សេដ្ឋកិច្ច

កម្ពុជា គ្រោងនាំចេញក្រពើជាង ១០០០ ក្បាល បន្ថែមទៀតទៅទីផ្សារចិន

បានផុស

៩ ខែ មុន

នៅ

ថ្ងៃចន្ទ ១ កញ្ញា ២០២៥

ដោយ

អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោក ឃឹម ហ្វីណង់ បានឱ្យដឹងថា កម្ពុជាគ្រោងបន្តនាំចេញក្រពើជំទង់ជាង ១០០០ ក្បាលបន្ថែមទៀត ទៅកាន់ទីផ្សារប្រទេសចិននៅខែកញ្ញា ឬខែតុលា ឆ្នាំ ២០២៥ បន្ទាប់ពីបាននាំចេញក្រពើជំទង់ និងកូនក្រពើជាង ៧០០០ ក្បាលរួចហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឃឹម ហ្វីណង់ បានបញ្ជាក់ថា៖ «នៅដើមឆ្នាំ២០២៥ មានក្រុមហ៊ុនចិន (SIEM REAP KOWLOON INTERNATIONAL TRADE COMPANY LIMITED) ដែលបានសហការជាមួយសហគមន៍កសិកម្មអ្នកចិញ្ចឹមក្រពើពួកមានជ័យ គឺបាននាំចេញក្រពើជំទង់ប្រមាណ ១ ១០០ក្បាល ទៅកាន់ប្រទេសចិន និងក្រោយចុះពីធីសារ ក្រុមហ៊ុនបាននាំកូនក្រពើ ៦ ០០០ក្បាលចេញបន្ថែមទៀត។ កម្ពុជាក៏នឹងគ្រោងបន្តនាំចេញក្រពើជំទង់ជាង ១០០០ក្បាលទៀត នាខែកញ្ញា ឬតុលា ឆ្នាំ២០២៥ ខាងមុខនេះ»។

អ្នកនាំពាក្យរូបនេះ បានបន្តថា ខាងសហគមន៍កសិកម្មអ្នកចិញ្ចឹមក្រពើសៀមរាបអង្គរបាននាំចេញក្រពើជំទង់ ១០០០ ក្បាល ទៅកាន់ប្រទេសវៀតណាមរួចហើយ និងបន្តនាំ ១០០០ ក្បាល ១ទៀតក្នុងពេលឆាប់ៗនេះ។

សូមជម្រាបថា ក្នុងអំឡុងដំណើរទស្សនកិច្ចមកប្រទេសកម្ពុជាកាលពីថ្ងៃទី១៧ ដល់ ១៨ ខែមេសា ឆ្នាំ២០២៥ កន្លងទៅថ្មីៗនេះ របស់ប្រធានាធិបតីចិន លោក ស៊ី ជិនពីង គឺបានការចុះហត្ថលេខាលើឯកសារពិធីសារចំនួន ៣ ក្នុងការនាំចេញផលិតផលកសិកម្មចំនួន ៣ មុខរបស់កម្ពុជា ដូចជា ក្រពើ សំបុកត្រចៀកកាំ និងផ្លែទុរេនស្រស់ ទៅកាន់ទីផ្សារប្រទេសចិន។

កសិដ្ឋានក្រពើមួយចំនួនធំ ជាសមាជិកសហគមន៍អ្នកចិញ្ចឹមក្រពើចំនួន ២ ដែលបានចុះបញ្ជីទទួលស្គាល់ដោយមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប គឺសហគមន៍កសិកម្មអ្នកចិញ្ចឹមក្រពើសៀមរាបអង្គរ និងសហគមន៍កសិកម្មអ្នកចិញ្ចឹមក្រពើពួកមានជ័យ៕