មន្រ្តីជំនាញ៖ ការលេបប្រមាត់ត្រី និងប្រើអាហារបំប៉ន​គ្មានប្រភពច្បាស់លាស់​ងាយប្រឈមជំងឺ​តម្រងនោមធ្ងន់ធ្ងរ

លោក សាស្ត្រាចារ្យ លឹម វឌ្ឍនា ប្រធានសមាគមគ្រូពេទ្យតម្រង់នោមកម្ពុជា បានអំពាវនាវដល់​ប្រជាពលរដ្ឋបញ្ឈប់​ការលេបប្រមាត់ត្រី និងប្រើអាហារបំប៉នដែលមិនមានប្រភពច្បាស់លាស់ អាចធ្វើឱ្យប៉ះពាល់ដល់តម្រង់នោមធ្ងន់ធ្ងរ​រហូតដល់លាងឈាមក្លាយជាបន្ទុកសម្រាប់គ្រួសារ និងសង្គមជាតិទាំងមូល។

ថ្លែងបើកសន្និបាតសមាគមគ្រូពេទ្យតម្រងនោមកម្ពុជា ប្រចាំឆ្នាំលើកទី៦នៅព្រឹកថ្ងៃទី១៦ធ្នូនៅសណ្ឋាគារសុខា លោក សាស្ត្រាចារ្យ លឹម វឌ្ឍនា បានមានប្រសាសន៍ថា «ចំនួនអ្នកជំងឺតម្រងនោមនៅប្រទេសយើងមានការកើនឡើង​ជាលំដាប់ក្នុងរយៈពេល ប៉ុន្មានឆ្នាំចុងក្រោយនេះ។ នេះជាក្ដីកង្វល់ដ៏ធំមួយ សម្រាប់ការអភិវឌ្ឍសង្គមជាតិ ព្រោះអ្នកដែលកើតជំងឺតម្រងនោម ដោយគ្មានការថែទាំព្យាបាលបានត្រឹមត្រូវ នឹងវិវត្តឈានទៅរកជំងឺតម្រង​នោមដំណាក់កាលចុងក្រោយ ដែលទាមទារឱ្យ មានការព្យាបាលច្រើន ដូចជាការលាងឈាម រហូតដល់ការ​ផ្សំតម្រងនោម។ ពួកគេនឹងប្រឈមមុខបញ្ហាជាច្រើនក្នុងជីវភាព រស់នៅប្រចាំថ្ងៃ ជាពិសេសគឺបញ្ហាហិរញ្ញវត្ថុ ហើយអ្នកជំងឺទាំងនេះ នឹងក្លាយជាបន្ទុកសម្រាប់គ្រួសារ ក៏ដូចជាសង្គមជាតិទាំងមូល»។

លោកប្រធានសមាគម បានទទូចដល់ប្រជាពលរដ្ឋត្រូវមានការប្រុងប្រយ័ត្នចំពោះការប្រើប្រាស់ ឱសថបុរាណ និងការប្រើប្រាស់ថ្នាំដោយខ្លួនឯង ដែលវាគឺជាកត្តាចម្បងមួយ ដែលនាំឱ្យកើតជំងឺតម្រងនោមធ្ងន់ធ្ងរ។

ជាមួយគ្នានេះដែរ លោកប្រធានសមាគមបានណែនាំដល់ប្រជាពលរដ្ឋបញ្ឈប់ការលេបប្រមាត់ត្រី និងបរិភោគ​អាហាបុះប៉នមួយចំនួនធ្វើឱ្យប៉ះពាល់ដល់តម្រង់នោម។

លោក លឹម សុជន់ អគ្គលេខាធិការសមាគមគ្រូពេទ្យតម្រង់នោមកម្ពុជា និងជាគ្រូពេទ្យបម្រើការងារ​នៅមន្ទីរ​ពេទ្យកាល់ម៉ែតបានមានប្រសាសន៍ថា មានកត្តាជាច្រើននាំឱ្យកើតជំងឺតម្រង់នោមក្នុងនោះ មូលហេតុធំៗ រួមមានជំងឺទឹកនោមផ្អែម ជំងឺលើសសម្ពាធឈាម និងជំងឺតម្រង់នោមដែលបណ្តាលមកពីជំងឺគ្រួសតម្រង់នោម និងតំណពូជព្រមទាំងការពិសារអាហារបំប៉នមួយចំនួនដែល មិនបានត្រឹមត្រូវ និងមិនមានប្រភពច្បាស់លាស់។

លោកបានណែនាំឱ្យអ្នកជំងឺទឹកនោមផ្អែម និងជំងឺលើសម្ពាធឈាមត្រូវព្យាបាលឱ្យបានត្រឹមត្រូវដោយរក្សាជាតិស្ករ និងឈាមឱ្យបានល្អដើម្បីការពារកុំឱ្យវិវត្តទៅរកការឆាប់ខូចតម្រងនោម៕

អត្ថបទ ៖ សំអឿន