ចេន ៖ កុំបណ្តោយឱ្យអ្នកសិល្បៈមានគុណភាព​ឯកាហើយយកចិត្តទុកដាក់តែអ្នកសិល្បៈដែលគ្មានគុណភាព

តារាចម្រៀង Original Song លោក ចេន បានបង្ហោះខ្លឹមសារមួយពាក់ព័ន្ធនឹងអ្នកសិល្ប:ធ្វើឱ្យមហាជនមានការចាប់អារម្មណ៍ចំពោះខ្លឹមសារលើកឡើងរបស់លោកដោយតារារូបនេះ ស្នើថា បណ្តោយឱ្យអ្នកសិល្ប:មានគុណភាពឯកាទៅយកចិត្តទុកដាក់សិល្បៈដែលគ្មានគុណភាព។

ជាការពិត លោក ចេន (Chen) គឺជាតារាចម្រៀង Original Song ដែលមានប្រជាប្រិយគួរសមនៅក្នុងប្រទេសកម្ពុជា ខណ:ទីផ្សារគាំទ្រនៅតែរក្សាបានច្រើនពីសំណាក់មិត្តៗយុវវ័យគ្រប់ស្រទាប់។ ម្យ៉ាងទៀត តារាប្រុសរូបនេះ តែងបញ្ចេញស្នាដៃបទថ្មីៗដើម្បីតម្រូវតាមទីផ្សារសិល្ប:ផងដែរ។

ដោយឡែកងាកមកចាប់អារម្មណ៍សំណេររបស់តារា ចម្រៀងប្រុសលោក ចេន បានរៀបរាប់ថា លោកមិនដែលនិយាយទេ នេះលើកទី១ សូមកុំបណ្តោយឱ្យអ្នកសិល្បៈមានគុណភាពឯកា ហើយទៅយកចិត្តទុកដាក់សិល្បៈដែលគ្មានគុណភាពរឡែរឡរអឿឆ្មើង មកលឿនទៅលឿន គ្មានភាពជា professional ។

ទោះបីមានការបញ្ចេញខ្លឹមសារហាក់អន់ចិត្តបែបនេះក្តី ប៉ុន្តែគេពុំដឹងទេថាតារាចម្រៀង ចេន ហាក់អន់ចិត្តឬមានរឿងកើតទុកមិនសុខចិត្ត ទៅលើសិល្បកររូបណានោះទេ ខណ:ដែលមានអ្នកគាំទ្រនិងប្រើប្រាស់បណ្តាញសង្គមហ្វេសប៊ុកមួយចំនួនបានបញ្ចេញមតិវែកញែកស្ទើរគ្រប់គ្នា៕ អត្ថបទ៖ ចាន់រ៉ា