សុខភាពបុត្រីស្ដេចថៃ ធ្លាក់ចុះដុនដាបខ្លាំង ដោយសារការឆ្លងមេរោគធ្ងន់ធ្ងរ

ការិយាល័យព្រះបរមរាជវាំងថៃ បានចេញសេចក្តីថ្លែងការណ៍ជាលើកទីប្រាំពីរ ស្តីពីព្រះរាជសុខភាពរបស់ព្រះនាង​ Bajrakitiyabha ដោយបានបញ្ជាក់ថា សុខភាពរបស់ព្រះនាង បានធ្លាក់ចុះដុនដាបយ៉ាងខ្លាំង ដោយសារតែការឆ្លងមេរោគធ្ងន់ធ្ងរ ដែលរហូតមកទល់ពេលនេះ ក្រុមគ្រូពេទ្យនៅមិនទាន់អាចគ្រប់គ្រងបាននៅឡើយទេ។

យោងតាមសេចក្តីថ្លែងការណ៍​នា​ថ្ងៃទី២១ ខែឧសភា ឆ្នាំ​២០២៦ នេះ ដែល​ត្រូវ​បាន​ចុះផ្សាយ​ដោយ​សារព័ត៌មាន Khaosod ក្រុមគ្រូពេទ្យ បានរកឃើញការឆ្លងមេរោគ នៅក្នុងពោះរបស់ព្រះ​នាង តាំងពីខែមេសា មកម្ល៉េះ ដែលបង្កឡើងដោយសារការរលាកពោះវៀនធំ។ ការឆ្លងមេរោគនេះ បានធ្វើឱ្យ​សុខភាពរបស់ព្រះនាង​ប្រែប្រួលមិនប្រក្រតី និងមិនទាន់មានលំនឹងនៅឡើយ ដោយក្នុងនោះរួមមាន សម្ពាធឈាមចុះទាបខ្លាំង ​បេះដូងលោត​​មិនស្មើគ្នា និងមានភាពមិនប្រក្រតីនៃការកកឈាមផងដែរ។

ទោះបីជាកន្លងមក ក្រុមគ្រូពេទ្យ បានបន្តប្រើប្រាស់ឧបករណ៍ជំនួយជីវិតសម្រាប់​សួត និងតម្រងនោម ព្រមទាំងបានថ្វាយថ្នាំផ្សះ និងឱសថជាច្រើនមុខ ដើម្បីជួយទប់ទល់ឱ្យសម្ពាធឈាម និងចង្វាក់បេះដូងមានលំនឹងឡើងវិញយ៉ាងណាក្តី ក៏សេចក្តីថ្លែងការណ៍បានគូសបញ្ជាក់ថា ការឆ្លងមេរោគនោះ បានវិវត្តទៅជាធ្ងន់ធ្ងរឡើងៗ ហើយនៅពេលនេះ វាបានចាប់ផ្តើមជះឥទ្ធិពលអាក្រក់ដល់សរីរាង្គសំខាន់ៗជាច្រើនទៀត នៅក្នុងព្រះកាយរបស់ទ្រង់។

គួររំលឹកថា ព្រះនាង​ Bajrakitiyabha បានទទួលការសម្រាកព្យាបាលនៅមន្ទីរពេទ្យ Chulalongkorn ជារៀងរហូតមក ចាប់តាំងពីទ្រង់​បានដួលសន្លប់បាត់បង់ស្មារតី ដោយសារតែបញ្ហាបេះដូង​ភ្លាមៗ កាលពីខែធ្នូ ឆ្នាំ២០២២ កន្លងទៅ៕

ប្រែសម្រួល៖ ឈាង