នាយ តាក់ស៊ី ប្រកាសលក់កម្អួតត្រីបាឡែនទម្ងន់ប្រមាណជាង ២០គីឡូ

មហាជនអ្នកគាំទ្រមានការចាប់អារម្មណ៍គ្រប់គ្នា ខណ:សុខៗស្រាប់តែតារាកំប្លែងនាយ តាក់ស៊ី បានចេញមកប្រកាសដាក់លក់គឺកម្អួតត្រីបាឡែនដែលលោកអះអាងថាមានទម្ងន់ប្រមាណជាង ២០គីឡូ។

កម្អួតបាឡែន ឬ Ambergris ត្រូវបានគេចាត់ទុកជាវត្ថុចម្លែកបំផុតកើតឡើងដោយធម្មជាតិ ឬត្រូវបានគេហៅថា «មាសអណ្តែតទឹក» ដែលមានតម្លៃខ្ទង់លានដុល្លារ។ ទោះបីយ៉ាងណានៅរសៀលថ្ងៃទី០២ ខែកញ្ញា ឆ្នាំ២០២៥នេះ តារាកំប្លែងនាយ តាក់ស៊ី បានសរសេរនៅលើទំព័រហ្វេសប៊ុកផ្លូវការរបស់ខ្លួនថាខ្លួនមានកម្អួតត្រីបាឡែនទម្ងន់ប្រមាណជាង២០គីឡូត្រូវការដាក់លក់។

នាយ តាក់ស៊ី បានបញ្ជាក់ថា “ខ្ញុំបាទនាយ តាក់ស៊ី សូមប្រកាសរកបងប្អូនណាដែលមានតម្រូវការ ចង់បានកម្អួតត្រីបាឡែនខ្ញុំមានប្រហែលជា ២០គីឡូដោយថ្លឹងជញ្ជីងថ្លឹងត្រីបើឯកឧត្តមលោកជំទាវ ឬអ្នកឧកញ៉ា នឹងបងប្អូនដែលមានតម្រូវការចង់ទិញចង់បានបងប្អូនអាចទំនាក់ទំនងតាមលេខទូរសព្ទឬ ក៏ឆាតចូលផេកខ្ញុំបាទនាយ តាក់ស៊ី កំប្លែងបាន”។

ជាមួយគ្នានេះនាយ តាក់ស៊ី បានបង្ហាញឲ្យឃើញផងដែរនូវរូបភាពកម្អួតរបស់ត្រីបាឡែនទម្ងន់ប្រមាណជាង ២០គីឡូដែលខ្លួនបានប្រកាសដាក់លក់ ព្រមជាមួយនឹងការធ្វើពិសោធន៍ខណ:នាយបានបញ្ជាក់បន្ថែមថាកម្អួតត្រីបាឡែននេះទើបតែរកបានកាលពីអំឡុងថ្ងៃទីទី១២ ខែសីហា ឆ្នាំ២០២៥ ថ្មីៗកន្លងទៅនេះ៕ ចាន់រ៉ា