រដូវភ្លៀងមកដល់ បង្កើតឱ្យមានចរន្តទឹកនៅតាមអូរ ស្ទឹង អំណោយផលដល់សហគមន៍ជនជាតិដើមភាគតិច រកត្រី

នៅដើមរដូវភ្លៀងឆ្នាំនេះ សហគមន៍ជនជាតិដើមភាគតិចនៅខេត្តរតនគិរី បាននាំគ្នាទៅបង់សំណាញ់ចាប់ត្រីតាមអូរ និងស្ទឹង ដើម្បីយកមកធ្វើម្ហូបក្នុងគ្រួសារ។ សហគមន៍ជនជាតិដើមភាគតិចដែលពឹងផ្អែកទៅលើធនធានធម្មជាតិមកពីភូមិប៉ុង ភូមិកាចូនក្រោម និងភូមិទៀមលើ ក្នុងឃុំកាចូន ស្រុកវើនសៃ បានទៅចាប់ត្រីនៅតាមអូរ ស្ទឹង បន្ទាប់ពីមានភ្លៀងធ្លាក់។ ក្រៅពីរកត្រី ពួកគាត់បានចូលព្រៃដើម្បីបេះបន្លែ ផ្លែឈើយកមកទទួលទាន សល់ពីនេះលក់បន្តដើម្បីជាចំណូលបន្ថែមសម្រាប់គ្រួសារ។

លោក ធុន ថែ ជាកសិករ បានឱ្យដឹងថា ជារៀងរាល់ឆ្នាំ នៅពេលមានភ្លៀងដំបូង លោកតែងត្រៀមសំណាញ់ដើម្បីទៅចាប់ត្រីនៅអូរជិតផ្ទះ។ លោកបញ្ជាក់ថា ឆ្នាំនេះចាប់បានត្រីអណ្តែង ត្រីរ៉ស់ និងត្រីក្រាញ់ ប្រមាណពី១ ទៅ ២គីឡូក្រាម។ ក្រៅពីរកត្រីតាមរដូវកាល ក្នុងរដូវភ្លៀងនេះដែលជាអំណោលផលដល់ការលូតលាស់ផល្លានុផលធម្មជាតិ លោកបានចូលព្រៃដើម្បីបេះបន្លែ ផ្លែឈើទាំងនោះសម្រាប់តម្រូវការក្នុងគ្រួសារ និងលក់ផង។

ស្រដៀងគ្នានេះដែរ លោក គា ជនជាតិដើមភាគតិចគ្រឹង បានលើកឡើងថា លោកមានភាពសប្បាយរីករាយនៅពេលរដូវភ្លៀងធ្លាក់ចូលមកដល់ព្រោះអាចទៅរកត្រីបានច្រើន។ លោកបានរៀបចំសំណាញ់ និងធុងដាក់ត្រីតាំងពីព្រឹកព្រលឹម ហើយចាប់បានត្រីប្រមាណ ៣ គីឡូក្រាម ក្នុងមួយថ្ងៃ។ លោកបញ្ជាក់ថា ប្រសិនបើរកត្រីបានច្រើន គ្រួសារនឹងយកទៅស្លជាមួយផ្សិត និងបន្លែព្រៃ ហើយខ្លះអាចលក់ឱ្យឈ្មួញដើម្បីរកចំណូលបន្ថែម។ ទោះជាយ៉ាងណា លោកក៏កត់សម្គាល់ថា ធនធានត្រីឆ្នាំនេះមានការថយចុះបន្តិចសម្រាប់នៅតំបន់ដែលលោករស់នៅ បើប្រៀបធៀបនឹងឆ្នាំមុនដែលអាចចាប់បានរហូតដល់ ៥ គីឡូក្រាម។

ប្រជាពលរដ្ឋនៅតំបន់នេះ បានឱ្យដឹងថា រដូវភ្លៀងដំបូង គឺជាពេលវេលាអំណោយផលសម្រាប់ការរកត្រី ផ្សិត និងបន្លែព្រៃ ដើម្បីផ្គត់ផ្គង់ជីវភាពប្រចាំថ្ងៃ ខណៈសហគមន៍ជនជាតិដើមភាគតិចនៅតែបន្តពឹងផ្អែកលើធនធានធម្មជាតិសម្រាប់ការរស់នៅ៕

ដោយ៖ ខៀវ ចាប