ការនាំចូលពីចិន​របស់អាមេរិក​តាម​សមុទ្រ ធ្លាក់ចុះជិត ៣០% ខែមុន ដោយការដំឡើងពន្ធ

ការនាំចូលរបស់សហរដ្ឋអាមេរិក​នូវទំនិញចិន​ដែលដឹកតាមកុងតឺន័រ បាន​ធ្លាក់ចុះប្រមាណ ២៨,៣ ភាគរយ កាលពីខែមិថុនា ​ដោយសារតែការដំឡើងពន្ធរបស់ប្រធានាធិបតី ដូណាល់ ត្រាំ ​លើដៃគូពាណិជ្ជកម្មតាមផ្លូវសមុទ្រដ៏ធំមួយ​នេះរបស់សហរដ្ឋអាមេរិក​។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

ទិន្នន័យ​ពីក្រុមហ៊ុនទិន្នន័យ Descartes បា​នបង្ហាញថា ការនាំចូលតាមកុងតឺន័រសរុបរបស់សហរដ្ឋអាមេរិកទាំងមូល បានធ្លាក់ចុះ ៣,៥ ភាគរយ នៅខែមិថុនា ធៀប​នឹង​រយៈពេល​ដូចគ្នាឆ្នាំមុន​ មកត្រឹម ២,២ លាន TEUs (Twenty Equivalent Unit​)។ ក្នុងនោះ ការនាំចូលពីចិនមាន​ត្រឹម ៦៣៩ ៣០០ TEUs​។

ចំណែក​នៃការ​នាំ​ចូល​​ពី​ចិន​របស់​អាមេរិក​ ​មាន​ប្រមាណ ២៨,៨ ភាគរយ​ ក្នុង​ខែ​មិថុនា ពោល​គឺ​នៅ​ក្រោម​កម្រិត​ខ្ពស់​បំផុត​ ក្នុងនៅ​ខែ​កក្កដា ឆ្នាំ ២០២៤ ​(៤០ ភាគរយ)។ ជាលទ្ធផល ការនាំចូលដ៏ពេញនិយមពី​ចិន រាប់​ចាប់តាំងពីគ្រឿងសង្ហារឹម និងប្រដាប់ក្មេងលេង រហូតដល់វាយនភណ្ឌ និងស្បែកជើងបានធ្លាក់ចុះកាលពីខែមុន។

​ក្នុងពេល​ដំណាល​គ្នា​នោះ​ ការនាំចូលពី​អាស៊ីអាគ្នេយ៍មួយចំនួន រួមទាំងវៀតណាម ឥណ្ឌូណេស៊ី និងថៃ បានកើនឡើង ខណៈ​អ្នកលក់រាយ និង​ក្រុមហ៊ុន​នាំចូលផ្សេងទៀត បានបង្វែរប្រភពផ្គត់ផ្គង់ចម្រុះ។

អ្នកជំនាញ​មើលឃើញថា ភាព​ស្រពិចស្រពិលនៃពន្ធគយបច្ចុប្បន្ន នឹង​បន្តជះឥទ្ធិពលលើការនាំចូលពីចិន​របស់អាមេរិក​។

គួររំ់ឭកថា មហាអំណាចសេដ្ឋកិច្ចអាមេរិក និងចិន​ បាន​ធ្លាក់ចូលទៅក្នុងសង្រ្គាមពាណិជ្ជកម្មពន្ធគយទ្រង់ទ្រាយធំ ក្រោយ​ ត្រាំ ប្រកាសពន្ធបដិការនៅដើមខែមេសា។ ចិនឆ្លើយតប ដោយ​ដាក់ពន្ធសងសឹក​ជាបន្តបន្ទាប់​ដល់ ១២៥ ភាគរយ ខណៈអាមេរិក​ដំឡើងជាបន្តបន្ទាប់ដល់ ១៤៥ ភាគរយ។ យ៉ាងណាមិញ ភាគីទាំង២ បាន​ព្រមព្រៀងនៅពាក់កណ្ដាលខែឧសភា លើការបញ្ចុះ​ពន្ធចំនួន​ ១១៥ ភាគរយ រៀងៗខ្លួន ដោយ​អនុវត្តពន្ធទាបជាបណ្ដោះអាសន្នរយៈពេល ៩០ ថ្ងៃ៕