ព័ត៌មានជាតិ

ផ្លូវជាតិថ្មីកាត់ពីខេត្តបាត់ដំបងទៅខេត្តសៀមរាប និង ផ្លូវជាតិលេខ ៦០បេ កំពុងជំរុញឈានទៅបើកការដ្ឋានសាងសង់នៅពេលខាងមុខ

បានផុស

២ ខែ មុន

នៅ

ថ្ងៃសៅរ៍ ២៣ ឧសភា ២០២៦

ដោយ

មន្រ្តីក្រសួងសាធារណការ និងដឹកជញ្ជូន បានបើកកិច្ចប្រជុំពិនិត្យសម្រាប់ការសិក្សាសមិទ្ធិលទ្ធភាពនៃគម្រោងស្ថាបនាផ្លូវជាតិចំនួនពីរខ្សែ ក្រោមក្របខ័ណ្ឌហិរញ្ញប្បទានពីធនាគារវិនិយោគហេដ្ឋារចនាសម្ព័ន្ធអាស៊ី (AIIB)។

នៅទីស្ដីការក្រសួងសាធារណការ និងដឹកជញ្ជូន លោក សុខុម ភគវន្តមុនី រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង បានអញ្ជើញដឹកនាំកិច្ចប្រជុំពិនិត្យពិភាក្សា (Term of References) សម្រាប់សិក្សាសមិទ្ធិលទ្ធភាពនៃគម្រោងសាងសង់របៀងផ្លូវចំនួន ២ ខ្សែ ដែលខ្សែទី ១). ផ្លូវជាតិតភ្ជាប់ពីខេត្តបាត់ដំបងទៅខេត្តសៀមរាប និងខ្សែទី ២).ផ្លូវជាតិលេខ ៦០បេ ពីខេត្តក្រចេះទៅខេត្តកំពង់ធំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្រ្តីក្រសួងសាធារណការ និងដឹកជញ្ជូនបានបញ្ជាក់ថា កិច្ចប្រជុំនេះរៀបចំឡើងក្នុងគោលបំណងប្រមូលធាតុចូលបន្ថែម និងពិនិត្យពិភាក្សាឱ្យបានល្អិតល្អន់តាមលក្ខណៈបច្ចេកទេស លើការរៀបចំលក្ខខណ្ឌយោង (Term of References – TOR) សម្រាប់ការជ្រើសរើសក្រុមហ៊ុនទីប្រឹក្សាបច្ចេកទេស មកធ្វើការសិក្សាសមិទ្ធិលទ្ធភាព (Feasibility Study) នៃគម្រោងផ្លូវខាងលើ។

គម្រោងស្ថាបនាផ្លូវជាតិថ្មីពីខេត្តបាត់ដំបងមកសៀមរាប មានការសិក្សាជាច្រើនឆ្នាំមកហើយ។ បើប្រៀបធៀបចម្ងាយផ្លូវចាស់ ផ្លូវជាតិថ្មីដែលគ្រោងសាងសង់តភ្ជាប់ពីខេត្តបាត់ដំបងមកខេត្តសៀមរាប សម្រួលការធ្វើដំណើរចំណេញចម្ងាយផ្លូវបានជាង ១០០ គីឡូម៉ែត្រ ដោយឆ្លងកាត់ខេត្តចំនួន ៣ មានខេត្តបាត់ដំបង បន្ទាយមានជ័យ និងខេត្តសៀមរាប។

តាមការសិក្សាទីតាំងផ្លូវដែលគ្រោងសាងសង់ចាប់ចេញពីផ្លូវជាតិលេខ ៥ ត្រង់ចំណុច PK302+325 ម៉ែត្រ ឆ្ពោះទៅចំណុចបញ្ចប់នៅផ្លូវលេខ ៦ ត្រង់ចំណុច PK343+100 ម៉ែត្រ មានចម្ងាយ ៧២,១៥៤ គីឡូម៉ែត្រ ឆ្លងកាត់ស្រុកចំនួន ៥ ក្នុងនោះខេត្តបាត់ដំបងឆ្លងកាត់ស្រុកថ្មគោល និងឯកភ្នំ ខេត្តបន្ទាយមានជ័យឆ្លងកាត់ស្រុកព្រះនេត្រព្រះ និងខេត្តសៀមរាបឆ្លងកាត់ស្រុកក្រឡាញ់ និងស្រុកពួក។

ដោយឡែកផ្លូវជាតិលេខ ៦០ បេ ពីព្រែកប្រសព្វខេត្តក្រចេះទៅកំពង់ថ្មខេត្តកំពង់ធំ ក៏មានការសិក្សាដើម្បីជំរុញឈានទៅបើកការដ្ឋានសាងសង់នៅពេលខាងមុខ។

លោក សាំង ប៊ុនថេង ប្រធានមន្ទីរសាធារណការ និងដឹកជញ្ជូនខេត្តក្រចេះបានប្រាប់កម្ពុជាថ្មីកន្លងទៅថា ផ្លូវជាតិលេខ ៦០បេ សាងសង់ចេញពីគល់ស្ពានខេត្តក្រចេះថ្មី កាត់តាមស្រុកព្រែកប្រសព្វដល់កំពង់ថ្មខេត្តកំពង់ធំមានប្រវែងជាង ១៣០ គីឡូម៉ែត្រ។

លោកថា ការស្ថាបនាផ្លូវជាតិមួយខ្សែនេះរួមទាំងស្ពានឆ្លងទន្លេមេគង្គខេត្តក្រចេះ នឹងក្លាយជាសរសៃឈាមដ៏សំខាន់ សម្រាប់បម្រើផលប្រយោជន៍សេដ្ឋកិច្ចខេត្តភូមិភាគឦសាន តាមរយៈការនាំលំហូរការដឹកជញ្ជូន និងការធ្វើដំណើររបស់ភ្ញៀវទេសចរ ខណៈដែលខេត្តនៅភូមិភាគឦសានកំពុងទទួលបានការលើកទឹកចិត្ត និងជំរុញការវិនិយោគពីរដ្ឋាភិបាល៕

បន្តចុចអាន៖ ផ្លូវប្រវត្តិសាស្រ្តថ្មី ៤ ខ្សែ កាត់ពីខេត្តមួយទៅខេត្តមួយ ចំណេញផ្លូវរាប់រយគីឡូម៉ែត្រ