ចិនរំពឹងថា កិច្ចព្រមព្រៀងបញ្ចប់សង្គ្រាមនៅ​អ៊ីរ៉ង់ នឹងត្រូវបញ្ជូនទៅ UN ដើម្បី​ភាព​ស្របច្បាប់

រដ្ឋមន្ត្រីការបរទេសចិន លោក វ៉ាង យី បានថ្លែងកាលពីថ្ងៃអង្គារ ទី​២៦ ខែ​ឧសភា ឆ្នាំ​២០២៦ ថា ទីក្រុងប៉េកាំង មានជំនឿចិត្តយ៉ាងមុតមាំថា កិច្ចព្រមព្រៀងមួយ ដើម្បីបញ្ចប់សង្គ្រាមរវាងសហរដ្ឋអាមេរិក អ៊ីស្រាអែល និងអ៊ីរ៉ង់ នឹងត្រូវដាក់ជូនក្រុមប្រឹក្សាសន្តិសុខអង្គការសហប្រជាជាតិ ដើម្បីសុំការអនុម័ត និងគាំទ្រជាផ្លូវការ។

តាម​ទីភ្នាក់ងារ​ព័ត៌មាន Anadolu ចុះផ្សាយ​ថ្ងៃទី​២៦ ឧសភា ការប្រកាសរបស់​មន្ត្រី​ជាន់​ខ្ពស់​ចិន បានធ្វើឡើង ចំពេលដែលមន្ត្រីមកពីសហរដ្ឋអាមេរិក និងបណ្តាប្រទេសផ្សេងទៀត កំពុងបង្ហាញក្តីសង្ឃឹម ចំពោះវឌ្ឍនភាពនៃការរៀបចំកិច្ចព្រមព្រៀងសន្តិភាពនេះឱ្យបានរួចរាល់ជាស្ថាពរ។ លោក វ៉ាង យី ក៏បានសង្កត់ធ្ងន់ដែរថា ចិនចង់ឃើញភាគីពាក់ព័ន្ធទាំងអស់ រក្សាការប្តេជ្ញាចិត្ត ក្នុងការស្វែងរកការឈប់បាញ់ និងបន្តសម្របសម្រួលគ្នាទៅវិញទៅមក ដើម្បីឱ្យសន្តិភាពអាចវិលត្រឡប់មកតំបន់មជ្ឈិមបូព៌ាវិញឱ្យបានឆាប់បំផុត។

ក្នុងសេចក្តីថ្លែងការណ៍មួយនៅទីស្នាក់ការកណ្តាលរបស់អង្គការសហប្រជាជាតិ ក្នុងទីក្រុងញូវយ៉ក លោក វ៉ាង យី បានបញ្ជាក់ថា នៅពេលដែលភាគីនានា អាចឈានដល់កិច្ចព្រមព្រៀងរួមគ្នា វានឹងត្រូវបញ្ជូនទៅកាន់ក្រុមប្រឹក្សាសន្តិសុខ ដើម្បីធានាឱ្យកិច្ចព្រមព្រៀងនោះមានភាពស្របច្បាប់ និងមានអំណាចពេញលេញ ក្នុងការអនុវត្ត។ ចំពេលដែលប្រទេសចិន កំពុងធ្វើជាប្រធានប្តូរវេននៃក្រុមប្រឹក្សាសន្តិសុខអង្គការសហប្រជាជាតិ សម្រាប់ខែឧសភានេះ លោកបានរំលឹកថា ស្ថាប័នអន្តរជាតិមួយនេះ ដែលមានភារកិច្ចការពារសន្តិភាព និងសន្តិសុខពិភពលោក ត្រូវតែបោះជំហានទៅមុខ និងទទួលខុសត្រូវលើកាតព្វកិច្ចរបស់ខ្លួនឱ្យបានហ្មត់ចត់បំផុត។

ស្ថានភាពតានតឹងនៅក្នុងតំបន់មជ្ឈិមបូព៌ា បានផ្ទុះឡើងយ៉ាងខ្លាំង ចាប់តាំងពីសហរដ្ឋអាមេរិក និងអ៊ីស្រាអែល បានបើកការវាយប្រហារលើប្រទេសអ៊ីរ៉ង់ កាលពីចុងខែកុម្ភៈកន្លងទៅ។ ជាការឆ្លើយតប ទីក្រុងតេហេរ៉ង់ បានវាយបកវិញទៅលើអ៊ីស្រាអែល ព្រមទាំងប្រទេសជាសម្ព័ន្ធមិត្តរបស់អាមេរិក នៅក្នុងតំបន់ឈូងសមុទ្រ ហើយថែមទាំងបានបិទច្រកសមុទ្រ Hormuz ដែលជាផ្លូវទឹកដ៏សំខាន់បំផុត សម្រាប់ដឹកជញ្ជូនប្រភពថាមពល និងប្រេងកាតរបស់ពិភពលោកទៀតផង។

ទោះជាយ៉ាងណា បទឈប់បាញ់មួយ បានចាប់ផ្តើមមានប្រសិទ្ធភាពកាលពីថ្ងៃទី៨ ខែមេសា ក្រោមការសម្របសម្រួលពីប្រទេសប៉ាគីស្ថាន ហើយក្រោយមកត្រូវបានលោកប្រធានាធិបតី ដូណាល់ ត្រាំ ប្រកាសពន្យារពេលដោយគ្មានកំណត់។ ជាមួយគ្នានេះដែរ កាលពីថ្ងៃសៅរ៍កន្លងទៅ លោក ត្រាំ បានបង្ហើបឱ្យដឹងថា កិច្ចព្រមព្រៀងជាមួយអ៊ីរ៉ង់ដើម្បីបញ្ចប់សង្គ្រាមនេះ ត្រូវបានចរចាស្ទើរតែទាំងស្រុងហើយ ដោយបច្ចុប្បន្នកំពុងតែរង់ចាំតែការពិនិត្យ និងសម្រេចចុងក្រោយតែប៉ុណ្ណោះ៕

​ប្រែសម្រួល៖ ឈាង