កម្រិតទឹកភ្លៀងផ្ដើមថមថយ ហើយភាគច្រើនភ្លៀងធ្លាក់ពេលយប់

ក្រសួងធនធានទឹក និងឧតុនិយមនៅព្រឹកថ្ងៃទី ១១ ខែតុលា ឆ្នាំ២០២៣ នេះ បានចេញសេចក្តីជូនដំណឹងមួយស្ដីពីស្ថានភាពធាតុអាកាសនៅកម្ពុជា ដែលថាកម្ពុជានឹងមានកម្រិតទឹកភ្លៀងធ្លាក់ថមថយបន្តិច ប៉ុន្តែនឹងមានភ្លៀងធ្លាក់ច្រើននៅពេលយប់។

សេចក្ដីជូនដំណឹងរបស់ក្រសួងធនធានទឹកបង្ហាញថា ដោយទទួលរងនូវកម្លាំងរុញច្រានពីទ្រនុងសម្ពាធខ្ពស់ពីប្រទេសចិន ធ្វើឲ្យប្រព័ន្ធសម្ពាធទាប (ITCZ) រំកិលចុះមកក្រោម អូសបន្លាយលើភាគខាងត្បូងប្រទេសកម្ពុជាដែលនឹងធ្វើឱ្យកម្រិតទឹកភ្លៀងធ្លាក់នឹងថមថយ និងមានភ្លៀងធ្លាក់ភាគច្រើនតែនៅពេលយប់អំឡុងមួយសប្ដាហ៍ខាងមុខ។

ចំណែកឯ នៅរាជធានីភ្នំពេញ និងបណ្តាខេត្តនានា អាចមានភ្លៀងធ្លាក់នៅក្នុងកម្រិតពីខ្សោយទៅមធ្យម ជាមួយនឹងទំហំទឹកភ្លៀងធ្លាក់គ្របដណ្តប់លើផ្ទៃដីពី ៣០-៥០%៕

អត្ថបទ៖ សួស សិត