ព័ត៌មានអន្ដរជាតិ

មេដឹកនាំវៀតណាម ជំរុញស្ថាប័នរដ្ឋាភិបាលឱ្យត្រៀមសម្រាប់សង្រ្គាមពាណិជ្ជកម្មពិភពលោក

បានផុស

១ year មុន

នៅ

ថ្ងៃព្រហស្បតិ៍ ៦ កុម្ភៈ ២០២៥

ដោយ

នាយករដ្ឋមន្ត្រីវៀតណាម លោក ផាម មិញឈិញ បានអំពាវនាវឱ្យស្ថាប័នរដ្ឋនានារៀបចំផែនការដើម្បីដោះស្រាយបញ្ហាដែលអាចកើតមាន ជុំវិញលទ្ធភាពនៃសង្រ្គាមពាណិជ្ជកម្មពិភពលោកនៅឆ្នាំនេះ ចំពេលស្ថានភាពសេដ្ឋកិច្ចសកលស្ថិតក្នុងភាពស្រពិចស្រពិលដោយសារតែគោលនយោបាយពន្ធគយរបស់អាមេរិក។ នេះបើតាមការចុះផ្សាយរបស់កាសែត VnExpress។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបាននិយាយក្នុងកិច្ចប្រជុំមួយកាលពីថ្ងៃពុធថា ការវិវត្តនៃស្ថានភាពសេដ្ឋកិច្ច ជាពិសេសពាក់ព័ន្ធនឹងដៃគូពាណិជ្ជកម្មសំខាន់ៗដូចជាសហរដ្ឋអាមេរិក និងប្រទេសចិន នឹងមានឥទ្ធិពលផ្ទាល់ទៅលើការនាំចេញ ការផលិត និងសកម្មភាពអាជីវកម្មរបស់វៀតណាម។

លោកថ្លែងថា៖ «សង្គ្រាមពាណិជ្ជកម្មពិភពលោកនឹងរំខានដល់សង្វាក់ផ្គត់ផ្គង់ និងកាត់បន្ថយទីផ្សារនាំចេញរបស់វៀតណាម» ខណៈជំរុញឲ្យស្ថាប័នរដ្ឋាភិបាលតាមដានស្ថានការណ៍យ៉ាងដិតដល់។

ការព្រមានរបស់លោក ឈិញ ធ្វើឡើង ក្រោយក្រសួងផែនការ និងការវិនិយោគចេញរបាយការណ៍មួយ ដោយបានគូសបញ្ជាក់ផងដែរស្ដីពីហានិភ័យ នៃ «សង្រ្គាមពន្ធគយសកលថ្មី»។ របាយការណ៍នោះនិយាយថា ហានិភ័យកើតចេញពីការលេចឡើងនៃបញ្ហាប្រឈមថ្មី ជាពិសេសគោលនយោបាយដែលមិនអាចទាយទុកជាមុនបានពីសហរដ្ឋអាមេរិក និងប្រតិកម្មពីប្រទេសដទៃទៀត។

ជាក់ស្ដែង ប្រធានាធិបតីអាមេរិក លោក ដូណាល់ ត្រាំ បានប្រកាសដាក់ពន្ធ ២៥ ភាគរយ លើទំនិញនាំចូលពីកាណាដា និងម៉ិកស៊ិក ប៉ុន្តែផ្អាកវិញរយៈពេល ៣០ ថ្ងៃ ក្រោយចរចាគ្នា បន្ទាប់ពីប្រទេសទាំង២ប្រកាសសងសឹកជាមួយនឹងវិធានការដូចគ្នា។ យ៉ាងណាមិញ ពន្ធ ១០ ភាគរយ លើចិន នៅតែបន្តចូលជាធរមានចាប់តាំងពីថ្ងៃអង្គារ ដែលបង្កការឆ្លើយតបពីចិន ដោយការដំឡើងពន្ធលើទំនិញអាមេរិកផងដែរ ដែលការណ៍នេះហើយដែលធ្វើឱ្យជម្លោះពាណិជ្ជកម្មអាមេរិក-ចិន កើនកម្ដៅជាថ្មី។

ជាមួយគ្នានោះ អស្ថិរភាព និងជម្លោះបន្តកើនឡើងក្នុងប្រទេស និងតំបន់មួយចំនួន ខណៈសេដ្ឋកិច្ចពិភពលោកកំពុងងើបឡើងវិញយឺតៗ និងខ្វះស្ថិរភាព។ កត្តាទាំងនេះប៉ះពាល់ដល់ការងើបឡើងវិញ និងកំណើនសេដ្ឋកិច្ចរបស់វៀតណាម ជាពិសេសការនាំចេញ៕