូវលើការដាំបន្លែនេះស្ថិតនៅជើងភ្នំកងវ៉ាដោយដាំដំណាំបន្លែផ្សេងៗជាប់ជាប្រចាំតាមរដូវរួមមានខ្ទឹមបារាំង ពោត ល្ពៅ ប៉េងបោះត្រប់ជាដើម ដោយចុងឆ្នាំ២០២២ និងដើមឆ្នាំ២០២៣នេះ ក្រោយពីបានដាំដំណាំត្រឡាច​បាននឹងកំពុង​ឱ្យផល​ដែល​មានផលច្រើនដូចដែលកំពុងបេះលក់នេះ។

កសិកររូបនេះបានរៀបរាប់ឱ្យដឹងទៀតថា ផ្លែត្រឡាចឆ្នាំនេះទទួលបានទិន្នផលច្រើន​ជាទីគាប់ចិត្ត តែតម្លៃបានថ្លៃរហូត ៨០០រៀលក្នុងមួយគីឡូ ដែលតម្លៃនេះធ្វើឱ្យកសិករកាត់ថ្លៃចំណាយបានសល់តិចតួចមិនសមនឹងការខិតដាំដុះមើលថែ។ទោះបីជាតម្លៃផ្លាក់ចុះយ៉ាងណាក៍ដោយពួកគាត់នៅតែបន្តដាំព្រោះវាជាមុខរបរទៅហើយ និងម្យ៉ាងទៀតបានដំណាំផ្សេងៗជួយទប់គ្នា។

ចំពោះតម្លៃវិញមិនថាតែផ្លែត្រឡាច ឬក៍បន្លែផ្សេងទេឱ្យតែដល់ពេលប្រមូលផលដឹងតែចុះថោក ការលក់បានពេលប្រមូលផលមានតិចណាស់។ លុះត្រាដំណាំមានបញ្ហាទទួលបានផលតិច ឬបន្លែពីប្រទេសជិតខាងមិនសូវនាំចូលទើបបានតំលៃថ្លៃ។

លោក ប៉ាង វណ្ណាសេដ្ឋ ប្រធានមន្ទីរកសិកម្មខេត្តបន្ទាយមានជ័យ​បានអះអាងថា៖ ​រដូវនេះជា​រដូវរំ​ហើយហេតុដូច្នេះប្រជាកសិករគាត់ដាំបន្លែបង្ការបានផលច្រើនមុខសម្រាប់ខេត្ត​បន្ទាយមាន​ជ័យ​ឆ្នាំនេះតម្លៃបន្លែខ្លះធ្លាក់ចុះ ដូចជាត្រទ្បាចពេលខ្លះកសិករគាត់ដាំច្រើន អ្នកបរិភោគតិច អ្នកទិញ​ក៏តិចអញ្ចឹងការលក់ដូរតម្លៃវាធ្លាក់ចុះទៅតាមនឹងដែរ បន្តែរដូចជាបន្លែខ្លះលក់បានតម្លៃខ្ពស់ជាងដោយអ្នកបរិភោគនិយមហូបចុកច្រើន។

ចំពោះស្រុកដែលមានការដាំដំណាំបន្លែច្រើននៅរដូវនេះ គឺដូចជានៅតំបន់ភ្នំកងវ៉ាក្រុងសិរីសោភ័ណស្រុកមង្គលបូរី ស្រុកព្រះនេត្រព្រះ មានស្រុកជាច្រើន​ទៀតក្នុងខេត្តបន្ទាយមានជ័យយើងនេះ ដែលនៅជិតទីផ្សារតាមស្រុកនីមួយៗ៕

អត្ថបទ៖ អ ពៅ