គណៈកម្មាធិការសម្ព័ន្ធយុវជនស្រឡាញ់សន្តិភាព ខេត្តសៀមរាប ប្រកាសទទួលស្គាល់ការកែសម្រួលរចនាសម្ព័ន្ធដឹកនាំ

គណៈកម្មាធិការសម្ព័ន្ធយុវជនស្រឡាញ់សន្តិភាព ខេត្តសៀមរាប កាលពីនៅថ្ងៃទី ២៥ ខែមករា ឆ្នាំ ២០២៤ បានរៀបចំពិធីប្រកាសទទួលស្គាល់នូវការកែសម្រួលរចនាសម្ព័ន្ធដឹកនាំ នៅសាលប្រជុំសាលាខេត្តសៀមរាប ដោយមានអ្នកចូលរួម​ចំនួន ៣៥០នាក់។

លោក ម៉ន សំអាត បានធ្វើសេចក្តីរាយការណ៍អំពីសកម្មភាព លទ្ធផលរបស់សាខាសម្ពន្ធយុវជនស្រឡាញ់សន្តិភាពខេត្តសៀមរាប ដែលបានអនុវត្តកន្លងមក និងលោក ប៉ាន់ខែម វឌ្ឍនា អគ្គលេខាធិការសម្ពន្ធយុវជនស្រឡាញ់សន្តិភាព បានអានសេចក្តីសម្រេចកែសម្រួលរចនាសម្ពន្ធដឹកនាំគណៈកម្មាធិការប្រតិបត្តិសម្ព័ន្ធយុវជនស្រឡាញ់សន្តិភាពខេត្តសៀមរាប ដែលមានសមាសភាពចំនួន ១០៤រូប និង សេចក្តីសម្រេចទទួលស្គាល់រចនាសម្ព័ន្ធប្រតិបត្តិតាមផ្នែករបស់សម្ព័ន្ធយុវជនស្រឡាញ់សន្តិភាពខេត្តសៀមរាប ដែលមានសមាសភាពចំនួន ០៨រូបផងដែរ ។

បន្ទាប់ពីគណៈអធិបតីធ្វើការប្រគល់នូវសេចក្តីសម្រេច និងបណ្ឌសម្គាល់សមាជិកសម្ព័ន្ធយុវជនស្រឡាញ់សន្តិភាព និង ការប្តេជ្ញាចិត្តរបស់ប្រធានប្រតិបត្តិរួចមក លោក អ៊ឹង គឹមលាង តំណាងឲ្យលោក ប្រាក់ សោភ័ណ អភិបាលខេត្តសៀមរាប បានធ្វើការណែនាំមួយចំនួន ដោយបានគូសបញ្ជាក់ថា សកម្មភាពរបស់យុវជននាពេលបច្ចុប្បន្ន ជាកម្លាំងចលករដ៏សំខាន់ក្នុងការអភិវឌ្ឍន៍ប្រទេសជាតិ អ្នកថែរក្សាការពារសន្តិភាព ហើយក្នុងនោះ សម្ព័ន្ឋយុវជនស្រឡាញ់សន្តិភាពខេត្តសៀមរាប បានចូលរួមយ៉ាងសកម្ម ក្នុងកិច្ចការងារសង្គម ទាំងការងារស្ម័គ្រចិត្ត និងមនុស្សធម៌ ហើយទទួលបានការគាំទ្រយ៉ាងពេញទំហឹងពីមហាជនទៀតផង។ លោកបានបន្តថា ការចូលរួមកិច្ចការងារសង្គមរបស់យុវជន​(ស.យ.ស.ស) សាខាខេត្តសៀមរាប នាពេលកន្លងមក និងកំពុងបន្តធ្វើនាពេលបច្ចុប្បន្ននេះ បានបង្ហាញយ៉ាងច្បាស់ពីស្មារតីរួបរួមគ្នាសាមគ្គី ក្នុងបុព្វហេតុជាតិ ក្នុងការទទួលខុសត្រូវ ក្នុងនាមជាប្រជាជាតិតែមួយ ដើមី្បអនុវត្តគោលនយោបាយយុទ្ធសាស្ត្រ បញ្ចកោណ របស់រាជរដ្ឋាភិបាលកម្ពុជា នីតិកាលទី៧ ក្រោមកិច្ចដឹកនាំប្រកបដោយគតិបណ្ឌិតរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ឲ្យសម្រេចបានជោគជ័យ ។

លោក ប៉ាន់ខែម ប៊ុនថន ប្រធានប្រតិបត្តិសម្ព័ន្ធយុវជនស្រឡាញ់សន្តិភាពថ្នាក់កណ្តាល បានលើកឡើងអំពីតួនាទីភារកិច្ចរបស់យុវជន ក្នុងការចូលរួមថែរក្សាសន្តិភាព និងការអភិវឌ្ឍសង្គមឲ្យមានការរីកចម្រើន ប្រកបដោយចីរភាព ។ លោកស្នើឱ្យពលរដ្ឋ យុវជន យុវតីទាំងអស់ ត្រូវចេះប្រើនូវយុទ្ធវិធីត្រឹមត្រូវ តែបើខ្វះការចាត់តាំង និងអនុវត្តឲ្យបានត្រឹមត្រូវ ដោយមិនខ្វះតួអង្គពាក់ព័ន្ធចូលរួមនោះទេ លទ្ធផល គឺស្មើនឹងសូន្យ។ លោកបានធ្វើការផ្តាំផ្ញើដល់ប្រធានប្រតិបត្តិ សមាជិក-សមាជិកាសាខាសម្ព័ន្ធយុវជនស្រឡាញ់សន្តិភាពខេត្តសៀមរាបទាំងអស់ ត្រូវចូលរួមសហការជាមួយអាជ្ញាធរ​មូលដ្ឋានគ្រប់លំដាប់ថ្នាក់ និងបង្កើននូវសកម្មភាពសង្គម ការងារមនុស្សធម៌ ដើម្បីផលប្រយោជន៍របស់ប្រជាពលរដ្ឋ និងការអភិវឌ្ឍសង្គមជាតិ ៕

អត្ថបទ៖ គឿនវេត