កីឡា

ល្ងាចនេះ U19 កម្ពុជា ប៉ះ ថៃ វគ្គពាក់កណ្តាលផ្តាច់ព្រ័ត្រ ខណៈជួបគ្នាចុងក្រោយ ថៃ ខកចិត្តម្តងហើយ

បានផុស

៤ ម៉ោង មុន

នៅ

ថ្ងៃព្រហស្បតិ៍ ១១ មិថុនា ២០២៦

ដោយ

ក្រុមបាល់ទាត់ជម្រើសជាតិកម្ពុជាអាយុ ១៩ ឆ្នាំ ត្រូវតទល់នឹង ក្រុម U19 ថៃ ក្នុងវគ្គពាក់កណ្តាលផ្តាច់ព្រ័ត្រ ពានរង្វាន់យុវជនអាស៊ានអាយុ ១៩ ឆ្នាំ ASEAN U19 Boys’ Championship វេលាម៉ោង ៤ រសៀល ថ្ងៃទី១១ ខែមិថុនា នៅប្រទេសឥណ្ឌូណេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មុនពេលឈានដល់វគ្គពាក់កណ្តាលផ្តាច់ព្រ័ត្រ ក្រុមយុវជនសៀម ធ្វើបានល្អនៅវគ្គសន្សំពិន្ទុក្នុងពូល ដោយបានយកឈ្នះ ព្រុយណេ ៩-០, ឈ្នះ សិង្ហបុរី ៤-០ និងឈ្នះ ម៉ាឡេស៊ី ៣-២ ដើម្បីទទួលបានចំណាត់ថ្នាក់លេខ ១ ក្នុងពូល។ ពួកគេជាក្រុមដែលបានឡើងដល់វគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រច្រើនជាងគេ ប៉ុន្តែបានឈ្នះជើងឯក ៥ លើកស្មើនឹង អូស្ត្រាលី។

ចំណែក ក្រុមយុវជនកម្ពុជា ក៏មិនទាន់ចាញ់ដែរនៅវគ្គសន្សំពិន្ទុពូល ដោយបានឈ្នះ ហ្វីលីពីន ៣-០ និង ស្មើ អូស្ត្រាលី ២-២ រកបាន ៤ ពិន្ទុ ស្មើ អូស្ត្រាលី ប៉ុន្តែស្ថិតនៅលេខ ២ ក្នុងពូល ខណៈ អូស្ត្រាលី ស្ថិតនៅលេខ ១ ក្នុងពូលដោយសារចំណេញគ្រាប់បាល់ច្រើនជាងកម្ពុជា។ ក្រុមយុវជនកម្ពុជា បានឡើងវគ្គពាក់កណ្តាលផ្តាច់ព្រ័ត្រក្នុងនាមជាក្រុមលេខ ២ ល្អបំផុតក្នុងពូល។

នេះជាការឆ្លងផុតវគ្គសន្សំពិន្ទុក្នុងពូល និងបានឡើងទៅកាន់វគ្គពាក់កណ្តាលផ្តាច់ព្រ័ត្រជាលើកដំបូងរបស់ ក្រុម U19 កម្ពុជាក្នុងប្រវត្តិពានរង្វាន់ ASEAN U19 Boys’ Championship ដែលត្រូវបានបង្កើតឡើងជាលើកដំបូងតាំងពីឆ្នាំ ២០០២។

នៅវគ្គពាក់កណ្តាលផ្តាច់ព្រ័ត្រ ក្រុម U19 កម្ពុជា ក្នុងនាមជាក្រុមលេខ ២ ល្អបំផុត ត្រូវជួបជួប ក្រុមលេខ ១ ពូល B គឺ សៀម ខណៈក្រុមលេខ ១ ពូល C គឺ អូស្ត្រាលី ជួបក្រុមលេខ១ ពូល A គឺ ឥណ្ឌូណេស៊ី។

ប្រវត្តិជួបគ្នានៅក្នុងពានរង្វាន់ ASEAN U19 Boys’ Championship រវាង ក្រុមយុវជនកម្ពុជា និង សៀម គឺមានចំនួន ៨ លើកមកហើយ ក្នុងនោះ កម្ពុជា ឈ្នះ ២ លើក និងថៃ ឈ្នះ ៦ លើកដែលសុទ្ធតែជាការជួបគ្នានៅវគ្គសន្សំពិន្ទុក្នុងពូល។

ក្រុម U19 កម្ពុជា បានបង្កើតស្ថិតិជ័យជម្នះជាលើកដំបូងលើ ក្រុមយុវជនសៀម ដោយលទ្ធផល ២-១ កាលពីឆ្នាំ ២០១៩ នៅប្រទេសនៅកម្ពុជា និងឈ្នះ ១ ប្រកួតទៀតដោយលទ្ធផល ៤-៣ ឆ្នាំ ២០១៩ នៅប្រទេសវៀតណាម ខណៈការជួបគ្នា ៦ លើកមុនគឺ កម្ពុជា ចាញ់។

ប្រការនេះមានន័យថា ការជួបគ្នាលើកទី ៧ និងទី៨ គឺជាលទ្ធផលដ៏ល្អបំផុតសម្រាប់ក្រុមយុវជនកម្ពុជា លើ ក្រុមយុវជនសៀម ដូច្នេះ កម្ពុជា មានទាំងកម្លាំងចិត្តពីការឡើងវគ្គពាក់កណ្តាលផ្តាច់ព្រ័ត្រ លើកដំបូង និងលទ្ធផលឈ្នះ ២ លើកចុងក្នុងជំនួបចុងក្រោយ។ ចំណែកថៃវិញច្បាស់ណាស់ នឹងព្យាយាមដើម្បីបង្កើតស្ថិតិល្អឡើងវិញលើកម្ពុជា។

ជំនួបគ្នាលើកទី ៩ នៅរសៀលថ្ងៃនេះមិនត្រឹមតែជាប្រវត្តិសាស្ត្រនៅក្នុងវិស័យកីឡាប៉ុណ្ណោះទេ ប៉ុន្តែនៅក្នុងស្មារតី ឆន្ទៈ និង បេះដូងគឺ លើសពីបាល់ទាត់សម្រាប់ប្រជាជនកម្ពុជា ដោយសារសៀមឈ្លានពាននៅព្រំដែន។ សូមបងប្អូនអ្នកស្នេហាវិស័យកីឡាតាមដាន និងគាំទ្រដល់គោព្រៃជំទងកម្ពុជាឲ្យបានអធិអធមនៅតាមបណ្តាញទំនាក់ទំនងសង្គម៕

អត្ថបទ៖ វិរបុត្រ

Related Topics:ASEAN U19 Championship

សេចក្ដីជូនដំណឹង៦ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា