អាជ្ញាធរ​ខណ្ឌ​ចំការមន​បញ្ជាក់​ថា ​ជន​ជាតិ​ចិន​៨នាក់​ ដែល​អាជ្ញាធរ​ស្រុក​គីរីសាគរ​ឃាត់​ខ្លួន​ មិន​មែន​រត់​ចេញ​ពី​ទីតាំង​​មាន​កូវីដ-១៩​ទេ

ជនជាតិចិនចំនួន៨នាក់ ជាមួយនឹងអ្នករត់តាក់ស៊ី២នាក់ទៀត ដែលត្រូវបានកម្លាំងគណៈបញ្ជាការឯកភាពស្រុកគីរីសាគរខេត្តកោះកុងធ្វើការឃាត់ខ្លួនបញ្ជូនទៅមណ្ឌលចត្តាឡីស័ក ក្រោយពីធ្វើដំណើរចេញពី Condo មួយត្រូវបានអាជ្ញាធរខណ្ឌចំការមនបញ្ជាក់ថា Condo នោះមិនមែនជាទីតាំងដែលមានកូវីដ-១៩នោះទេ ។

លោក ថេង សុថុល អភិបាលខណ្ឌចំការមនបានអះអាងថា Condo ដែលមានទីតាំងក្នុងខណ្ឌចំការមន ខុនដូមួយនេះ មិនមែនជាទីតាំងដែលមានកូវីដ-១៩នោះទេ ហើយទីតាំងដែលអាជ្ញាធររាជធានីភ្នំពេញបិទពាក់ព័ន្ធនឹងព្រឹត្តិការណ៍សហគមន៍ ២០កុម្ភៈនោះ គឺវីឡាF22 នៅជិតនិង Condo នេះប៉ុណ្ណោះ ។

គួររំលឹកថា ជនជាតិចិនប្រុសស្រី៨នាក់ និងអ្នករត់តាក់ស៊ី ពីរនាក់ត្រូវបាន កម្លាំងគណៈ បញ្ជាការឯកភាពស្រុកគីរីសាគរ ខេត្តកោះកុងធ្វើការឃាត់ខ្លួននិងបញ្ជូនទៅមណ្ឌលចត្តាឡីស័ក ក្រោយពីធ្វើដំណើរចេញពីភ្នំពេញ និងក្រោយពីទទួលបានព័ត៌មានពីវត្តមានរបស់ជនជាតិចិន ពុំមានឯកសារ សម្គាល់ខ្លួន ។ប្រតិបត្តិការនេះធ្វើឡើងកាលពីវេលា ម៉ោង ១១និង១៥នាទីយប់ថ្ងៃទី ២៧ ខែ កុម្ភៈ ឆ្នាំ២០២១ ដឹកនាំដោយលោក ទួន ឪទីអភិបាលរងស្រុកគីរីសាគរ ខេត្តកោះកុង ហើយបច្ចុប្បន្ន អ្នកទាំង១០នាក់ ត្រូវសមត្ថកិច្ច ប្រគល់ជូន គ្រូពេទ្យ មណ្ឌល សុខភាពកូនកុក ដើម្បីធ្វើច ត្តាឡីស័ករយៈពេល១៤ថ្ងៃ៕

អត្ថបទ៖ ស្រី រ័ត្ន