ព័ត៌មានជាតិ

ក្នុងតំបន់អង្គរ មានរៀបចំចំណតយានយន្តតាមប្រាសាទធំៗ បញ្ចៀសចតយានយន្តពាសវាលពាសកាល

បានផុស

២ ខែ មុន

នៅ

ថ្ងៃសុក្រ ២២ ឧសភា ២០២៦

ដោយ

ចំណតយានយន្តត្រូវបានរៀបចំនៅតាមទីតាំងប្រាសាទសំខាន់ៗក្នុងតំបន់រមណីយដ្ឋានអង្គរ ដើម្បីឆ្លើយតបតាមតម្រូវការជាក់ស្តែង ហើយការសាងសង់នេះក៏ត្រូវឆ្លងកាត់ការពិភាក្សា និងការសួរដេញដោលពីមន្រ្តីជំនាញជាពិសេសស្ថាប័ន ICC អង្គរ។ នេះបើតាមលោក ទេស សុធី អនុប្រធាននាយកដ្ឋានអភិវឌ្ឍន៍ទេសចរណ៍ និងវប្បធម៌នៃអាជ្ញាធរជាតិអប្សរា។

ខណៈរមណីយដ្ឋានអង្គរមានវិសាលភាពគ្របដណ្តប់លើផ្ទៃដីទំហំ ៤០១ គីឡូម៉ែត្រក្រឡា ការសាងសង់ចំណតយានយន្តសម្រួលការចតយានយន្តផ្សេងៗក្នុងតំបន់អង្គរក៏មិនអាចសាងសង់ច្រើនពេកដែរ ដើម្បីកុំឲ្យប៉ះពាល់ដល់តម្លៃនៃសម្បត្តិបេតិកភណ្ឌពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ទេស សុធី អនុប្រធាននាយកដ្ឋានអភិវឌ្ឍន៍ទេសចរណ៍ និងវប្បធម៌នៃអាជ្ញាធរជាតិអប្សរាបានគូសបញ្ជាក់ តាំងពីឆ្នាំ ២០១០ អាជ្ញាធរបានរៀបចំចំណតយានយន្តនៅប្រាសាទបន្ទាយស្រីមុនគេ ដែលមានលក្ខណៈស្តង់ដាអន្តរជាតិ សម្រាប់បម្រើដល់វិស័យទេសចរណ៍ ខណៈនៅខាងមុខប្រាសាទអង្គរវត្ត ទើបតែបានរៀបចំឲ្យមានចំណត និងបើកដំណើរការផ្លូវការប្រហែល ៤ ឆ្នាំនេះប៉ុណ្ណោះ។

ចំណតនៅតាមប្រាសាទផ្សេងៗទៀត មានដូចជានៅប្រាសាទព្រះខ័ន តាសោម និងតាព្រហ្ម សុទ្ធតែត្រូវបានរៀបចំឡើងតាមស្តង់ដា និងទទួលបានការឯកភាពពីអាជ្ញាធរជាតិអប្សរា ព្រមទាំងអ្នកជំនាញការអន្តរជាតិដែលបានចុះមកពិនិត្យផ្ទាល់។

នៅខ្លោងទ្វារជ័យវិញ អាជ្ញាធរបានរៀបចំចំណតនិងបានចុះដាក់ស្លាកសញ្ញា ផ្ទាំងប៉ាណូព័ត៌មាន បន្ទប់ទឹក កន្លែងអង្គុយសម្រាក ភោជនីយដ្ឋាន និងហាងលក់វត្ថុអនុស្សាវរីយ៍ផងដែរ។

លោក ទេស សុធី បានបញ្ជាក់ថា ការរៀបចំចំណតនៅខ្លោងទ្វារជ័យដើម្បីបង្កើតជាខ្សែទស្សនកិច្ចមួយ ដែលភ្ញៀវអាចចតរថយន្ត សម្រាកលំហែ ហើយដើរទស្សនាតាមលំដាប់លំដោយចាប់ផ្តើមពីទស្សនាប្រាសាទធម្មនន្ទ បន្តទៅលានបណ្ដុះកូនឈើ មើលស្ពានប្រាសាទតាកែវ ហើយបកមកមើលប្រាសាទចៅសាយទេវតា រួចទើបត្រឡប់មកចំណតវិញ។ លោក ទេស សុធី បន្ថែម។

បើតាមមន្រ្តីទទួលបន្ទុកកិច្ចការអភិវឌ្ឍន៍ទេសចរណ៍ និងវប្បធម៌រូបនេះបញ្ជាក់ថា ការរៀបចំសណ្តាប់ធ្នាប់និងហេដ្ឋារចនាសម្ព័ន្ធនេះគឺដើម្បីផ្តល់នូវផលិតផលទេសចរណ៍ចម្រុះដល់ភ្ញៀវ។ អាជ្ញាធរមិនចង់ឲ្យភ្ញៀវទេសចរមកទស្សនាមានអារម្មណ៍ថាពួកគេមកមើលតែថ្ម ឬមើលតែប្រាសាទមួយមុខនោះទេ ប៉ុន្តែចង់ឲ្យពួកគេអាចទស្សនាស្វែងយល់ពីរមណីយដ្ឋានទាំងមូល ទទួលបានបទពិសោធន៍ថ្មីៗនិងត្រលប់ទៅវិញប្រកបដោយភាពសប្បាយរីករាយ៕