ការនាំទៀនព្រះវស្សាចូលវត្តមុនថ្ងៃកំណត់ក៏ទទួលបានអនិសង្សផលបុណ្យដូចគ្នា

ក្រុមតារាសម្ដែងមួយក្រុមដែលដឹកនាំដោយលោក ឡុង សុខហ៊ាង ជាប្រធានក្លឹបសិល្បៈ ឡុង សុខហ៊ាង បាននាំយក ទ័យទានមានទៀនព្រះវស្សាទៅប្រគេនដល់ព្រះសង្ឃដែលគង់ចាំព្រះវស្សាលនៅវត្តគៀងឃ្លាំងមុនថ្ងៃកំណត់ ដែលជាទឹកចិត្តនៃការធ្វើបុណ្យរបស់ក្រុមតារាសម្ដែង និងលោកជំទាវ រីយ៉ា ត្រាណេ បានន័យថា ទទួលអានិសង្សផលបុណ្យដូចៗគ្នា។

ការបង្ហាញឲ្យឃើញពីទឹកចិត្តនៃសេចក្តីជ្រះថ្លាសោមនស្សរីករាយ នៃពិធីបុណ្យចូលព្រះវស្សាពេលខាងមុខនេះ ដែលនាំឱ្យក្រុមតារាសម្ដែងមួយក្រុមដឹកនាំដោយលោក ឡុង សុខហ៊ាង និងលោកជំទាវ រីយ៉ា ត្រាណេ ប្រធានសារ:មន្ទីរជាតិវិទូវិទ្យា មានចិត្តជ្រះថ្លាដែលលោកជំទាវបញ្ជាក់ថា បាននាំយក អង្ករ មី ប្រេងកាត ទឹកបរិសុទ្ធ ទឹកស៊ីអុីវ ទឹកត្រី ទឹកផ្លែឈើ និងគ្រឿងឧបភោគបរិភោគមួយចំនួនទៀតព្រមទាំងថវិកាប្រគេនដល់ព្រះសង្ឃគង់ចាំព្រះវស្សានៅវត្តនេះសម្រាប់ចាត់ចែងក្នុងទីអារ៉ាម។

លោក ឡុង សុខហ៊ាង បានបន្តទៀតថា ការធ្វើបុណ្យយើងមិនចាំបាច់រើសពេលវេលា ឬថ្ងៃកំណត់ទេ។ អាស្រ័យលើសទ្ធាជ្រះថ្លារបស់យើងទៅលើពិធីបុណ្យ។ នេះក៏ដោយសារក្រុមតារាយើងមានពេលទំនេរមុន យើងក៏បាននាំយកទ័យទានទាំងនោះមកប្រគេនដល់ព្រះសង្ឃ។ ក្រៅពីនាំយកទ័យទានជូនព្រះសង្ឃនេះ ក្រុមសម្ដែងនេះក៏បានរួមចំណែកជួយដល់សង្គមបានច្រើនទៀតផង ដូចជា ជួយដល់ចាស់ជរាគ្មានទីពឹង កុមារកំព្រា ជាដើម។

ក្នុងនាមជាតារាសម្ដែងទាំងអស់ អ្នកនាង អេឡិច សាន់ដ្រា បញ្ជាក់ថា ក្រៅពីនាំគ្នាជួយដល់សង្គម និងងការងារមនុស្សធម៌ ខ្មែរជួយខ្មែរ ក្រុមតារាសម្ដែងបានរៃអង្គាសថវិកាដែលអាចធ្វើទៅបានពីក្រុមសិល្បៈ ដើម្បីទៅជួយដល់ពួកគាត់តាមលទ្ធភាព គឺក្នុងនាមជួយសង្គមខ្មែរ៕

អត្ថបទ៖ រុងរឿង