សាលាមធ្យមវិចិត្រសិល្បៈ ជ្រើសរើសសិស្សចូលរៀនឥតបង់ថ្លៃ ៥មុខជំនាញ សម្រាប់ឆ្នាំសិក្សា ២០២២-២០២៣

សាលាមធ្យមវិចិត្រសិល្បៈនៃក្រសួងវប្បធម៌ និងវិចិត្រសិល្បៈ កំពុងប្រកាសជ្រើសរើសសិស្សានុសិស្សប្រឡងចូលរៀននៅសាលានេះដោយឥតគិតថ្លៃ សម្រាប់ឆ្នាំ២០២២-២០២៣ លើមុខជំនាញ៥មុខ។ ការជ្រើសរើសនេះ នឹងផុតកំណត់ការទទួលពាក្យនៅថ្ងៃទី១៥ ខែធ្នូ ឆ្នាំ២០២២។

មុខជំនាញដែលសិក្សាឥតគិតថ្លៃនៅសាលាមធ្យមវិចិត្រសិល្បៈមានដូចជា ជំនាញសិល្បៈនៅសាលាតូរ្យតន្រ្តី សាលារបាំ សាលាល្ខោន សាលាសៀក និងសាលាសិល្បៈសូនរូប។ ចំពោះវិញ្ញាសារប្រឡង គឺបែងចែកជា២។ ទី១ វិញ្ញាសារប្រឡងចំណេះដឹងទូទៅ និងវិញ្ញាសារប្រឡងតាមបច្ចេកទេសជំនាញ។

ចំពោះវិញ្ញាសារប្រឡងចំណេះដឹងទូទៅ គឺតម្រូវឲ្យប្រឡងនូវមុខវិជ្ជាពីរគឺ មុខវិជ្ជាភាសាខ្មែរ និងគណិតវិទ្យា។ ដោយឡែក សម្រាប់សិស្សរៀនចប់ថ្នាក់ទី៣ ឬ ទី៤ ត្រូវប្រឡងវិញ្ញាសារទាំងពីរមុខវិជ្ជា រយៈពេល១ម៉ោង តាមកម្មវិធីសិក្សាថ្នាក់ទី៣ របស់ក្រសួងអប់រំ។ សិស្សរៀនចប់ថ្នាក់ទី៥ ឬ ទី៦ ប្រឡងរយៈពេល ១ម៉ោង ៣០នាទី តាមកម្មវិធីសិក្សាថ្នាក់ទី៥ របស់ក្រសួងអប់រំ។ ចំពោះសិស្សរៀនចប់ថ្នាក់ទី៧ ត្រូវប្រឡងរយៈពេល២ម៉ោង តាមកម្មវិធីសិក្សាថ្នាក់ទី៧ របស់ក្រសួងអប់រំ។

មួយវិញទៀត ចំពោះការប្រឡងតាមបច្ចេកទេសជំនាញវិញ គឺប្រឡងតាមសមត្ថភាពនៃបច្ចេកទេសជំនាញនីមួយៗ ក្នុងនោះជំនាញតូរ្យតន្ត្រី ជំនាញរបាំ ជំនាញល្ខោន និងជំនាញសៀកត្រូវធ្វើតេស្តរយៈពេល ១០នាទី ទៅ១៥នាទី។ រីឯ ជំនាញសូនរូប គឺត្រូវធ្វើតេស្តរយៈពេល ៣ម៉ោង។

ជាមួយគ្នានោះដែរ សំណុំបែបបទដែលត្រូវបំពេញពាក្យចូលប្រឡង គឺតម្រូវឲ្យមានេកសារដូចជា ពាក្យសុំ និងបង្កាន់ដៃចូលប្រឡង ប្រវត្តិរូបសង្ខេប សៀវភៅតាមដានការសិក្សា​ ឬ លិខិតបញ្ជាក់ការសិក្សា ជាមួយនឹងរូបថត  ៤x៦ ចំនួន៣សន្លឹក។

គួរបញ្ជាក់ថា សិស្សដែលមានបំណងចង់ធ្វើការប្រឡងត្រូវមកទទួលពាក្យប្រឡងនៅការិយាល័យសិក្សានៃសាលាមធ្យមវិចិត្រសិល្បៈ ស្ថិតនៅវិថីបណ្ឌិតម៉ុងឬទ្ធី (១៩២៨) ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ កាលបរិច្ឆេទប្រឡងគឺនៅថ្ងៃទី២០ ខែធ្នូ ឆ្នាំ២០២២៕

ដោយ៖ អុន ស្រីមាន