កីឡា

ក្លិបប្រដាល់ខ្លះពិតជាទទួលបានតម្លៃ៥០០ដុល្លារមែនពីម្ចាស់ឧបត្ថម្ភកម្មវិធី

បានផុស

១ year មុន

នៅ

ថ្ងៃអង្គារ ២៨ មករា ២០២៥

ដោយ

តាមគោលការណ៍ សហព័ន្ធកីឡាប្រដាល់គុនខ្មែរបានកំណត់ជាយូរមកហើយ ម្ចាស់ក្លិបអាចទទួលបានតម្លៃ១៥ដុល្លាររាល់ការបញ្ចូលកីឡាករ កីឡាការិនីម្នាក់ទៅប្រកួតនៅសង្វៀនប្រដាល់ណាមួយ។

តាមលេចឮដំណឹងតគ្នា និងពីម្ចាស់ក្លិបផ្ទាល់គឺមានម្ចាស់ឧបត្ថម្ភកម្មវិធីហ៊ានផ្តល់តម្លៃដល់៥០០ដុល្លារដល់ម្ចាស់ក្លិបដើម្បីបានកីឡាករល្បីៗពីក្លិបនេះ។ ប្រការនេះ លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរបានទទួលស្គាល់ថា ពិតជាមានក្លិបខ្លះទទួលបានតម្លៃខ្ពស់រហូតដល់៥០០ដុល្លារមែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ខូវ ឆាយ បានឲ្យដឹងក្នុងបទសម្ភាសមួយក្រោយពេលលោកបានក្លាយជាប្រធានសហព័ន្ធគុនខ្មែរថ្មីថា ៖«ខ្ញុំគិតថា តម្លៃក្លិបមួយចំនួន មកដល់ពេលនេះមិនមែនត្រឹមតែ៦ម៉ឺនរៀល (១៥ដុល្លារ)នោះទេ។ មានព័ត៌មានមកគឺមានកីឡាករខ្លះរហូតដល់៥០០ដុល្លារសម្រាប់តម្លៃក្លិប ដូច្នេះទាក់ទងនឹងតម្លៃខ្លួនក៏ដោយ តម្លៃក្លិបក៏ដោយ ខ្ញុំជឿជាក់ថា ស៊ីសងទៅលើសមត្ថភាពរបស់កីឡាករ»។

«ការងារនេះគឺជាទីផ្សារសេរី យើងមិនអាចកំណត់ចំនួនឲ្យទៅក្លិប ដៃគូអភិវឌ្ឍ ឬស្ថានីយ៍ទូរទស្សន៍ ដែលរៀបចំកម្មវិធីធ្ងន់ពេកទេ។ ពីព្រោះបើដាក់ទម្ងន់ធ្ងន់ពេក កម្មវិធីមួយចំនួនអត់អាចធ្វើទៅបានទេ។ ដូចជាកម្មវិធីថ្នាលជាដើមគឺមិនអាចធ្វើទៅបានទេ។ អីចឹងបើកសិទ្ធិឲ្យចរចាគ្នារវាងដៃគូអភិវឌ្ឍជាមួយនឹងក្លិប។ កម្មវិធីមួយចំនួនដែលធំ កីឡាករមួយចំនួនដែលល្បី ខ្ញុំជឿជាក់ថា តម្លៃក្លិបតាមខ្ញុំដឹង តម្លៃខ្លួនអាចឈានដល់៥០០ដុល្លារ»។

ប្រសិនបើក្លិបមួយមានកីឡាករ កីឡាការិនីចេញប្រកួតកាន់តែច្រើននាក់ ក្លិបនោះរឹតតែទទួលបានថវិកាច្រើន។ ទោះបីជាយ៉ាងណា ម្ចាស់ឧបត្ថម្ភកម្មវិធីប្រដាល់ដែលចង់បានកីឡាករល្បីៗពីក្លិបណាមួយញឹកញាប់ ឬច្រើននាក់ គឺអាចចរចាជាមួយម្ចាស់ក្លិបតាមរយៈការផ្តល់តម្លៃដល់ក្លិបខ្ពស់គឺចាប់ពី១៥ដុល្លារឡើងក្នុងម្នាក់។

ប្រការនេះមានន័យថា ម្ចាស់ឧបត្ថម្ភកម្មវិធីប្រដាល់នីមួយៗត្រូវចំណាយច្រើនណាស់ ដូចជាតម្លៃខ្លួនរបស់កីឡាករ កីឡាការិនី តម្លៃឲ្យក្លិបដែលជាអ្នកគ្រប់គ្រង និងបណ្តុះបណ្តាលកីឡាករ កីឡាការិនី តម្លៃអ្នកចាប់គូជាតិ និងអន្តរជាតិ តម្លៃគណៈកម្មការរៀបចំការប្រកួត តម្លៃដល់ម្ចាស់ស្ថានីយ៍ទូរទស្សន៍ និងតម្លៃផ្សេងៗទៀត៕