កីឡា

រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ឧបត្ថម្ភ១ពាន់ដុល្លារដល់ Thiago

បានផុស

៣ years មុន

នៅ

ថ្ងៃសៅរ៍ ៨ មេសា ២០២៣

ដោយ

លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានជួយឧបត្ថម្ភថវិកាចំនួន ១ ០០០ដុល្លារអាមេរិកដល់កីឡាករប្រេស៊ីល Thiago Teixeira បន្ទាប់ពីកីឡាកររូបនេះត្រូវបានស្ថាប័នប្រដាល់មួយថៃពិភពលោកបានដកហូតខ្សែក្រវាត់វិញ ថែមទាំងមិនឲ្យតម្លៃខ្លួនឡើងប្រកួតថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ខៀវ កាញារីទ្ធ បាននិយាយនៅព្រឹកថ្ងៃសៅរ៍ ទី៨ ខែមេសានេះថា ៖«ឃើញគេមិនឲ្យលុយអ្នកប្រដាល់ប្រេស៊ីល ព្រោះប្រើគុនខ្មែរផ្តួលគុនថៃ កីឡារមែងមានឈ្នះមានចាញ់ តែបើគេយករឿងឈ្មោះកីឡាមកជាលេស (គេត្រូវហាមមុនឡើងប្រដាល់)។ សូមខ្មែរយើងជួយផ្តល់លុយទៅកីឡាករនោះវិញផង។ ខ្ញុំផ្ទាល់សូមផ្ញើលុយ ១ ០០០ ដុល្លារទៅគាត់ តាមរយៈសមាគមប្រដាល់គុនខ្មែរយើង»។

ពិតណាស់ អ្នកប្រដាល់ប្រេស៊ីល Thiago Teixeira ត្រូវបានស្ថាប័នប្រដាល់មួយថៃពិភពលោកបានចេញសេចក្តីប្រកាសពីការដកហូតខ្សែក្រវ៉ាត់មួយថៃពិភពលោក (WMO) បន្ទាប់ពីរូបគេបានគ្រប់គ្រងត្រឹមរយៈពេល៦ថ្ងៃប៉ុណ្ណោះ តាមរយៈការប្រកួតតំណាងឲ្យគុនខ្មែរផ្តួលកីឡាករអង់គ្លេស Joe Craven ក្នុងទឹកទី២ នៅកម្មវិធីប្រដាល់ Apex Fight Series កាលពីយប់ថ្ងៃទី១ ខែមេសា ឆ្នាំ២០២៣ នៅប្រទេសអាល្លឺម៉ង់។

កាលពីថ្ងៃទី៤ ខែមេសា Thiago បានធ្វើដំណើរមកដល់ប្រទេសកម្ពុជាដោយទទួលការគាំទ្រយ៉ាងខ្លាំងពីអ្នកគាំទ្រកម្ពុជានៅអាកាសយានដ្ឋានភ្នំពេញអន្តរជាតិ។ ពេលនោះរូបគេបាននិយាយថា ខ្លួនឈប់ប្រកួតជាមួយកីឡាករកម្ពុជាហើយ ហើយនឹងប្រកួតតំណាងឲ្យគុនខ្មែរទៀត។ សាក់យន្តគាថាដែលរូបគេធ្លាប់មានលើដងខ្លួនកន្លងមកជាភាសាថៃក៏ត្រូវបានលុបចេញជំនួសវិញដោយយន្តគាថាខ្មែរ។

ឃើញបែបនេះ ស្ថាប័នប្រដាល់មួយថៃ មិនពេញចិត្ត និងសម្រេចដកហូតខ្សែក្រវាត់ពី Thiago ថែមទាំងដាក់បំរាម មិនឲ្យប្រកួតគ្រប់កម្មវិធីទាំងអស់នាពេលអនាគត។ ជាងនេះទៀតនោះ តម្លៃខ្លួនប្រមាណ៣៥០០ដុល្លារអាមេរិកពីការប្រកួតកាលពីថ្ងៃទី១ ខែមេសា កីឡាករប្រេស៊ីលរូបនេះមិនបានទទួលឡើយ៕