ចិន ព្រមានតៃវ៉ាន់កុំឱ្យលូកដៃ ឬរំខានដល់បេសកកម្មហោះហើររបស់កងទ័ពអាកាសខ្លួន

ភាពតានតឹងនៅច្រកសមុទ្រតៃវ៉ាន់ បានឡើងកម្តៅម្តងទៀត បន្ទាប់ពីក្រសួងការពារជាតិចិន បានចេញមុខព្រមានចំៗទៅកាន់កោះតៃវ៉ាន់ថា មិនគួរមកកាត់មុខកាត់មាត់ ឬមានចំណាត់ការណាមួយ «ជ្រៀតជ្រែក» ដល់បេសកកម្មរបស់កងទ័ពអាកាសក្រុង​ប៉េកាំង ដែលកំពុងធ្វើឡើងនៅក្នុងដែនអាកាសរបស់ខ្លួនឡើយ។

តាម​ការ​ផ្សាយ​របស់ The Strait Times កាល​ពី​ថ្ងៃទី​២៨ ខែ​ឧសភា ឆ្នាំ​២០២៦ ការព្រមានដ៏ក្តៅគគុកនេះ ធ្វើឡើង ដើម្បីឆ្លើយតបទៅនឹងការមិនពេញចិត្ត និងការរអ៊ូរទាំរបស់ទីក្រុងតៃប៉ិ ជុំវិញសកម្មភាពសមយុទ្ធយោធារបស់ចិន ក្នុងរយៈពេលពេញមួយសប្តាហ៍កន្លងមកនេះ។

រដ្ឋាភិបាលទីក្រុងប៉េកាំង តែងតែចាត់ទុកកោះតៃវ៉ាន់ ដែលសព្វថ្ងៃគ្រប់គ្រងតាមបែបប្រជាធិបតេយ្យនោះ ថាជាផ្នែកមួយនៃទឹកដីរបស់ខ្លួន ទោះបីជាមានការប្រឆាំងតវ៉ាយ៉ាងខ្លាំងក្លា ពីសំណាក់រដ្ឋាភិបាលតៃវ៉ាន់ ក៏ដោយ។ ហេតុដូច្នេះហើយ ទើបគេតែងតែឃើញយន្តហោះចម្បាំង និងនាវាចម្បាំងរបស់ចិន បើកការចល័តទ័ព និងធ្វើប្រតិបត្តិការនៅជុំវិញកោះមួយនេះស្ទើរតែរាល់ថ្ងៃ។ កាលពីសប្តាហ៍មុន តៃវ៉ាន់ បានទម្លាយឱ្យដឹងថា ចិនបានបើកយុទ្ធនាការ «ល្បាតត្រៀមប្រយុទ្ធរួមគ្នា» ថែមទាំងបានបង្ហោះរូបថតនាវាចម្បាំង និងយន្តហោះចម្បាំងរបស់ចិន ដែលថតបានដោយយន្តហោះចម្បាំងរបស់តៃវ៉ាន់ផ្ទាល់ទៀតផង។

ជុំវិញរឿងរ៉ាវល្បាតយោធានេះ អ្នកនាំពាក្យក្រសួងការពារជាតិចិន លោក Jiang Bin បានថ្លែងយ៉ាងម៉ឺងម៉ាត់ថា តៃវ៉ាន់គ្រាន់តែជាផ្នែកមួយរបស់ប្រទេសចិន តែប៉ុណ្ណោះ។ លោកបានសង្កត់ធ្ងន់ថា យន្តហោះចម្បាំងរបស់ចិន កំពុងធ្វើសកម្មភាពយោធា នៅក្នុងដែនអាកាសរបស់ចិនផ្ទាល់ ដូច្នេះក្រុមកងទ័ព ដែលគាំទ្រ «ឯករាជ្យភាពតៃវ៉ាន់» គួរតែដកខ្លួនចេញ ហើយបញ្ឈប់រាល់ការជ្រៀតជ្រែក និងការឌឺដងជេរប្រមាថទាំងឡាយណា ដែលនាំឱ្យមានរឿងរ៉ាវវែងឆ្ងាយ។ ជាញឹកញាប់ ចិនតែងតែចាត់ទុក​ប្រធានាធិបតីតៃវ៉ាន់ លោក ឡៃ ឈីងតេ (Lai Ching-te) ថាជា «ជនអនាធិបតេយ្យចង់បំបែករដ្ឋ» ហើយតែងតែទាត់ចោលការសុំចរចារបស់លោកជានិច្ច ខណៈដែលលោក ឡៃ ឈីងតេ ធ្លាប់បានប្រកាសថា មានតែប្រជាជនតៃវ៉ាន់ខ្លួនឯងប៉ុណ្ណោះ ទើបជាអ្នកសម្រេចវាសនាអនាគតរបស់កោះនេះបាន។

លោក Jiang Bin បានបន្ថែមទៀតថា កងទ័ពចិន នឹងបន្តពង្រឹងការហ្វឹកហាត់ និងការត្រៀមលក្ខណៈប្រយុទ្ធឱ្យកាន់តែខ្លាំងក្លា ដើម្បីការពារអធិបតេយ្យភាព និងបូរណភាពទឹកដីរបស់ខ្លួន ព្រមទាំងប្តេជ្ញាកម្ចាត់រាល់សកម្មភាពបំបែករដ្ឋ ឬការលូកដៃពីសំណាក់ពួកបរទេសឱ្យខានតែបាន។ ស្ថានភាពនៅទីក្រុងតៃប៉ិពេលនេះ កំពុងស្ថិតក្នុងភាពប្រុងប្រយ័ត្នខ្ពស់បំផុត ចំពោះចំណាត់ការណាមួយរបស់ចិន ដែលអាចកើតមានឡើង បន្ទាប់ពីប្រធានាធិបតីចិន លោក ស៊ី ជីនពីង បានជួបពិភាក្សាអំពីបញ្ហាតៃវ៉ាន់នេះ ជាមួយប្រធានាធិបតីអាមេរិក លោក ដូណាល់ ត្រាំ នៅក្នុងទីក្រុងប៉េកាំង កាលពីពេលថ្មីៗ។

ក្រៅពីការហោះហើរលើអាកាស តៃវ៉ាន់ក៏បានរាយការណ៍ដែរថា ចិនបានពង្រាយនាវាចម្បាំងជាង ១០០គ្រឿង ចល័តចុះឡើងនៅតាមបណ្តោយខ្សែសង្វាក់កោះទីមួយ ដែលជាតំបន់អូសបន្លាយតាំងពីប្រទេសជប៉ុន ធ្លាក់មកដល់តៃវ៉ាន់ និងរហូតដល់ប្រទេសហ្វីលីពីន។ អ្វីដែលកាន់តែគួរឱ្យបារម្ភនោះ កាលពីចុងសប្តាហ៍មុន កងឆ្មាំសមុទ្ររបស់តៃវ៉ាន់ បានប្រឈមមុខដាក់គ្នាដោយផ្ទាល់ ជាមួយនាវាឆ្មាំសមុទ្ររបស់ចិន នៅក្បែរប្រជុំកោះ Pratas ដែលជាកោះស្ថិតនៅក្រោមការគ្រប់គ្រងរបស់តៃវ៉ាន់ ចំតំបន់ប៉ែកខាងលើនៃសមុទ្រចិនខាងត្បូង ដែលធ្វើឱ្យស្ថានការណ៍រឹត​តែឡើងកម្តៅខ្លាំងឡើងៗ៕

ប្រែសម្រួល៖ ឈាង