លោកបណ្ឌិត សូ ណារ៉ូ៖ តំណែងរដ្ឋមន្ត្រីប្រតិភូអមនាយករដ្ឋមន្ត្រី ជាសំណាងតែក៏ជាបន្ទុកខ្លាំង

លោកបណ្ឌិត សូ ណារ៉ូ ចាត់ទុកថាការទទួលតំណែងជារដ្ឋមន្ត្រីប្រតិភូអមនាយករដ្ឋមន្ត្រីដែលលោកទទួលបានជាសំណាងតែទន្ទឹមនឹងសំណាងនេះគឺជាបន្ទុកដ៏ធ្ងន់។ នេះការឆ្លើយតបរបស់លោកជាមួយ កម្ពុជាថ្មី ក្នុងសន្និសីទសារព័ត៌មានថ្ងៃទី២៤ ខែមិថុនា ឆ្នាំ២០២៣នៅវិមានសន្តិភាព។

លោកបណ្ឌិត សូ ណារ៉ូ មានប្រសាសន៍ថា “ការទទួលបានតំណែងនេះសម្រាប់លោកផ្ទាល់ជាសំណាងផងនិងជាបន្ទុកយ៉ាងធ្ងន់ផង”។ ជាសំណាងនៅត្រង់ថា ជាឱកាសដែលអនុញ្ញាតឱ្យលោកបានវិលត្រឡប់មករស់នៅក្នុងប្រទេសកម្ពុជាជាប្រទេសកំណើតឡើងវិញ រស់នៅដូចប្រជាពលរដ្ឋធម្មតា នឹងអាចឱ្យលោកមានសិទ្ធិធ្វើអ្វីៗដូចដើម។ នៅថ្ងៃស្អែកលោកនឹងទៅសែនផ្នូរ បង្សុកូលជូនញាតិការ និងជាសំណាងយ៉ាងខ្លាំងនៅពេលដែលទទួលការទុកចិត្តតែងតាំងលោកជារដ្ឋម​ន្ត្រីប្រតិភូអមនាយករដ្ឋមន្ត្រី ដែលជារឿងនឹកស្មានមិនដល់ក្នុងជីវិតរបស់លោក ។ លោកក៏បញ្ជាក់ថាការវិល     ត្រឡប់មកកម្ពុជាឡើងវិញនេះជាការបើកទំព័រជីវិតថ្មីឡើងវិញម្ដងទៀតដូចគ្នា  ។

លោកក៏បានបញ្ជាក់ច្បាស់ៗថា ការទទួលបានតំណែងជារដ្ឋមន្ត្រីប្រតិភូអមនាយករដ្ឋមន្ត្រីនេះគឺជាបន្ទុកដ៏ធ្ងន់របស់លោក​ បន្ទុកនៅត្រង់ថាការធ្វើកិច្ចការងារដ៏ធំជាមួយនាយករដ្ឋមន្ត្រីដែលខ្លាំងដូចសម្ដេចតេជោ ហ៊ុន សែន។ លោកបានចាត់ទុកសម្ដេចនាយករដ្ឋមន្តី្រថា ជាមនុស្សបាតុភូត ១ពាន់ឆ្នាំមានម្ដង  ហើយការធ្វើការងារជាមួយមនុស្សបែបនេះ ត្រូវតែមានសមត្ថភាព មានទំនួលខុសត្រូវខ្ពស់  និងត្រូវប្រឹងប្រែងឱ្យបានខ្លាំង ។  លោកបណ្ឌិត បានរំលេចថាបញ្ហាប្រឹងប្រែងនេះគឺជាបន្ទុកដ៏ធ្ងន់ទន្ទឹមនឹងការទទួលបានតំណែង។

គួរបញ្ជាក់ថា លោកបណ្ឌិត សូ ណារ៉ូ ​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​ទទួលបានការតែងតាំងពីព្រះមហាក្សត្រនៃព្រះរាជាណាចក្រ ជាប្រតិភូអមនាយករដ្ឋមន្ត្រីឡើងវិញកាលពីថ្ងៃទី៨ ខែឧសភាឆ្នាំ២០២៣។ លោកបណ្ឌិតក៏ធ្លាប់មានក្របខណ្ឌរដ្ឋបំពេញការងារនៅទីស្ដីការគណៈរដ្ឋមន្ត្រីនិងនៅខុទ្ទកាល័យនាយករដ្ឋមន្ត្រីក្នុងនាមជាជំនួយការផ្ទាល់របស់សម្ដេចតេជោ ហ៊ុន សែន ផងដែរ​ ៕

អត្ថបទដោយ៖ ង៉ិល​ ណារ៉ាត់