មន្ទីរអភិវឌ្ឍន៍ជនបទខេត្តកោះកុង ប្រាប់ពីគន្លឹះលើកកម្ពស់អនាម័យជនបទដល់មន្រ្តីពាក់ព័ន្ធ

មន្ទីរអភិវឌ្ឍន៍ជនបទខេត្តកោះកុង បានប្រាប់ពីគន្លឹះសំខាន់ដល់មន្រ្តី និងអាជ្ញាធរមូលដ្ឋានពីការលើកកម្ពស់អនាម័យជនបទ ដើម្បីទទួលបានសុខភាពល្អក្នុងសហគមន៍។

លោក អៀង ដារ៉ាវុធ ប្រធានមន្ទីរអភិវឌ្ឍន៍ជនបទខេត្ត បានឱ្យដឹងនៅថ្ងៃទី៨ ខែមិថុនា ឆ្នាំ២០២៤ថា លោកបានអញ្ជើញអាជ្ញាធរក្រុងស្រុកឃុំសង្កាត់ប្រមាណ៤៧នាក់ បង្ហាញពីចំណេះដឹងមួយចំនួនដើម្បីឱ្យសហគមន៍មានអនាម័យល្អប្រសើរសម្រាប់រស់នៅ។

លោក អៀង ដារ៉ាវុធ បន្តថា គោលដៅចម្បងដែលក្រសួង និងមន្ទីរអភិវឌ្ឍន៍ចង់បង្ហាញនោះ គឺទី១ផ្តល់ចំណេះដឹងផ្នែក ការលើកកម្ពស់អនាម័យជនបទ ទី២ ស្ថានភាពអនាម័យនៅខេត្តកោះកុង ទី៣លើកផែនការណែនាំ និងជំរុញដល់មូលដ្ឋានភូមិ ឃុំដែលពុំទាន់បញ្ឈប់បន្ទោបង់ពាសវាលពាសកាលរបស់ស្រុក/ក្រុងទាំង៧ក្នុងខេត្តកោះកុង។

បើតាមលោកប្រធានមន្ទីរអភិវឌ្ឍន៍ជនបទខេត្តកោះកុង ការងារអនាម័យរបស់ប្រជាពលរដ្ឋក្នុងសហគមន៍តាមជនបទ ត្រូវតែខិតខំធ្វើអោយសម្រេចបានទាំងការផ្គត់ផ្គង់ទឹកស្អាត ទាំងការលើកកម្ពស់អនាម័យជនបទ បានអាត្រាគ្រប​ដណ្តប់១០០% មានន័យថា ប្រជាពលរដុ្ឋគ្រប់រូបនៅភសហគមន៍ជនបទ ត្រូវបានការផ្គត់ផ្គង់ទឹកស្អាត និងអនាម័យគ្រប់គ្រាន់ព្រមទាំងរស់នៅក្នុងបរិស្ថានដែលមានអនាម័យល្អប្រកបដោយនិរន្តរភាព។

លោក វណ្ណ សាឬទ្ឋិ មកពីក្រសួងអភិវឌ្ឍន៍ និងជាគ្រូបង្គោល ថ្លែងថា ការប្រើប្រាស់បង្គន់អនាម័យ តាមក្បួនខ្នាតអនាម័យត្រឹមត្រូវតាមការណែនាំ នឹងឈានទៅបញ្ចប់បានទាំងស្រុងនូវការបន្ទោបង់ពាសវាលពាសកាល (ODF) ក្នុងមូលដ្ឋានសហគមន៍ ពិសេសការហូបស្អាត ការផឹកស្អាត ការរស់នៅស្អាត និងបរិស្ថានល្អ៕

អត្តបទ៖ សិរីវឌ្ឍនៈ