អភិបាលខេត្ត និងតំណាងរាស្ត្រ ចុះពិនិត្យដល់ទីតាំងភ្លាមៗក្រោយមានគ្រោះថ្នាក់ចរាចរណ៍នៅស្រុកកំពង់ត្រឡាច

លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំង រួមជាមួយនិងអ្នកតំណាងរាស្ត្រ លោកស្រី កែ ច័ន្ទមុនី និងលោក ហ៊ឺ វីរៈ បានចុះពិនិត្យដល់ទីតាំងគ្រោះថ្នាក់ចរាចរណ៍រវាងរថយន្តដឹកទំនិញ និងរថយន្តដឹកកម្មករកម្មាករិនីរោងចក្រ នៅក្នុងស្រុកកំពង់ត្រឡាច ដែលបានបណ្តាលឱ្យមានអ្នកស្លាប់ចំនួន៩នាក់។

ហេតុការណ៍នេះបានកើតឡើងនាព្រឹកថ្ងៃទី២៣ ខែឧសភា ឆ្នាំ២០២៦នេះលើផ្លូជាតិលេខ៥ ត្រង់ចំណុចមុខសាលាបឋមសិក្សាសាលាលេខ៥ ស្ថិតនៅភូមិសាលាលេខ៥ ឃុំអូឬស្សី ស្រុកកំពង់ត្រឡាច ខេត្តកំពង់ឆ្នាំង ដែលបានបង្កឡើងរវាងរថយន្តដឹកទំនិញ និងរថយន្តដឹកកម្មកររោងចក្រ។ ក្នុងគ្រោះថ្នាក់ចរាចរណ៍នេះ តាមរបាយការណ៍ពីសមត្ថកិច្ច បានឱ្យដឹងថា មានអ្នកស្លាប់ចំនួន៩នាក់ ក្នុងនោះស្រីចំនួន៨នាក់ និង៤៦នាក់ បានរងរបួសធ្ងន់-ស្រាល។

លោក ស៊ុន សុវណ្ណារិទ្ធិ លោកស្រី កែ ច័ន្ទមុនី និងលោក ហ៊ឺ វីរៈ បានសម្ដែងនូវការចូលរួមរំលែកមរណទុក្ខយ៉ាងក្រៀមក្រំបំផុតចំពោះក្រុមគ្រួសារជនរងគ្រោះដែលបានទទួលមរណភាពក្នុងហេតុការណ៍ដ៏រន្ធត់នេះ។ លោកអភិបាលខេត្ត និងអ្នកតំណាងរាស្ត្រកំពង់ឆ្នាំង ក៏បានជួបសួរសុខទុក្ខកម្មករ-កម្មការនីរងរបួស ដែលកំពុងសម្រាកព្យាបាលនៅមន្ទីរពេទ្យផងដែរ៕

ដោយ៖ ធឿន វ៉ាន់សុង