ត្រៀមខ្លួនចូលរួម សង្ក្រាន្តសាលាមធ្យមវិចិត្រសិល្បៈ ដើមខែមេសា

ដោយទទួលបានការអនុញ្ញាតពី បណ្ឌិតសភាចារ្យរដ្ឋមន្ត្រី ក្រសួងវប្បធម៌ និងវិចិត្រសិល្បៈ សាលាមធ្យមវិចិត្រសិល្បៈ នឹងរៀបចំ កម្មវិធីអបអរសាទរពិធីបុណ្យចូលឆ្នាំថ្មីប្រពៃណីជាតិ នៅថ្ងៃទី ០១-០២ ខែមេសា ឆ្នាំ២០២៤ ដោយសាធារណៈជន អាចចូលកម្សាន្ត ទស្សនាដោយឥតគិតថ្លៃ។

បើតាមការផ្ដល់ដំណឹងពី សាលាមធ្យមវិចិត្រសិល្បៈ នៅថ្ងៃទី១២ ខែមីនា ឆ្នាំ២០២៤ នេះ បានបញ្ជាក់ថា កម្មវិធីនេះ បង្កើតឡើងក្នុងគោលបំណងដើម្បីបង្កើនការផ្សព្វផ្សាយ និងការយល់ដឹងពីសិល្បៈវប្បធម៌ជូនសាធារណៈជនទូទៅ ក៏ដូចជាដើម្បីបង្ហាញអំពីការបង្ហាត់បង្រៀនរបស់លោកគ្រូ អ្នកគ្រូ និងការហាត់រៀនរបស់សិស្សានុសិស្ស។

កម្មវិធី នឹងមានការតាំងពិពរណ៍ស្នាដៃសិល្បៈរបស់សិស្សានុសិស្ស និងមានការចូលរួមពីខាងសិប្បកម្មផ្សេងៗនៅក្នុងរាជធានី និងបណ្តាខេត្តមួយចំនួន ជាពិសេសមានការសម្តែងសិល្បៈទស្សនីយភាពគ្រប់ទម្រង់ ដោយសិស្សានុសិស្ស ក៏ដូចជាសិល្បករ សិល្បៈការិនី និងតារាល្បីៗដែលជាអតីតសិស្សសាលាមធ្យមវិចិត្រសិល្បៈ ព្រមទាំងមានការប្រគំតន្ត្រី (តន្ត្រីបុរាណ-តន្ត្រីសម័យ)។

កម្មវិធីទស្សនីយភាពខាងលើរៀបចំ ដើម្បីបង្ហាញជូននូវសិល្បៈវប្បធម៌ ប្រពៃណីដ៏ល្អផូរផង់របស់ខ្មែរ ស្របតាមពាក្យស្លោក “ការថែរក្សា អភិរក្ស បេតិកភណ្ឌវប្បធម៌ គឺជាភារកិច្ចរបស់កូនខ្មែរគ្រប់ៗរូប”៕