មន្ទីរទេសចរណ៍ខេត្តរតនគិរី ផ្តល់វគ្គបណ្តុះបណ្តាលផ្នែកបដិសណ្ឋារកិច្ចជូនម្ចាស់អាជីវកម្ម

មន្ទីរទេសចរណ៍ខេត្តរតនគិរី សហការជាមួយអង្គការ SwissContact កំពុងបើកវគ្គបណ្តុះបណ្តាលដោយឥតគិតថ្លៃដល់ម្ចាស់តូបលក់អាហារ ភេសជ្ជៈ និងប្រតិបត្តិករភោជនីយដ្ឋានចំនួន ១៥ នាក់ ដើម្បីបង្កើនគុណភាពសេវាកម្មជូនភ្ញៀវទេសចរ។ វគ្គបណ្តុះបណ្តាលផ្នែកបដិសណ្ឋារកិច្ចឥតគិតថ្លៃនេះ ធ្វើឡើងរយៈពេល ៣ថ្ងៃ ចាប់ពីថ្ងៃទី០៩-១១ ខែ កញ្ញា ឆ្នាំ ២០២៥ នៅវេលាម៉ោង ០៧:៣០ ព្រឹក ដល់ ១៧:០០ ល្ងាច។

លោកស្រី ស៊ុម សុគន្ធា អនុប្រធានមន្ទីរទេសចរណ៍ខេត្តរតនគិរី បានថ្លែងអំណរគុណដល់ អង្គការ SwissContact ដែលបានសហការរៀបចំឱ្យមានវគ្គបណ្តុះបណ្តាលនេះ ដើម្បីផ្តល់ចំណេះដឹងពីវិស័យម្ហូបអាហារ និងបដិសណ្ឋារកិច្ចជូនដល់ម្ចាស់អាជីវកម្មក្នុងមូលដ្ឋាន។ លោកស្រីសង្ឃឹមថា តាមរយៈវគ្គបណ្តុះបណ្តាលនេះ ម្ចាស់អាជីវកម្មនឹងទទួលបានមេរៀនថ្មីៗ និងបទពិសោធផ្នែកម្ហូបអាហារ និងបដិសណ្ឋារកិច្ច សម្រាប់ផ្តល់សេវាកម្មកាន់តែល្អប្រសើរជូនភ្ញៀវទេសចរ។

ចំណែកអ្នកស្រី គង់ នីវ៉ា អ្នកសម្របសម្រួល អង្គការSwissContact មានប្រសាសន៍ថា អង្គការបានគាំទ្រផ្តល់ថវិកាជួយដល់វគ្គបណ្តុះបណ្តាលនេះ ដើម្បីពង្រឹងសមត្ថភាពពួកគេបន្ថែម ក្នុងវិស័យម្ហូបអាហារ ភេសជ្ជៈ និងបដិសណ្ឋារកិច្ច។ អ្នកស្រីចាត់ទុកនេះជាសកម្មមួយ ដើម្បីឱ្យពួកគាត់មានការងារធ្វើ ឬអាចប្រកបអាជីវកម្មជួយដល់ក្រុមគ្រួសារ និងសង្គមជាតិ។

ជាមួយគ្នានេះ លោក ឃុត ហេងលី គ្រូបង្គោលបានប្រាប់ថា វគ្គបណ្តុះបណ្តាលនេះ ផ្តោតទៅម្ចាស់តូបអាហារតាមដងផ្លូវ អ្នកលក់បាយម្ហូប ម្ចាស់ភោជនីយដ្ឋាន។ លោកបន្តទៀតថា គោលបំណងវគ្គនេះផ្តល់ចំណេះដឹងទៅកាន់សិក្ខាកាមដូចជា ការងារជាអ្នកផ្តល់សេវាកម្ម, ការប្រាស្រ័យទាក់ទងក្នុងវិស័យបដិសណ្ឋារកិច្ច , សេវាកម្មប្រណិត, សម្ភារៈប្រើប្រាស់ក្នុងភោជនីយដ្ឋាន, ចំណេះដឹងលើបញ្ជីរមុខម្ហូប, ចំណេះដឹងផ្នែកភេសជ្ជៈ, ជំនាញលក់, ជំនាញផ្តល់សេវាកម្ម, សេវាកម្មភេសជ្ជៈ, លំដាប់លំដោយក្នុងការផ្តល់សេវាកម្មក្នុងភោជនីយដ្ឋាន, និតិវិធីក្នុងភោជនីយដ្ឋាន, អនាម័យ សន្តិសុខ និងសុវត្ថិភាពក្នុងភោជនីយដ្ឋាន។

កញ្ញា នែវ ដួងចាន់ និង លោក ធឿន សុធី ជាជនជាតិដើមភាគតិចទំពួន ជាអ្នកលក់កាហ្វេដូចគ្នា បានប្រាប់កម្ពុជាថ្មីថា មូលហេតុចូលរួមកម្មវិធីនេះ ដើម្បីចង់បានបទពិសោធបន្ថែមពីការឆុងកាហ្វេ និងចំណេះដឹងថ្មីៗ ដើម្បីពង្រីកអាជីវកម្មរបស់ពួកគេឱ្យលក់ដាច់ជាងមុន។

កន្លងទៅមន្ទីរទេសចរណ៍ខេត្តរតនគិរី បានបើកវគ្គបណ្តុះបណ្តាលចំនួន ៣៣ ដង ដែលមានអ្នកចូលរួម ៥៦៣ ស្រី ៣៤៩ រូប ដើម្បីពង្រឹងសមត្ថភាពយុវជន ចាប់យកជំនាញបដិសណ្ឋាកិច្ច និងមគ្គុទ្ទេសក៍នៅខេត្ត សំដៅធ្វើខេត្តមួយនេះរីកចម្រើនឱ្យកាន់តែប្រសើរទៅលើវិស័យទេសចរណ៍ក្នុងស្រុក៕

អត្ថបទ៖ ខៀវ ចាប