ស្របពេលដែលប្រជាពលរដ្ឋកម្ពុជាកំពុងពេញនិយមការពិសារកាហ្វេជាប្រចាំ និងកំណើននៃការនាំចូលគ្រាប់កាហ្វេពីក្រៅប្រទេសខ្ពស់ វិនិយោគិនក្នុងស្រុកម្នាក់បានសម្រេចចិត្តបោះទុនជាង១លានដុល្លារចាប់តាំងកាលពីដើមឆ្នាំ២០២៦​ ដើម្បីកសាងស្លាកយីហោកាហ្វេផ្ទាល់ខ្លួនឈ្មោះថា គីរីកាហ្វេ (Kiri Coffee) ដោយបានធ្វើការប្រមូលទិញគ្រាប់កាហ្វេពីបងប្អូនប្រជាកសិករ ជាជនជាតិដើមភាគតិច នៅក្នុងខេត្តមណ្ឌលគិរីបានជិត ១០០០តោន ដើម្បីប្រកួតប្រជែង និងកាត់បន្ថយការនាំចូល ។

លោក ជិន ជ័យាបុត្រ ប្រធានក្រុមហ៊ុន គីរីកាហ្វេ បានថ្លែងប្រាប់ឱ្យដឹងថា ការបណ្តាក់ទុនទៅលើការផលិតគ្រាប់កាហ្វេនេះគឺជាការសម្រេចមួយក្នុងការកសាងនូវយីហោក្នុងស្រុកដើម្បីផ្តល់ទំនុកចិត្តដល់ម្ចាស់អាជីវកម្ម និងប្រជាពលរដ្ឋដែលនិយមពិសារកាហ្វេដែលជាភេសជ្ជះកំពុងពេញនិយមទាំងក្រុង និងទីជនបទ។ លោក​ថា ជាមួយការដាក់ឈ្មោះ គីរីកាហ្វេគឺជាឈ្មោះតំណាងប្រភពគ្រាប់កាហ្វេកម្ពុជាពីខេត្តមណ្ឌលគីរីដែលពលរដ្ឋធ្លាប់បានទៅទស្សនានូវចំការកាហ្វេនៅទីនោះ។

លោក ជិន ជ័យាបុត្រ បានបញ្ជាក់ថា «​សម្រាប់គោលការណ៍ជាចម្បងរបស់យើងក្នុងការកសាងយីហោ គីរីកាហ្វេនេះ គឺផ្អែកជាចម្បងលើក្រមសីលធម៌ចម្បង​ ភាពស្មោះត្រង់ជាមួយជាតិ និងអតិថិជន។ រាល់គ្រាប់កាហ្វេដែលយើងខ្ញុំយកមកលីញលក់ គឺជារបស់ខេត្តមណ្ឌលគិរីពិតៗ។ ​យើងខ្ញុំប្រកាន់ជំហរម៉ឺងម៉ាត់ មិនយកគ្រាប់កាហ្វេបរទេស មកបន្លំធ្វើជាកាហ្វេខ្មែរឡើយ។ នេះជាការប្តេជ្ញាចិត្តរបស់យើងខ្ញុំ ក្នុងការលើកស្ទួយផលិតផលខ្មែរពិតប្រាកដ»។

លោកថា ដោយលោក​ជាសមាជិករបស់សមាគមបណ្តាញកសិករតេជោ ដោយមានការចង្អុលបង្ហាញ និងយកចិត្តទុកដាក់ពីបណ្ឌិត កៅ ថាច ប្រធានសមាគមបណ្តាញកសិករតេជោ គីរីកាហ្វេ នឹងបន្តឈរជើងជាមួយបងប្អូនកសិករ ដោយប្តេជ្ញាចិត្តបន្តទិញកាហ្វេពីបងប្អូនជនជាតិដើមភាគតិច ឱ្យអស់ពីលទ្ធភាព ក្នុងតម្លៃទីផ្សារ ដើម្បីឱ្យកាហ្វេមណ្ឌលគិរី អាចបន្តដំណើរទៅមុខប្រកបដោយមោទនភាព និងជួយលើកកម្ពស់ជីវភាពបងប្អូនកសិករឱ្យកាន់តែធូរធារ និងរឹងមាំ។

​លោក ជិន ជ័យាបុត្រ បានគូសបញ្ជាក់ទៀតថា ក្រៅតែពីការធានាឈរជើងទិញកាហ្វេពីកសិករហើយនោះ ក្រុមហ៊ុនក៏បានគាំទ្រផ្នែកឥណទានកសិកម្ម សម្រាប់ពង្រីកការដាំដុះកាហ្វេ រួមមានការផ្គត់ផ្គង់ ជី, កូនពូជ, ថ្នាំកសិកម្ម និងសម្ភារៈបច្ចេកទេសផ្សេងៗ ដើម្បីជួយបងប្អូនមានលទ្ធភាពពង្រីកផ្ទៃដីដាំដុះ និងបង្កើនទិន្នផលផងដែរ។

បើយោងតាមរបាយការណ៍ពីក្រសួងកសិកម្ម បច្ចុប្បន្នប្រទេសកម្ពុជាមានតម្រូវការគ្រាប់កាហ្វេប្រមាណជា ២០ ០០០ តោនក្នុងមួយឆ្នាំ តែការផលិតជាក់ស្តែងបានប្រមាណតែ ២ ០០០តោនប៉ុណ្ណោះក្នុងមួយឆ្នាំ។ ទិន្នន័យនេះបង្ហាញថា កម្ពុជាត្រូវការគ្រាប់កាហ្វេជិត ១៨ ០០០តោនក្នុងមួយឆ្នាំបន្ថែមទៀត ដែលជាឱកាសល្អសម្រាប់កសិករមានបំណងចង់ដាំដំណាំកាហ្វេ៕

The post វិនិយោគិនក្នុងស្រុកម្នាក់បោះទុនជាង១លានដុល្លារ កសាងយីហោកាហ្វេ ដើម្បីប្រកួតប្រជែងជាមួយកាហ្វេនាំចូល appeared first on Kampuchea Thmey Daily.

កាលពីសប្តាហ៍មុន ថ្នាក់ដឹកនាំធនាគារកណ្ដាលសរុប ២៦ រូប មកពីតំបន់អឺរ៉ុប អាមេរិក អាហ្វ្រិក អាស៊ី មជ្ឈិមបូព៌ា និងប៉ាស៊ីហ្វិក បានប្រមូលផ្តុំនៅសន្និសីទកម្រិតលំដាប់អន្តរជាតិនេះនៅរាជធានីភ្នំពេញ ។

ក្រៅពីវត្តមានលោកស្រី Lagarde រូបថតផ្សព្វផ្សាយនៅលើទំព័រហ្វេសប៊ុកផ្លូវការរបស់ធនាគារជាតិ នៃកម្ពុជាបានបង្ហាញពីវត្តមានថ្នាក់ដឹកនាំធនាគារកណ្តាលលំដាប់អន្តរជាតិជាច្រើនផ្សេងទៀតដូចជា លោក François VILLEROY DE GALHAU ទេសាភិបាល ធនាគារកណ្តាលបារាំង លោក Guillaume Pierre Wunsch ទេសាភិបាល ធនាគារកណ្តាលបែលហ្ស៊ិក លោក Marc-André Gosselin ទេសាភិបាលរង ធនាគារកណ្តាលកាណាដា លោក Jean-Claude Kassi Brou ទេសាភិបាលធនាគារកណ្តាលរដ្ឋអាហ្វ្រិកខាងលិច លោក Yvon Sana Bangui ទេសាភិបាលធនាគារកណ្តាលរដ្ឋអាហ្វ្រិក លោក Aivo Handriatiana Andrianarivelo ទេសាភិបាល ធនាគារកណ្តាលម៉ាដាហ្គាស្កា និងលោកស្រី Anca Dragu ទេសាភិបាល ធនាគារកណ្តាលម៉ុលដូវ៉ា ជាដើម។

នៅក្នុងសន្និសីទលំដាប់អន្តរជាតិនេះ លោកស្រី Christine Lagarde ដែលត្រូវបានគេចាត់ទុកថាជាថ្នាក់ដឹកនាំដ៏មានឥទ្ធិពលមួយរូបក្នុងវិស័យហិរញ្ញវត្ថុសកល បានថ្លែងសុន្ទរកថាគន្លឹះដោយបានលើកឡើងពីសារៈសំខាន់នៃសន្និសីទនេះ និងរំលេចពីតួនាទីកាន់តែសកម្មរបស់កម្ពុជាក្នុងវេទិកាហិរញ្ញវត្ថុអន្តរជាតិ។ លោកស្រីបានបង្ហោះសារជាច្រើននៅលើបណ្ដាញសង្គមភ្ជាប់នឹងរូបភាពអំពីទិដ្ឋភាពនៃសន្និសីទ និងជាមួយថ្នាក់ដឹកនាំធនាគារជាតិនៃកម្ពុជា ដោយបានបង្ហាញពីអារម្មណ៍រីករាយចំពោះលទ្ធផលប្រកបដោយផ្លែផ្កានៃការចូលរួមសន្និសីទថ្នាក់ទេសាភិបាលធនាគារកណ្តាលហ្រ្វង់កូហ្វូននៅរាជធានីភ្នំពេញ ដែលសមស្របជាមួយនឹងកាលវិភាគការងារដ៏មមាញឹកក្នុងខែឧសភា រួមមានកិច្ចប្រជុំថ្នាក់ទេសាភិបាលធនាគារកណ្តាល និងរដ្ឋមន្ត្រីហិរញ្ញវត្ថុនៃក្រុមប្រទេស G7 នៅទីក្រុងប៉ារីស ប្រទេសបារាំង និងកិច្ចប្រជុំ Eurogroup នៅទីក្រុង Nicosia ប្រទេសស៊ីប ជាដើម។

លោកស្រីថ្លែងថា៖ “តាមរយៈការចែករំលែកបទពិសោធ និងទស្សនាទាននៅក្នុងសន្និសីទដែលធ្វើឡើងនៅកម្ពុជានាពេលនេះ ធនាគារកណ្តាលអាចព្យាករពីបញ្ហាប្រឈមរួមពាក់ព័ន្ធនឹងសេដ្ឋកិច្ច ភូមិសាស្ត្រនយោបាយ អាកាសធាតុ និងឌីជីថល ចំពោះការបំពេញបេសកកម្មរក្សាស្ថិរភាពថ្លៃ ឬភាពធន់នៃប្រព័ន្ធហិរញ្ញវត្ថុ”។ វត្តមានថ្នាក់ដឹកនាំធនាគារកណ្ដាលមកពីប្រទេសមានសេដ្ឋកិច្ចជឿនលឿន និងបណ្តាប្រទេសនិយាយភាសាបារាំង បានបង្ហាញថា សន្និសីទនេះមានសារៈសំខាន់ខ្លាំងលើឆាកអន្តរជាតិ។ នេះក៏ជាសញ្ញាបញ្ជាក់ថា ប្រទេសកម្ពុជាកំពុងក្លាយជាទីកន្លែងសំខាន់សម្រាប់ការពិភាក្សាអំពីគោលនយោបាយរូបិយវត្ថុ និងបញ្ហាហិរញ្ញវត្ថុសកល ផងដែរ។

ការទទួលស្គាល់នេះកើតឡើងនៅក្នុងបរិបទដែលនយោបាយរូបិយវត្ថុកម្ពុជាត្រូវបានអនុវត្តប្រកបដោយប្រសិទ្ធភាព ខណៈវិស័យហិរញ្ញវត្ថុកម្ពុជាមានការរីកចម្រើនយ៉ាងឆាប់រហ័ស និងនវានុវត្តន៍។ ក្នុងចំណោមសមិទ្ធផលការងារជាច្រើន ប្រព័ន្ធទូទាត់បាគង (Bakong) របស់ធនាគារជាតិនៃកម្ពុជា បានទទួលការចាប់អារម្មណ៍យ៉ាងខ្លាំងលើឆាកអន្តរជាតិ ហើយធនាគារកណ្តាលនានាបានយកធ្វើជាគំរូសម្រាប់អភិវឌ្ឍប្រព័ន្ធទូទាត់ថែមទៀតផង។

លោកស្រី ជា សិរី ដែលជាទេសាភិបាលធនាគារជាតិនៃកម្ពុជា ក៏ត្រូវបានកម្មវិធីពិភាក្សាផ្នែកហិរញ្ញវត្ថុលំដាប់អន្តរជាតិធំៗអញ្ជើញធ្វើជាវាគ្មិនចែករំលែកបទពិសោធអំពីការអភិវឌ្ឍប្រព័ន្ធទូទាត់បាគងនេះជាបន្តបន្ទាប់ផងដែរ ដែលជាកត្តារួមចំណែកយ៉ាងសំខាន់ដល់ការលើកកិត្តិនាមកម្ពុជាលើឆាកអន្តរជាតិនាពេលកន្លងមក។ សមិទ្ធផលលេចធ្លោនេះក៏បានបង្កើតឱកាសអំណោយផល សម្រាប់ថ្នាក់ដឹកនាំធនាគារជាតិនៃកម្ពុជាពង្រឹងទំនាក់ទំនងល្អជាមួយថ្នាក់ដឹកនាំវិស័យហិរញ្ញវត្ថុសកលដូចជា ប្រធានធនាគារកណ្តាលអឺរ៉ុប នាយិកាមូលនិធិរូបិយវត្ថុអន្តរជាតិ (IMF) និងបណ្តាទេសាភិបាលធនាគារកណ្តាលចម្បងៗជាច្រើនទៀត។

ក្រៅពីកិច្ចប្រជុំផ្លូវការ លោកស្រី Lagarde និងទេសាភិបាលធនាគារកណ្តាលជាច្រើនបានស្វែងយល់បន្ថែមពីទំនៀមទម្លាប់ ប្រវត្តិសាស្ត្រ និងសិល្បៈវប្បធម៌ខ្មែរ និងបានបំពេញទស្សនកិច្ចនៅសារមន្ទីរសេដ្ឋកិច្ច និងរូបិយវត្ថុព្រះស្រីឦសានវរ្ម័ន (ស.ស.រ.) ព្រមទាំងតំបន់រមណីយដ្ឋានប្រវត្តិសាស្រ្តនានាថែមទៀតផង។

លោកស្រី ជា សិរី បានមានប្រសាសន៍ថា វត្តមានថ្នាក់ទេសាភិបាលមកពីប្រទេសមានសេដ្ឋកិច្ចជឿនលឿនដូចជា លោកស្រី Lagarde លោក François VILLEROY DE GALHAU ជាដើម បានធ្វើឱ្យការពិភាក្សាក្នុងសន្និសីទដែលរៀបចំឡើងនៅកម្ពុជាកាន់តែលេចធ្លោឡើងលើឆាកអន្តរជាតិ ជាពិសេសលើប្រធានបទនវានុវត្តន៍ និងអនាគតប្រព័ន្ធហិរញ្ញវត្ថុសកល។

លោកស្រីថ្លែងថា៖ «បច្ចេកវិទ្យាហិរញ្ញវត្ថុថ្មីៗកំពុងផ្លាស់ប្តូរយ៉ាងឆាប់រហ័សនូវរបៀបដែលប្រជាពលរដ្ឋទទួលបានសេវាហិរញ្ញវត្ថុ ហើយនវានុវត្តន៍ទាំងនេះបាននិងកំពុងក្លាយជាមធ្យោបាយចម្បងក្នុងការជំរុញបរិយាបន្នហិរញ្ញវត្ថុ។ ធនាគារកណ្តាលមិនមែនដើរតួនាទីទប់ស្កាត់នវានុវត្តន៍នោះទេ ប៉ុន្តែគឺដើម្បីធានាថានវានុវត្តន៍ទាំងនោះបម្រើដល់ប្រយោជន៍ប្រជាពលរដ្ឋ ជាជាងបង្កនូវភាពងាយរងគ្រោះ»។

ការរៀបចំសន្និសីទថ្នាក់ទេសាភិបាលធនាគារកណ្តាលហ្រ្វង់កូហ្វូនដែលមានអ្នកចូលរួមសុទ្ធសឹងជាថ្នាក់ដឹកនាំវិស័យហិរញ្ញវត្ថុសកល មិនមែនគ្រាន់តែបង្ហាញពីសមត្ថភាពរៀបចំព្រឹត្តិការណ៍លំដាប់អន្តរជាតិប៉ុណ្ណោះទេ ប៉ុន្តែគឺជាសារបញ្ជាក់ថាវិស័យហិរញ្ញវត្ថុកម្ពុជាទទួលបានការជឿទុកចិត្តពីមជ្ឈដ្ឋានអន្តរជាតិ៕

The post វត្តមានថ្នាក់ដឹកនាំធនាគារកណ្តាលប្រទេស​ជឿនលឿនបង្ហាញពីការជឿជាក់របស់អន្តរជាតិមកលើប្រព័ន្ធហិរញ្ញវត្ថុកម្ពុជា appeared first on Kampuchea Thmey Daily.

កិច្ចសន្និសីទនេះមានការចូលរួមដោយ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា, ឯកអគ្គរដ្ឋទូត Nguyen Minh Vu, អគ្គលេខាធិការក្រុមប្រឹក្សាវិនិយោគកម្ពុជា លោក ជា វុទ្ធី, អគ្គនាយកសេវាពាណិជ្ជកម្ម ហូ ស៊ីវយ៉ុង និងប្រធានសមាគមធុរកិច្ចកម្ពុជា–វៀតណាម ឡេង ឬទ្ធី ព្រមទាំងសមាជិកសភាពាណិជ្ជកម្ម និងធុរជនពីទាំងពីរប្រទេស។

អ្នកឧកញ៉ា គិត ម៉េង បានលើកឡើងថា កិច្ចសន្ទនានេះជាចំណុចរបត់សំខាន់មួយ ក្នុងការពង្រឹងទំនាក់ទំនងសេដ្ឋកិច្ច ការលើកកម្ពស់ពាណិជ្ជកម្ម និងវិនិយោគទ្វេភាគី ព្រមទាំងការស្វែងរកទីផ្សារថ្មីសម្រាប់ផលិតផលកម្ពុជា និងវៀតណាម។ គាត់បានបញ្ជាក់ថា ទំហំពាណិជ្ជកម្មទ្វេភាគីឈានដល់ ១១,៣៣ ពាន់លានដុល្លារ បង្ហាញពីភាពរឹងមាំនៃខ្សែច្រវាក់ផ្គត់ផ្គង់ ទោះបីមានបញ្ហាប្រឈមសេដ្ឋកិច្ចសកលក៏ដោយ។

លោក ជា វុទ្ធី បានវាយតម្លៃខ្ពស់ចំពោះទំនាក់ទំនងមិត្តភាព និងកិច្ចសហប្រតិបត្តិការដ៏ស្អិតល្មួតរវាងប្រទេសទាំងពីរ។ គាត់បានលើកឡើងថា ក្នុងក្របខ័ណ្ឌវិនិយោគឯកជន ក្រុមប្រឹក្សាអភិវឌ្ឍន៍កម្ពុជា និងភាគីវៀតណាមកំពុងជំរុញភាពជាដៃគូយុទ្ធសាស្ត្រនៅវិស័យសក្តានុពល និងអនុវត្តប្រកបដោយប្រសិទ្ធភាពនូវកិច្ចព្រមព្រៀង និងអនុស្សរណៈយោគយល់ ដើម្បីធានាផលប្រយោជន៍អតិបរមា និងផ្តល់ភាពកក់ក្តៅដល់វិនិយោគិន។

បើតាមលោក វុទ្ធី វិស័យសក្តានុពលសម្រាប់វិនិយោគ ដូចជា ការកែច្នៃជ័រកៅស៊ូ, ស្វាយចន្ទី, ដំឡូងមី និងស្រូវ ដែលវិនិយោគិនវៀតណាមអាចពិនិត្យលទ្ធភាពបណ្តាក់ទុននៅកម្ពុជា៕

The post កម្ពុជា–វៀតណាម ប្តេជ្ញាពង្រឹងកិច្ចសហប្រតិបត្តិការទ្វេភាគីលើសេដ្ឋកិច្ច និងវិនិយោគ appeared first on Kampuchea Thmey Daily.

ប្រធាន ADB លោក Masato Kanda បាននិយាយថា ការគាំទ្ររបស់ធនាគារនៅឆ្នាំ ២០២៥ បានកើនឡើង ២០ ភាគរយ បើប្រៀបធៀបនឹងឆ្នាំ ២០២៤ ជាមួយផលរំពឹងទុកនៃការបង្កើតការងារជាង ៣,៣ លានកន្លែង និងផ្តល់អត្ថប្រយោជន៍ដល់ប្រជាជនជាង ១៨០ លាននាក់។

ប្រាក់កម្ចី ការផ្តល់ជំនួយឥតសំណង ការវិនិយោគភាគហ៊ុន ការធានា និងជំនួយបច្ចេកទេស បានកើនដល់ ២៩,៣ ពាន់លានដុល្លារ បន្ថែមជាមួយ ១៤,៧ ពាន់លានដុល្លារពីដៃគូ។ ការអភិវឌ្ឍវិស័យឯកជនគឺជាអាទិភាព ដោយមានទឹកប្រាក់ ៥,៥ ពាន់លានដុល្លារ ខណៈពាក់កណ្តាលនៃហិរញ្ញប្បទានសាធារណៈគាំទ្រដល់ហេដ្ឋារចនាសម្ព័ន្ធ និងកំណែទម្រង់។

តាមតំបន់ ADB បានផ្តល់ ៩,៧ ពាន់លានដុល្លារក្នុងអាស៊ីខាងត្បូង ៩ ពាន់លានដុល្លារក្នុងអាស៊ីអាគ្នេយ៍ ៨,៣ ពាន់លានដុល្លារក្នុងអាស៊ីកណ្តាលខាងលិច ១,៤ ពាន់លានដុល្លារក្នុងអាស៊ីបូព៌ា និង ៦៨០ លានដុល្លារក្នុងប៉ាស៊ីហ្វិក។ វិស័យហិរញ្ញវត្ថុ ដឹកជញ្ជូន និងគ្រប់គ្រងសាធារណៈ គឺជាវិស័យទទួលបានថវិកាចម្បង។

កំណែទម្រង់ស្ថាប័នសំខាន់ៗរបស់ ADB ក្នុងឆ្នាំ ២០២៥ រួមមាន ការកែប្រែធម្មនុញ្ញ ដើម្បីដកដែនកំណត់ហិរញ្ញប្បទាន និងបង្កើនសមត្ថភាពផ្តល់ហិរញ្ញប្បទាន ៥០ ភាគរយ ការធ្វើបច្ចុប្បន្នភាពគោលនយោបាយថាមពល ការកែសម្រួលនីតិវិធីលទ្ធកម្ម និងវិធីសាស្រ្តថ្មីក្នុងការគាំទ្រខ្សែច្រវាក់តម្លៃរ៉ែសំខាន់ៗសម្រាប់ថាមពលកកើតឡើងវិញ និងបច្ចេកវិទ្យាឌីជីថល។

The post ADB ផ្តល់ហិរញ្ញប្បទាន ២៩,៣ ពាន់លានដុល្លារ ក្នុងឆ្នាំ ២០២៥ និងជំរុញកំណែទម្រង់ស្ថាប័ន appeared first on Kampuchea Thmey Daily.

ការណែនាំនេះអនុវត្តតាមច្បាប់សារពើពន្ធ និងប្រកាសពាក់ព័ន្ធចុងឆ្នាំ ២០២៥។ អ្នកជាប់ពន្ធនិវាសនជន និងអនិវាសនជន ត្រូវប្រកាស និងបង់ពន្ធលើចំណេញមូលធនក្នុងរយៈពេលបីខែ បន្ទាប់ពីការលក់ ឬផ្ទេរទ្រព្យ។

ប្រព័ន្ធគ្រប់គ្រងពន្ធលើចំណេញមូលធន (Capital Gains Tax System) អនុញ្ញាតឱ្យអ្នកជាប់ពន្ធបញ្ចូលព័ត៌មានប្រកាសពន្ធ និងឯកសារយោងតាមអនឡាញ តាមរយៈគេហទំព័រ GDT HomeTax និង tax.gov.kh។ ការបង់ប្រាក់អាចធ្វើតាមធនាគារដៃគូ ឬប្រព័ន្ធ e-Payment។

អគ្គនាយកដ្ឋានពន្ធដារ ក៏បានបញ្ជាក់ថា ភ្នាក់ងារកាត់ទុកតាមរបបស្វ័យប្រកាស ត្រូវមានកាតព្វកិច្ចប្រកាស និងបង់ពន្ធតាមប្រព័ន្ធ e-Filing។

ការប្រើប្រាស់ប្រព័ន្ធថ្មី នឹងធានាឱ្យការប្រកាសពន្ធកាន់តែឆាប់រហ័ស មានគណនេយ្យភាព និងប្រសិទ្ធភាពខ្ពស់។  

អគ្គនាយកដ្ឋានពន្ធដារក៏បានអំពាវនាវឱ្យអភិបាល បណ្ណាធិការ កម្មសិទ្ធិករ និងភ្នាក់ងារពន្ធដារ អនុវត្តតាមសេចក្តីណែនាំនេះ ដើម្បីធានាឱ្យប្រព័ន្ធពន្ធថ្មីមានប្រសិទ្ធភាព និងជួយលើកកម្ពស់គុណភាពសេវាដល់សាធារណជន៕

The post ពន្ធដារបានដាក់ចេញនូវនីតិវិធីប្រកាសពន្ធលើចំណេញមូលធនតាមអនឡាញ appeared first on Kampuchea Thmey Daily.

ការបង្ហាញនូវផែនការនេះត្រូវបានធ្វើឡើងកាលពីថ្ងៃទី២៩ ខែមករា ក្នុងជំនួបរវាងហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ជាមួយនឹងតំណាងក្រុមហ៊ុនដឹកនាំដោយអ្នកឧកញ៉ា សំ សុខនឿន និង លោក Dennis Lye Ngaic Seong ស្ថាបនិកក្រុមហ៊ុន នៅទីស្តីការក្រសួង។

អ្នកឧកញ៉ា សំ សុខនឿន បានលើកឡើងថា ក្រុមហ៊ុន KH HAITECH ត្រូវបានបង្កើតឡើងជាការវិនិយោគរួមទុនរវាងសហគ្រាសកម្ពុជា និងដៃគូពីប្រទេសចិន និងសិង្ហបុរី ដោយគ្រោងបង្កើតម៉ាកយីហោខ្មែរ។

ជាមួយគ្នានោះដែរ លោក Dennis Lye Ngaic Seong ស្ថាបនិក និងនាយករបស់ក្រុមហ៊ុននេះ បានបន្ថែមថា ក្រុមហ៊ុនកំពុងសិក្សាទីតាំងមួយចំនួន សម្រាប់បង្កើតមូលដ្ឋានផលិតកម្ម និងបានបញ្ជាក់ថា សេវាប្រើប្រាស់ចាំបាច់ ពិសេសថាមពលអគ្គិសនី គឺជាកត្តាសំខាន់ក្នុងការជ្រើសរើសទីតាំងវិនិយោគ។

លោក ហែម វណ្ណឌី បានស្វាគមន៍គម្រោងនេះ និងបានបញ្ជាក់ការប្តេជ្ញាចិត្តរបស់ក្រសួង ក្នុងការគាំទ្រវិនិយោគិន ដោយគាំទ្រដំណើរការបង្កើតរោងចក្រ ការអនុម័តប្លង់បច្ចេកទេសរោងចក្រ ការចេញប្រកាសដំណើរការរោងចក្រ ស្តង់ដារ ការការពារកម្មសិទ្ធិឧស្សាហកម្ម និងសេវាមន្ទីរពិសោធន៍ជាដើម។

បើតាមលោករដ្ឋមន្រ្តីបានបង្ហាញពីបំណងអភិវឌ្ឍរោងចក្រដែលស្វ័យប្រវត្តិកម្មខ្ពស់ និងមានសមត្ថភាពផ្លាស់ប្ដូរតាមតម្រូវការ ព្រមទាំងផ្គត់ផ្គង់ថេប្លេត (tablet) តម្លៃសមរម្យសម្រាប់ទីផ្សារកម្ពុជា ពិសេសសម្រាប់សិស្សនិស្សិត និងអ្នកសេដ្ឋកិច្ចក្រៅប្រព័ន្ធអាចពង្រីកលទ្ធភាពប្រើប្រាស់ឧបករណ៍ឌីជីថល និងសិក្សាតាមប្រព័ន្ធអនឡាញកាន់តែទូលំទូលាយ។

លោកហែម វណ្ណឌី ក៏បានអញ្ជើញ ក្រុមហ៊ុន KH HAITECH ចូលរួមតាំងបង្ហាញផលិតផល បច្ចេកវិទ្យា និងដំណោះស្រាយរបស់ខ្លួននៅក្នុងទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍លើកទី៤ ដែលនឹងប្រព្រឹត្តទៅចាប់ពីថ្ងៃទី ២៦ ដល់ ២៨ ខែមីនា ឆ្នាំ២០២៦ ដែលជាវេទិកាសម្រាប់ផ្សារភ្ជាប់នវានុវត្តន៍ករ ផលិតករ ឧស្សាហករ និងអ្នកប្រើប្រាស់បច្ចេកវិទ្យានៅកម្ពុជា៕

The post  វិនិយោគិនចិន-កម្ពុជាចាប់ដៃគ្នាជំរុញឧស្សាហកម្ម ៤.០ និង​ផ្គត់ផ្គង់ថេប្លេតតម្លៃសមរម្យមកកាន់ទីផ្សារកម្ពុជា appeared first on Kampuchea Thmey Daily.

• ក្នុងន័យនេះ របាយការណ៍ត្រួតពិនិត្យប្រព័ន្ធធនាគារប្រចាំឆ្នាំ២០២៥ នឹងអាចចេញផ្សាយក្នុងខែមីនា ឆ្នាំ២០២៦នេះ។
• សាធារណជនហាក់មានចំណាប់អារម្មណ៍លើវិស័យធនាគារក្នុងឆ្នាំ២០២៥ ដោយសារមានការ ដាក់ឱ្យគ្រឹះស្ថានធនាគារជម្រះបញ្ជីតាមច្បាប់ ការកើនឡើងកម្ចីមិនដំណើរការ និងការលើកឡើងពីកង្វះអនុលោមភាពជាដើម។ 
• ការកើនឡើងនៃកម្ចីមិនដំណើរការគ្រាន់តែជាសញ្ញាក្រើនរំឭកពីការធ្លាក់ចុះសមត្ថភាពសងត្រលប់របស់អ្នកទទួលកម្ចីប៉ុណ្ណោះ  ដែលមិនមែនជាភស្តុតាងក្នុងការសន្និដ្ឋានថាគ្រឹះស្ថានណាមួយបានប្រព្រឹត្តបទល្មើសនោះឡើយ។
• គ្រឹះស្ថានធនាគារមួយត្រូវបានដាក់ឱ្យជម្រះបញ្ជីតាមច្បាប់។ អតិថិជនដែលមានប្រាក់បញ្ញើនៅធនាគារនោះនៅតែអាចដកប្រាក់បានធម្មតា។ ទន្ទឹមនេះ អតិថិជនដែលខ្ចីប្រាក់ពីធនាគារនោះក៏ត្រូវបន្តបំពេញកាតព្វ​កិច្ចដែលមានជាប្រក្រតី។
• ក្នុងករណីដែលមិនទាន់ត្រូវបានដាក់ឱ្យជម្រះបញ្ជី ហើយគ្រឹះស្ថានធនាគារនោះនៅតែអាចដំណើរការបានជាធម្មតា គឺដោយសារតែពេលមុនជម្រះបញ្ជី គ្រឹះស្ថានដដែលនេះមិនទាន់បានប្រព្រឹត្តល្មើសនៅឡើយ ឬមិនទាន់មានព័ត៌មានសង្ស័យដែលតម្រូវឱ្យមានការស៊ើបអង្កេត។
• ការច្បិចយកទិន្នន័យបច្ចេកទេសតែមួយផ្នែកមកបកស្រាយដោយមិនមានមូលដ្ឋានច្បាប់ និងជំនាញច្បាស់លាស់អាចនាំឱ្យសាធារណជនយល់ច្រឡំ ឬវាយតម្លៃខុសលើស្ថានភាពជាក់ស្តែងនៃប្រព័ន្ធហិរញ្ញវត្ថុកម្ពុជា។
• ការសន្និដ្ឋានទៅលើនិរន្តរភាពរបស់ធនាគារមួយ ដោយផ្អែកតែទៅលើឥណទានមិនដំណើរការ មិនត្រឹមត្រូវទេ។​ ការសន្និដ្ឋានដែលអាចទទួលយកបានត្រូវផ្អែកលើការវាយតម្លៃដោយហ្មត់ចត់លើកត្តាសំខាន់ៗជាច្រើនដូចជាភាពគ្រប់គ្រាន់នៃដើមទុនរបស់ធនាគារដែលអាចស្រូបយកហានិភ័យពីការខាតបង់ សំវិធានធនលើឥណទានមិនដំណើរការ និងសន្ទនីយភាព ជាដើម។ ជាក់ស្តែង គិតត្រឹមដំណាច់ ឆ្នាំ២០២៤ ធនាគារ ព្រីនស៍ ម.ក មានភាពគ្រប់គ្រាប់នៃដើមទុន  ២១,២៣% (ខ្ពស់ជាងបទប្បញ្ញត្តិប្រុងប្រយ័ត្នរបស់ធនាគារជាតិនៃកម្ពុជាដែលមានអប្បមរមា ១៥% និងខ្ពស់ជាងស្តង់ដារក្រុងបាសែល ដែលជាស្តង់ដារអនុវត្តជាទូទៅលំដាប់អន្តរជាតិ ដែលតម្រូវអប្បរមា ៨%​) ដែលបង្ហាញពីលទ្ធភាពស្រូបយកការខាតបង់យ៉ាងច្រើនបន្ថែមទៀត។
  

• គិតត្រឹមឆ្នាំ២០២៤ ធនាគារមានអនុបាតសន្ទនីយភាព  ២៤៤,១៤% (កម្រិតអប្បបរមារ ១០០%)​ ដែលធានាបាននូវការទូទាត់បំណុលផ្សេងៗបាន រួមទាំង ការទូទាត់សងប្រាក់បញ្ញើផងដែរ។ ឥណទានរបស់ធនាគារ ៩៨,៩០% ជាឥណទានដែលមានការធានា ដោយអគារ ឬអចលនទ្រព្យ ដែលទោះក្នុងករណីណាក៏ដោយ ឥណទាននឹងមិនអាចបាត់បង់១០០% នោះទេ។
• ក្រោមស្តង់ដារគណនេយ្យ និងបទប្បញ្ញត្តិប្រុងប្រយ័ត្ន ឥណទានដំណាក់កាលទី២ (ឥណទានឃ្លាំមើល) មិនមែនជាការខាតបង់ឥណទានជាក់ស្តែងទេ ដោយសារឥណទានទាំងនោះនៅតែជាឥណទានដំណើរការ បន្តទទួលបានការទូទាត់សងប្រាក់ដើមនិង/ឬការប្រាក់ និងអាចដំឡើងទៅថ្នាក់ល្អវិញផងដែរ។ ឥណទានដំណាក់កាលទី៣ (ឥណទានមិនដំណើរការ) ជាឥណទានរងការខាតបង់ ប៉ុន្តែអាចស្តារឡើងវិញតាមវិធានការគ្រប់គ្រងឥណទានដោយប្រុងប្រយ័ត្ន។ ដូច្នេះ ការសន្និដ្ឋានថា ការបូកចូលគ្នានៃប្រភេទឥណទានមិនដំណើរការ និងជិតលែងដំណើរការរបស់ធនាគារ ព្រីនស៍ ម.ក ធ្វើឱ្យធនាគារនេះដួលរលំ គឺមិនស្របលក្ខណៈបច្ចេកទេសនៃការវាយតម្លៃសុខភាពរបស់ធនាគារឡើយ។
• ការវាយតម្លៃដែលមិនមានជំនាញជាក់លាក់ និងគ្រប់ជ្រុងជ្រោយ ផ្តល់នូវព័ត៌មានដែលមិនត្រឹមត្រូវនិងអាចនាំឱ្យសាធារណជនមានការមន្ទិលសង្ស័យលើសមត្ថភាព និងអាចប៉ះពាល់ដល់ស្ថិរភាពហិរញ្ញវត្ថុទាំងមូល។

The post ស្វែងយល់ពីចំណុចគន្លឹះនៃការចេញផ្សាយរបាយការណ៍ស្ថានភាពធនាគារឆ្នាំ២០២៥ និងកម្ចីមិនដំណើរការនៅកម្ពុជា appeared first on Kampuchea Thmey Daily.

ពិធីនោះត្រូវបានធ្វើឡើងនៅស្រុកកំពង់ស្វាយ ខេត្តកំពង់ធំ ក្រោមអធិបតីភាពរបស់ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ និងមានការចូលរួមពីតំណាងស្ថានទូតសហរដ្ឋអាមេរិក។

ឯកឧត្តម វង្សី វិស្សុត បានថ្លែងថា គម្រោងវិនិយោគនេះ នឹងបង្កើតការងារថ្មី បង្កើនប្រាក់ចំណូល បណ្តុះបណ្តាលជំនាញ និងពង្រឹងសេដ្ឋកិច្ចជនបទ។ លោកបានបន្ថែមទៀតថា វិនិយោគនេះនឹងជួយ កម្ពុជាក្លាយជាផ្នែកសំខាន់ក្នុងខ្សែច្រវាក់ផ្គត់ផ្គង់ជីវវិទ្យា និងសុខាភិបាលអន្តរជាតិ។

លោកស្រី Shannon M. Parisotto អគ្គនាយកប្រតិបត្តិជាន់ខ្ពស់របស់ CRL បានថ្លែងថា “វិនិយោគនេះមិនមែនត្រឹមតែជាទុនប៉ុណ្ណោះទេ ប៉ុន្តែជាកិច្ចសហការយុទ្ធសាស្ត្ររយៈពេលវែងជាមួយកម្ពុជា ដែលផ្អែកលើទំនុកចិត្ត និងអត្ថប្រយោជន៍រួម។”

CRL ដែលមានប្រតិបត្តិការនៅជាង ២០ ប្រទេស និងមានបុគ្គលិកជិត ២០,០០០ នាក់ បានបញ្ជាក់ថា ក្រុមហ៊ុនបានគាំទ្រការអភិវឌ្ឍឪសថថ្មីប្រហែល ៩០ ភាគរយ ដែលទទួលស្គាល់ដោយ FDA ក្នុងឆ្នាំ ២០២៥។

ក្រុមហ៊ុនបានសន្យាថា នឹងរក្សាបុគ្គលិកកម្ពុជា ២០០ នាក់ បង្កើនប្រាក់ខែ បន្ថែមកម្លាំងពលកម្ម និងផ្តល់ការបណ្តុះបណ្តាលវិជ្ជាជីវៈ។ CRL ក៏បានប្រកាសថា នឹងវិនិយោគបន្ថែមលើហេដ្ឋារចនាសម្ព័ន្ធ ដូចជា ការពង្រីកសមត្ថភាពចិញ្ចឹម ការតំឡើងប្រព័ន្ធត្រួតពិនិត្យឌីជីថល និងការកែលម្អបរិស្ថាន។

ក្រៅពីបេសកកម្មវិទ្យាសាស្ត្រ CRL ក៏បានប្រកាសថា នឹងផ្តល់ថវិកាសម្រាប់ការគាំទ្រសង្គម ប្រចាំឆ្នាំចំនួន ២៥០,០០០ ដុល្លារ ដើម្បីគាំទ្រអប់រំ សុខាភិបាល ទឹកស្អាត និងអភិវឌ្ឍយុវជន។ គម្រោងដំបូងក្នុងឆ្នាំ ២០២៦ គឺសាងសង់សាលាថ្មីមួយសម្រាប់សហគមន៍ក្នុងតំបន់។

«ក្រោមការដឹកនាំរបស់ CRL កម្ពុជា នឹងក្លាយជាផ្នែកសំខាន់ និងទុកចិត្តបានក្នុងខ្សែច្រវាក់ផ្គត់ផ្គង់សកល។នេះគឺជាការចាប់ផ្តើមនៃដំណើរថ្មី ដែលផ្អែកលើទំនុកចិត្ត ការអភិវឌ្ឍ និងភាពជាដៃគូរយៈពេលវែង។»នេះបើយោងតាមការលើកឡើងរបស់លោកស្រី Parisotto ​៕

The post ក្រុមហ៊ុនស្រាវជ្រាវ​វេជ្ជសាស្រ្តអាមេរិក CRL បោះទុនវិនិយោគជាង ៥០០ លានដុល្លារ នៅកម្ពុជា appeared first on Kampuchea Thmey Daily.