ព័ត៌មានអន្ដរជាតិ

ថៃ ព្រមានពលរដ្ឋឲ្យប្រុងប្រយ័ត្នចំពោះថ្នាំញៀន «Labubu» ក្រោយមនុស្សស្លាប់២នាក់

បានផុស

១ ខែ មុន

នៅ

ថ្ងៃសៅរ៍ ១៩ មេសា ២០២៥

ដោយ

Chheang

មន្ត្រីសុខាភិបាលថៃ បានចេញការព្រមានជាបន្ទាន់មួយ ទាក់ទងនឹងការលេចឡើងនៃគ្រឿងញៀនដ៏គ្រោះថ្នាក់ម៉្យាងដែលគេឲ្យឈ្មោះថា «Labubu» ក្នុងអំឡុងពេលប្រទេសអាស៊ានមួយនេះកំពុងប្រារព្ធពិធីបុណ្យចូលឆ្នាំថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់ The Thaiger កាលពីថ្ងៃទី១៨ខែមេសា មជ្ឈមណ្ឌលស្រាវជ្រាវថ្នាំពុល Ramathibodi បានរាយការណ៍ថា ថ្នាំនេះបានបណ្តាលឲ្យមានអ្នកស្លាប់ចំនួន ២នាក់រួចមកហើយ ហើយបានធ្វើឲ្យមនុស្សម្នាក់ទៀតស្ថិតក្នុងស្ថានភាពធ្ងន់ធ្ងរ។

សារធាតុញៀន ឬថ្នាំសប្បាយដែលហៅថា «Labubu» ត្រូវបានកែច្នៃឲ្យមានពណ៌បៃតង និងពណ៌ខៀវ ដែលមានប្រវែងប្រហែល ១៣មិល្លីម៉ែត្រ និងទទឹង ៦មិល្លីម៉ែត្រ។ ការរចនាឲ្យដូចរូបតុក្កតា «Labubu» នេះត្រូវបានគេជឿថាជាការប៉ុនប៉ងដោយចេតនា ដើម្បីទាក់ទាញមនុស្សវ័យក្មេងឲ្យប្រើប្រាស់កាន់តែច្រើន។

អាជ្ញាធរថៃបានតាមដានការចែកចាយថ្នាំញៀនទាំងនេះនៅក្នុងខេត្តមួយចំនួន រួមមាន ឈៀងរ៉ៃ អយុធ្យា និងភូកេត។ ការរកឃើញដំបូងនេះ ធ្វើឡើងអំឡុងពេលប៉ូលិសឆ្មក់ចូលហាងខារ៉ាអូខេមួយកន្លែងក្នុងសង្កាត់ Muang នៃខេត្តឈៀងរ៉ៃ ជាទីកន្លែងដែលថ្នាំញៀនជាច្រើនប្រភេទដែលមានរាងដូចតួអង្គតុក្កតា Labubu ត្រូវបានរឹបអូស។

ជាការឆ្លើយតបទៅនឹងការផ្ទុះឡើងនេះ អគ្គស្នងការរងនគរបាលជាតិ លោក Kittiratt Phanphet បានបញ្ជាឲ្យស៊ើបរកប្រភពនៃគ្រឿងញៀននេះ និងបើកការស៊ើបអង្កេតទ្រង់ទ្រាយធំទៅលើបណ្តាញក្រុមគ្រឿងញៀនខុសច្បាប់ ដែលពាក់ព័ន្ធនឹងការផលិត និងចែកចាយប្រភេទថ្នាំញៀន Labubu។

អាជ្ញាធរសុខាភិបាលអំពាវនាវដល់សាធារណជនឲ្យមានការប្រុងប្រយ័ត្នខ្ពស់ និងរាយការណ៍ពីសារធាតុគួរឲ្យសង្ស័យមកប៉ូលិស។ ឪពុកម្តាយត្រូវបានណែនាំជាពិសេសឲ្យអប់រំកូនរបស់ពួកគេ អំពីគ្រោះថ្នាក់នៃការទទួលយកវត្ថុដែលមិនធ្លាប់ស្គាល់ ជាពិសេសរបស់ដែលស្រដៀងនឹងស្ករគ្រាប់ ឬរបស់ក្មេងលេង ដើម្បីការពារការទទួលទានសារធាតុគ្រោះថ្នាក់ដោយចៃដន្យ៕

ដោយ៖ ឈាង

Related Topics:ប្រទេសថៃ